قۇرمەتتى پرەزيدەنت! قاسىم-جومارت كەمەلۇلى!
پوليتسيانىڭ وسى كۇنگى ەرەن ەڭبەگىن جانە جايتتارداعى تۋرالىعىن ايتۋدان تانعان ەمەسپىن. بىراق، اقيقاتتىڭ اۋىلىنان الىستاي المان! شىندىققا تۋرا قاراي وتىرىپ، قاراشا حالىقتىڭ ءۋاجىن بۇگىپ قالا المادىم…

قازىرگى كەزدە… “قاندى قاڭتار” وقيعاسىندا جانە ودان كەيىن پوليتسيا قىزمەتكەرلەرىنىڭ حالىقتى ۇرىپ-سوعىپ، سەبەپسىز قيناپ، قورلاپ جاتقاندىعى جايلى وڭىرلەردەن كوپتەپ شاعىم تۇسۋدە! اسىرەسە قىزىلوردا، الماتى، تالدىقورعان كوش باستاپ تۇر!

مۇنداي باسسىزدىق، زاڭسىزدىقپەن كۇرەسۋى ءتيىس… جو-جوق، ءتىپتى جويۋى ءۇشىن ۇكىمەتتەن ارنايى جالاقى تولەنىپ تۇرىپ جۇمىس ىستەيتىن ىشكى ىستەر مينيسترلىگىنە قاراستى وزىندىك قاۋىپسىزدىك دەپارتامەنتى بار! بار دەيمىز-اۋ، بۇل اتى عانا! سەبەبى، ات توبەلىندەي اتى بار دەپارتامەنتتىڭ باستىعى ارمان سادانوۆ مىرزا بۇل باعىتتا جۇمىس جاساپ جاتقان جوق!

“قاندى قاڭتار” وقيعاسى جايلى باق وكىلدەرىنىڭ الدىنا ارنايى شىعىپ، ءوز قىزمەتكەرلەرى تاراپىنان جول بەرىلگەن زاڭسىز ارەكەتتەرىن تەرگەپ-تەكسەرىپ، زەردەلەپ جاتقانى جايلى ءتىپتى اۋىز اشقان جوق! ەسەسىنە، ءتارتىپ ساقشىلارىنىڭ قيتۇرقى قادامدارى تۋراسىندا ءتورتىنشى بيلىك وكىلدەرى - جۋرناليستەر قاۋىمى قىزۋ جازىپ، جۇرتشىلىق جاپپاي نارازىلىعى مەن نالاسىن اشىنا ايتىپ جاتىر.

اسىرەسە، قىزىلوردا وبلىسىندا بولعان ءبىر ەمەس، ءۇش-ءتورت ادامنىڭ زاڭسىز قورلانعانى جايلى باق بەتتەرىندە كەڭىنەن جاريالاندى. سوراقىسى سول - ءبىر ازاماتتى زاڭدى قۇجاتى بولا تۇرا، وتباسىنا حابار بەرمەي، كومىپ تاستاعان!
تالدىقورعان قالاسىنىڭ تۇرعىنىن ۇتىكپەن كۇيدىرىپ ازاپتاعان سۋرەتتەرىندە كورىپ شوك الىپ وتىرمىز!

پوليتسيا قىزمەتكەرلەرىنىڭ ىشىندەگى بۇزاقىلاردى انىقتاۋ جانە ولارعا دەر كەزىندە ءتيىستى شارا كورۋ نەمەسە ىشكى ىستەر ورگاندارى قاتارىنان شىعارۋ - ارمان سادانوۆ مىرزانىڭ تىكەلەي مىندەتى! ءيا، پوگوندى مىرزاعا بۇل قىزمەت-قۇزىرەتى ءۇشىن، ونداعى ءار ساعاتى ءۇشىن مەملەكەتتەن تەڭگە تولەنىپ، ەڭبەكاقىسى بەرىلىپ، جاعداي جاسالىپ جاتقانىن تاعى ۇمىتپايىق! بىراق، جۇمىس ناتيجەسى وسى… حالىقتىڭ بيلىككە دەگەن نارازىلىعىن تۋدىرىپ، قارعىسىن ارقالاۋدا! حالىق اقىماق ەمەس! كوز - كورىپ، قۇلاعى - ەستىپ وتىر!

قۇرمەتتى پرەزيدەنت، ءسىزدىڭ “ەستۋشى مەملەكەت” تۇجىرىمداماڭىزدىڭ جۇيەلى جۇزەگە اسۋىندا وسىنداي ورنى تولماس ءارى ورەسكەل قاتەلىكتەردى جىبەرىپ، ءارى ونىسىن جىلى جاۋىپ جۇرگەندەردى جاسىرماۋىمىز قاجەت دەپ ويلايمىن!
ءدال قازىر ءبىز وسى دۇربەلەڭدە بەيبىت حالىققا زاڭسىز قول كوتەرىپ، ۇرىپ-سوققان پوليتسيا قىزمەتكەرلەرىن دە انىقتاپ، جازاعا تارتۋىمىز كەرەك! سەبەبى، اتا زاڭىمىزدا جازىلعانداي، مەملەكەتىمىزدىڭ باستى بايلىعى - ادام، ونىڭ ءومىرى مەن دەنساۋلىعى، قۇقىعى مەن قاۋىپسىزدىگى!

وسىنى نەگىزگە الا وتىرىپ، تاعى دا قايتالايىن… ازاماتتاردىڭ قۇقىعىن اياققا تاپتاعان جانە ءالى كۇنگە زاڭدى بەلشەسىنەن باسىپ جۇرگەن ساقشىلاردى انىقتاپ، زاڭعا ساي جازالاۋ كەرەك! سوندا عانا، ءبۇتىن ءبىر ەلدىڭ، قاراشا حالىقتىڭ پوليتسياعا دەگەن سەنىمى ۇيالاپ، قۇرمەتى ارتادى!
توبىقتاي ءتۇيىن - ىشكى ىستەر ورگانىندا جۇيە وزگەرۋى كەرەك! اششى بولسا دا - شىندىق!

ول ءۇشىن ەڭ ءبىرىنشى وسى ۋاقىتقا دەيىن قازاقستانداعى پوليتسيانىڭ كەم-كەتىگى…جەمقورلىعى، تارتىپسىزدىگى، بۇزاقىلىعى - قىلمىستارى ت.س.س ولقىلىقتارعا وپ-وڭاي جول بەرىپ جانە ونىمەن كۇرەسۋدىڭ ورنىنا، كوز جۇمىپ وتىرعان ارمان سادانوۆ مىرزانى دەر كەزىندە قىزمەتىنەن الۋىڭىزدى سۇرايمىن!
بۇل - حالىقتىڭ سۇرانىسى!

ايگۇل ورىنبەك

Abai.kz