Cوت جۇيەسىنەگى ادىلەتسىزدىكتى جويماي، ادىلەتتى قوعام ورناتۋ مۇمكىن ەمەس!
بۇگىنگى ءجۋرناليستتىڭ سۇراعىنا تاپ وسىلاي جاۋاپ بەردىم. ويتكەنى، كىممەن بولسىن اراداعى كەلىسپەۋشىلىگىڭىز بولسا، سوت ارقىلى شەشىپ الۋعا بولادى (اتقارۋشى بيلىك پەن كۇشتىك قۇرىلىمدار، جۇمىس بەرۋشىڭىز بەن دەنساۋلىق، ءبىلىم ت.ب. سالا قىزمەتكەرلەرىمەن دە.)
ءبىزدىڭ سوتتاردىڭ كوزىڭدى باقىرايتىپ قويىپ ادىلەتسىز شەشىمدەردى شىعارا سالاتىنىن تالاي كورىپ ءجۇرمىز. قارسىلىق بىلدىرسەڭىز ايتاتىن ۋاجدەرى — «كەلىسپەگەن جاعدايدا اپپەلياتسيالىق سوتقا ارىزدانۋىڭىزعا بولادى…». اپپەلياتسيالىق سوتتا بارىڭدى سالىپ جەڭىپ شىعۋىڭ مۇمكىن. بىراق، سول كەزدىڭ وزىندە ءبىرىنشى ساتىدا قاراعان سۋدياعا ەشقانداي شارا كورىلمەيدى. ويتكەنى، زاڭمەن قورعالعان.
سوندا، ءسىزدىڭ ءبىرىنشى ساتىداعى سوتتىڭ كەسىرىنەن ساندالعان جارتى جىلدىق ۋاقىتىڭىز بەن جۇيكەڭىزگە تۇسكەن سالماققا كىم جاۋاپ بەرەدى؟
ەشكىم جاۋاپ بەرمەيدى. ءارى، كوپ ادام ەكىنشى ساتىداعى سوتقا ساندالىپ جۇرگىسى كەلمەيدى. اشىنعان ادامعا ەڭ وڭايى الاڭعا نەمەسە اكىمشىلىككە بارىپ اشۋ-ىزاسىن توگىپ قايتۋ. وسىلاي-وسىلاي جينالعان اشۋ مەن ىزالى حالىق سانىنىڭ كوبەيۋى — «ءبىر كۇنى جارىلاتىن بومبا». ول «جارىلعان بومبانىڭ» سالدارىنان «باستارى اۋىراتىن» ۇكىمەت پەن كۇشتىك قۇرىلىمدار.
ال، ءبىزدىڭ «ايلىقتارى كوتەرىلگەن» سۋديالارىمىز (حالىقتىڭ كوشەگە شىعۋىنا باستى سەبەپكەر شەشىمدەردىڭ اۆتورلارى) كوشەدەگى پوليتسيا مەن حالىقتىڭ قارسىلاسىپ جاتقاندىعىنا ميىعىنان قاراپ، ۇيلەرىندە «ءشايلارىن سوراپتاپ» جاتا بەرۋلەرى ادىلەتسىزدىك ەمەي نەمەنە؟!
سوت ءسىزدىڭ ارىزىڭىز بويىنشا ءادىل شەشىم شىعىرماسا قايدا باراسىز؟! «كوشە مەن الاڭعا» باراسىز. سولاي ەتسەڭىز ءسىزدىڭ «قولىڭىزدى قايىرىپ» قايدا اپارادى؟ قايتادان الگى سوتقا اپارادى.
سوندىقتان، كەشەگى كوشەگە اشىنىپ شىققان حالىقتىڭ سونداي كۇيگە جەتۋىنىڭ باستى سەبەپكەرلەرى رەتىندە سۋديالاردىڭ ادىلەتسىز شەشىمدەرى دەپ تانىلىپ، سوت جۇيەسىن تولىقتاي قايتا رەفورمالاۋدى ۇسىنامىن!
مەنىڭ ۇسىنىسىم: ءبىرىنشى ساتىداعى سوتتىڭ شەشىمى ەكىنشى ساتىداعى اپپەلياتسيالىق سوتتا كۇشى جويىلاتىن بولسا، وندا، سول ءبىرىنشى ساتىداعى سۋدياعا شارا كورىلۋى كەرەك. جىلىنا ەكى رەت سول سۋديانىڭ شەشىمى جوعارىدان بۇزىلاتىن بولسا، ول سۋديانى جۇمىستان بوساتۋ كەرەك. ولاي بىلىكتىلىگى جەتپەيتىن سۋديانىڭ ادام تاعدىرىنا قاتىستى مەملەكەت اتىنان ۇكىم شىعارۋعا حاقىسى جوق.
رۇستەم اشەتاەۆ
Abai.kz
