رەداكتسيا: ابزال اجىعاليەۆ – حالىقارالىق دارەجەدەگى سپورت شەبەرى، الەم كۋبوگى مەن الەم بىرىنشىلىكتەرىنىڭ جۇلدەگەرى. شورت-ترەكشى بۇعان دەيىن سوچيدە (2014), پحەنچحاندا (2018) وتكەن وليمپيادالارعا قاتىسقان. وسى جىلى بەيجىڭدە وتكەن قىسقا وليمپيادادا شورت-ترەكتەن 500 مەتر قاشىقتىقتا ءتورتىنشى ورىنعا يە بولعان.

ابزال اجىعاليەۆ جۋىردا ءوزى اينالىساتىن سپورت سالاسىنداعى از-كەم كەم-كەتىكتەر تۋرالى اشىپ ايتىپ، جازبا جاريالاپتى. ءبىز اتالعان جازبانى وقىرمان تالقىسىنا ۇسىنعاندى ءجون سانادىق.

مەنى قولداعان جانە وليمپيادادا بىزگە شىن جۇرەكتەن جانكۇيەر بولىپ، الاڭداعاندارعا تاعى دا شەكسىز العىس ايتامىن. ءدال وسى ماسەلە قازىر وزەكتى بولىپ تۇرعاندا مۇمكىندىكتى پايدالانىپ، شورت-ترەكتى مىسالعا الا وتىرىپ، ءبىزدىڭ سپورتشىلارىمىزدىڭ وليمپياداعا دەيىن قانداي كەدەرگىلەرگە تاپ بولاتىنىن ايتقىم كەلەدى.

1. مۇز ايدىنى. «الاۋ» قازىر شورت-ترەكشىلەردىڭ جاتتىعۋىنا ساي كەلەتىن قازاقستانداعى جالعىز مۇز ايدىنى. بىراق، بىزگە وندا تۇراقتى دايىندالۋعا مۇمكىندىك بەرىلمەيدى. ءبىز سوندىقتان امال جوق، ەۋروپاعا نەمەسە رەسەيگە جاتتىعۋعا شىعامىز. «الاۋدا» بارلىعى «يدەالنو» بولعانىمەن، ول ۇلتتىق قۇراماعا ارنالماعان. بىزگە كەمىندە، كۇن سايىن تاڭەرتەڭ جانە كەشكە، ەكى ساعاتتان جاتتىعۋ كەرەك. بىراق، مۇز سارايى جەكەمەنشىك بولعاندىقتان بارلىعى اقشاعا كەلىپ تىرەلەدى. ال ۇلتتىق قۇرامالاردا ونداي اقشا جوق. بىزگە وندا ارنايى ورىن قاراستىرىلماعان. ءتىپتى، جاتتىعۋ كەزىندە زاتتارىمىزدى تاستاپ كەتەتىن ارنايى كيىم اۋىستىراتىن جەر دە تابىلمايدى. بەيجىڭ وليمپياداسىنىڭ الدىندا ءبىز «الاۋدا» دايىندالدىق. بىراق، بىزگە مۇز وليمپيادا الدىندا عانا ەمەس، ۇنەمى كەرەك.

ايتپاقشى، مۇز تەك ۇلتتىق قۇراماعا عانا ەمەس، جاستار مەن جاسوسپىرىمدەرگە دە قاراستىرىلماعان. ناقتى ءبىزدىڭ سپورتىمىز ءۇشىن باستى پروبلەما وسى. بارلىعى مەدال سۇرايدى. ال بىزدە ءتىپتى، قىسقى سپورت تۇرلەرىنە ارنالعان بازا جوق. ال جانكۇيەرلەر مۇنداي سپورتتىڭ بارىنان ءتىپتى، حابارسىز.

2. ءار وڭىردە مۇز سارايلارى سالىنعان. بىراق، ولاردىڭ ەشقايسىسى شورت-ترەكشىلەردىڭ جاتتىعۋىنا جارامايدى. ءتىپتى، الماتىداعى دا. ماتتىڭ ورنىنا بارلىق جەرگە بورت ورنالاستىرىلعان. مۇندايدا جاراقات الىپ قالۋ قاۋىپى وتە جوعارى. الماتىنىڭ مۇز الاڭدارىنداعى جاعداي دا «الاۋداعىداي». بوس ۋاقىت جوق، اقشا جوق…

