پرەزيدەنتتىڭ «حابار» ارناسىنا ورىس تىلىندە سۇحبات بەرگەنى تۋرالى سۇراققا ونىڭ ءباسپاسوز حاتشىسى بەرىك ءۋالي: «اتالعان سۇحبات الەمدىك اۋديتورياعا ارنالعان. قازاقستاندا بولىپ جاتقان وقيعالارعا الەمدىك قوعامداستىق قىزىعۋشىلىق تۋدىرىپ وتىر. سوندىقتان تاقىرىپتىڭ وزەكتىلىگىن ەسكەرە وتىرىپ، سۇحباتتىڭ مەيلىنشە كەڭ تارالۋىن كوزدەدىك»، - دەگەن جاۋاپ بەرىپتى.

قىزىق جاۋاپ! بۇل – الەمدىك قاۋىمداستىق ورىس تىلىنە كوشتى دەگەن ءسوز بە، الدە قازاقستان پرەزيدەنتى الەمدەگى تىلدەردىڭ ىشىندە 2 عانا پايىز قولدانۋشىلارى بار ورىس تىلىندە سويلەگەن ءسوزى «مەيلىنشە كەڭ تارالادى» دەپ ەسەپتەيدى مە ەكەن.

ەڭ قىزىعى، ق.توقاەۆ مىرزا الەمدىك قاۋىمداستىقتىڭ ءتىلى بولىپ سانالاتىن اعىلشىن ءتىلىن تاماشا مەڭگەرگەن ادام، سوندىقتان، قاجەت بولسا، «الەمدىك قوعامداستىسققا» ءوزىنىڭ ويلارىن سول تىلدە دە جەتكىزە الادى. قىسقاسى، بەرىك ءۋالي ءىنىمىز ورىس ءتىلىن قورعايمىن دەپ، الەمدىك قاۋىمداستىقتى ىڭعايسىز جاعدايعا قالدىردى. ولار ەندى «سۇحباتتارىنىڭ كەڭ تارالۋى» ءۇشىن بىرىككەن ۇلتتار ۇيىمىنىڭ مىنبەسىنەن باستاپ، ەۋرووداققا دەيىن ورىس تىلىندە سويلەۋگە كوشەتىن سياقتى. يرونيا عوي. ودان دا: «ءبىر سۇحباتتى ورىسشا، ەكىنشىسىن قازاقشا بەرەتىن بولدى»، - دەسە جەتىپ جاتىر ەدى. پرەزيدەنتىمىزدىڭ ءوزىنىڭ مەملەكەتتىك تىلىندە سۇحبات بەرمەگەنىن اقتاپ الامىز دەپ، بۇكىل الەمدىك قوعامداستىققا جالا جابۋعا بولمايدى عوي.

دوس كوشىم

Abai.kz