قىرعىزستان ۇلتتىق قاۋىپسىزدىك جونىندەگى مەملەكەتتىك كوميتەتىنىڭ توراعاسى قامشىبەك تاشيەۆ پەن تاجىكستان ۇلتتىق قاۋىپسىزدىك كوميتەتىنىڭ توراعاسى سايمۋمين ياتيموۆ شەكاراعا دەليميتاتسيا مەن دەماركاتسيا جۇرگىزۋ بويىنشا ولار جەتەكشىلىك ەتەتىن ۇكىمەتارالىق كوميسسيانىڭ جۇمىسى جالعاساتىنىن حابارلادى.

ياتيموۆ كەزدەسۋدەن سوڭ شەكارا ماسەلەلەرى بويىنشا "تۇپكىلىكتى شەشىم" قابىلداۋ قاجەتتىگىن اتاپ ءوتتى.

"شەكارادا قازا بولعاندار مەن جارالانعاندار بار. بۇل ەكى مەملەكەت اراسىندا شەكارا ماسەلەسى شەشىلمەگەنىن كورسەتەدى. نەگىزگى سەبەپتەرىن جويىپ، ماڭىزدى ماسەلەلەر بويىنشا تۇبەگەيلى شەشىم قابىلداۋ كەرەك. ناقتى جاعدايدا ءبىز باسشىلىققا الاتىن قۇقىقتىق اكتىلەردى ايتىپ وتىرمىن" دەدى ياتيموۆ.

تاشيەۆتىڭ ايتۋىنشا، كەزدەسۋدەن سوڭ قانداي دا ءبىر قۇجاتتارعا قول قويىلماعان.

"ەڭ باستىسى شەكاراعا دەليميتاتسيا جانە دەماركاتسيا جۇرگىزۋ بويىنشا ۇكىمەتارالىق كوميسسيانىڭ جۇمىسىن جالعاستىرۋ تۋرالى شەشىم قابىلداندى. اتالعان كوميسسيانىڭ جۇمىسى ەكى اي بۇرىن توقتاتىلعان ەدى. ەندى كوميسسيا جۇمىسى قارقىندى ءارى تۇراقتى جۇرگىزىلەتىن بولادى. سول سەبەپتى بۇگىن قانداي دا ءبىر قۇجاتقا قول قويماساق تا وسىندا ايتىلعان ءسوز، كەلىسىمدەر ورىندالادى" دەدى قىرعىزستان ۇقمك باسشىسى.

27 قاڭتاردا قىرعىز-تاجىك شەكاراسىندا تاعى اتىس بولعان. قىرعىزستان مەن تاجىكستان شەكاراشىلارى وقيعاعا ءبىر-ءبىرىن كىنالادى. سونىڭ سالدارىنان قىرعىز جاعىنان 13 ادام جاراقاتتانعان. تاجىك جاعى ەكى ادام قازا بولىپ، ون ادام جارالانعانىن حابارلادى.

Abai.kz