ۋاقىتشا تەرگەۋ يزولياتورلارىنداعى ازاپتاۋ ماسەلەسى ماجىلىستە ءسوز بولدى. دەپۋتتارعا كەلگەن ىشكى ىستەر مينيسترلىگىنىڭ وكىلى پوليتسيا مەكەمەلەرىنە جاپپاي كامەرا ورناتىلىپ جاتقانىن، قازىردىڭ وزىندە 18 مىڭنان استام مەكەمەگە كامەرا ورناتىلعانىن ايتتى.

«پوليتسيانىڭ بيلىكتى اسىرا پايدالانۋى بويىنشا پروكۋرورلار قاتاڭ تەكسەرەدى. زارداپ شەككەندەرگە وتەماقى تولەۋ ءتارتىبى زاڭمەن كوزدەلگەن. سوت شەشىمىمەن ىسكە اسادى»،- دەدى مينيسترلىك وكىلى.

ال باس پروكۋروردىڭ ورىنباسارى اسەت شىڭداليەۆتىڭ ايتۋىنشا، قازىرگى كەزدە ازاماتتاردان «تەرگەۋ كەزىندە زاڭسىز ءادىستىڭ قولدانىلۋىنا بايلانىستى» 250 شاعىم تۇسكەن.

«ولار بويىنشا 133 قىلمىستىق ءىس قوزعالدى. بۇل ىستەر پروكۋرورلاردىڭ قاتاڭ باقىلاۋىندا. ءار ءىس بويىنشا پروتسەسسۋالدىق پروكۋرور تاعايىندالعان»، - دەدى ول.

Abai.kz