3. بىزگە كەرەكتى قۇرال جابدىقتاردى تەك زاڭدا رۇقسات ەتىلگەن شامادا عانا الىپ بەرەدى. ينۆەنتار الۋ - ءبىز ءۇشىن مۇزدان كەيىنگى ۇلكەن ماسەلە دەپ ايتار ەدىم. ءدال وسىنداي پروبلەماعا توكيونىڭ الدىندا ساداقشىلار دا تاپ بولدى. وسى پروبلەما بارلىق سپورتشىنىڭ باسىنان وتەدى جانە سپورتشىلار ءاردايىم وسىنى ايتىپ كەلەمىز. بىراق، وعان مينيسترلىك نەمەسە باسقارمالار ءمان بەرىپ وتىرعان جوق. كوڭىل اۋدارسا دا، تەك وليمپيادانىڭ الدىندا ەسىنە الادى. كاسىبي سپورتقا تەك وليمپيادا كەزىندە ەمەس، ۇنەمى، تۇراقتى نازار اۋدارىپ، جۇمىس ىستەپ وتىرۋ كەرەك. ءبىزدىڭ سپورت ءۇشىن ۆەلوجاتتىعۋلار وتە ماڭىزدى. وعان ۆەلوستانوك، ۆەلوسيپەد، كونكيىمىزدى قارايتىن گەيچ پەن كۇش ولشەيتىن تەحنيكالار كەرەك. بارلىق ەلدىڭ كوماندالارى اتالعان زاتتارمەن تولىق قامتاماسىز ەتىلگەن. ءبىز ولاردى ونسىز دا جەڭىپ ءجۇرمىز. بىراق، بىزگە بەرىلگەن ۋادە، ۋادە كۇيىندە قالىپ وتىر. ءاردايىم اڭگىمە ينۆەنتارعا كەلىپ تىرەلگەندە «گوسزاكۋپتىڭ» پروتسەستەرىنە بايلانىستى كەشىكتىرىلىپ جاتىر» دەپ، سىلتاۋراتادى. حالىقارالىق جاتتىعۋلار ءبىزدىڭ جابدىقتارىمىز جوق دەپ توقتاپ تۇرمايدى عوي. ناتيجەسىندە ءبىزدىڭ مەحانيكتەر ءوز قالتالارىنان اقشا شىعارىپ، كونكيگە ارنالعان «زاپچاستاردى» ساتىپ اپەرەدى. نەمەسە «زاڭدا رۇقسات ەتىلمەگەن» دەپ ايتقان سوڭ، كەيبىر قۇرالداردى ءوز اقشامىزعا جيناپ الۋىمىزعا تۋرا كەلەدى. سەبەبى، ءبىز ينۆەنتار جوق نەمەسە جەتپەيدى دەپ جارىسقا قاتىسپاي قويا المايمىز. ءبىزدىڭ جارىستار تەندەر قاشان وتەتىنىن كۇتىپ وتىرمايدى. بۇل تەك بيىل ەمەس، جىلدا قايتالاناتىن نارسە.

4. ماعان وبلىستىق سپورت باسقارماسى وسىعان دەيىن بىرنەشە رەت «ۆەلوسيپەدتى الىپ بەرەمىز» دەپ ۋادە بەردى. قازىر ەندى سۇراسام: «تىم قىمبات»، - دەيدى. ەڭ بولماسا ستانوك الىپ بەرۋلەرىن سۇرادىم. سپونسورلارعا وسى ءوتىنىشىمدى ايتىپ كورىپ ەدىم، ول دا جاۋاپسىز قالدى. بىزدە «سپورتتى دامىتۋ كەرەك» دەپ كوپ ايتادى. بىراق، انا جولى ايتقانىمداي، قىسقى سپورت ۇنەمى جازعى سپورتتىڭ تاساسىندا قالىپ قالادى. قىسقى سپورت ەشكىمگە قىزىق ەمەس. جاعداي تەك ءوزىم ءۇشىن جاقسارسىن دەپ ەمەس، جالپى جاستار دا بۇل سپورتپەن اينالىسسا، وسى سپورتتىڭ ەلىمىزدەگى بولاشاعىنىڭ بار ەكەنىن كورسەتكىم كەلەدى.

5. جالپى شورت-ترەك تۋرالى كوپ ادام بىلە بەرمەيدى، كوپ جازىلمايدى. وسى سپورتىمىزدى وليمپيادا كەزىندە عانا ەمەس، جالپى، بارلىق كەزدە بىلسە ەكەن دەيسىڭ.

بىلەسىز بە، شورت-ترەكتى تۇسىنەتىندەر از. ال قازىر كوبى وليمپيادا ويىندارىن كورىپ، بۇل سپورت تۇرىمەن تانىسقاندارىن جازىپ جاتىر. بىراق، ءبىز كوپ جىلدار بويى الەم كۋبوگتارىنا قاتىسىپ، الەمنىڭ ۇزدىك وندىعىنا كىرىپ كەلەمىز. وليمپيادا چەمپيوندارىمەن بىردەي جۇگىرىپ، ولاردى وزىپ تا ءجۇرمىز. جەڭەمىز. بىراق، مەدال العان كەزدە ەشقانداي قولداۋ بولمايدى، كىشكەنە بولسا دا وسى ماسەلەگە نازار اۋدارىلىپ، سىياقى تاعايىندالسا. بۇل دا زاڭ بويىنشا قاراستىرىلماعان. ال سپورتشىلاردىڭ جالاقىسى، ايلىعى قازاقستانداعى ورتاشا جالاقىعا جەتە بەرمەيدى. جەڭىسكە جەتكەندە ەل نامىسىن قورعايمىز، بىراق، ونىڭ جەمىسى رەتىندە نازار دا اۋدارىلمايدى. بىزدە باسقا ەلدەردەگىدەي دەمەۋشىلىك جوق، تەك مەملەكەتكە عانا سەنەمىز. وسىلاي ايتقانىم دۇرىس پا، جوق پا بىلمەدىم. بىراق، وليمپيادادان باسقا كەزدە ەشكىمگە كەرەك ەمەس سپورتتان قالاي ناتيجە كۇتۋگە، سۇراۋعا، تالاپ ەتۋگە بولادى؟

6. 2018 جىلعى وليمپيادادان كەيىن جاراقات الىپ، ۇزاق ۋاقىت دەنساۋلىعىمدا پروبلەما بولدى. وسى ۋاقىتتا قۇرامادان شەتتەتىلدىم، ءوز قاراجاتىما ەمدەلدىم. بىزدە جاراقات الساڭ ەشكىمگە كەرەك ەمەسسىڭ. ال كاسىبي سپورتتا، وندا دا، ءبىزدىڭ سپورتتا جاراقات كوپ كەزدەسەدى. ءوزىڭدى، ءومىرىڭدى سپورتقا ارناپ، وسىنداي جاعدايعا تاپ بولعاندا سوڭىندا جالعىز قالاسىڭ.

7. قازىر وليمپيادا ءبىتتى. يا، بىلەمىن، ەشكىم ناتيەسىنە ءماز ەمەس. ءبىزدىڭ كىشكەنتاي كوماندامىز ءۇشىن بۇل وتە ۇلكەن جانە تاريحي كورسەتكىش ەدى. كەلەسى وليمپيادادا ناتيجە جوعارى بولۋى ءۇشىن قازىردەن باستاپ قيمىلداۋ كەرەك. بىزدەگىدەي وليمپياداعا جارتى جىل قالعاندا ەمەس. بىزدە جازعى سپورتقا نازار كوپ اۋدارىلعان سوڭ، تالاپ تا جوعارى. سوڭىندا ءبارى، جانكۇيەرلەر دە قىسقى سپورتتان دا كەلىپ سونداي ناتيجە كۇتەدى.

مەنىڭ ەڭ ۇلكەن ارمانىم - ەلىمىزدىڭ كوك بايراعىن الەمدىك ارەنالاردا جەلبىرەتۋ، اۋىلداعى بالالاردىڭ بارلىعى بىردەي سپورتپەن اينالىسا السا، ولار دا تاڭداۋ جاساي السا، قازاقستاندا سپورتشىنىڭ، سپورتشى بولۋدىڭ مارتەبەسىن بىلسە جانە ونىڭ قانداي ەڭبەك ەكەنىن بىلسە.

قازىر بىزدە ەگەر سەندە مەدال بولسا، سەنى جاقسى كورەدى. سوسىن بارىپ ساعان جاعداي جاسايدى. بىراق، مەدال بولۋى ءۇشىن ءبىرىنشى جاعداي جاسالۋى كەرەك قوي. بازادان باستاپ، قاراپايىم كۇندەلىكتى جاتتىعۋ دا وسى جاعدايعا كىرەدى.

ءسوز سوڭىندا مەن ءوز كومانداما، جاتتىقتىرۋشىلارىما كوپ راحمەت ايتقىم كەلەدى. ءبىز مۇنىمەن توقتاپ قالمايمىز. وسى ۋاقىتقا دەيىن تالاي قيىندىقتى ەڭسەرىپ، مويىمادىق. ءارى قاراي دا بيىك بەلەستى باعىندىرۋعا بارىمىزدى سالامىز. جاقسى ناتيجەگە قول جەتكىزۋ ءۇشىن ايانبايمىز. ءبىزدى ۇنەمى قولداپ، جاناشىر بولىپ وتىرعان ارقايسىسىڭىزعا العىس.

ەلىمىزدەگى سپورتتى وسىرەتىن دە، وشىرەتىن دە ءوزىمىز. سوندىقتان مەنىڭ وسى ايتقاندارىم ءتيىستى جەرگە جەتەدى دەپ ويلايمىن.

ابزال اجىعاليەۆ

Abai.kz