كەشە «قاڭتار كوتەرىلىسىنە» قاتىستى العاشقى سوت ۇكىمى شىققانىن، جەرگىلىكتى باق جازدى. الماتى قالاسى، الماتى اۋداندىق سوتى الماتى وبلىسى ەڭبەكشىقازاق اۋدانى ەسىك قالاسىنىڭ تۇرعىندارى – باقىت وڭتاي مەن وجەت جەڭىسحانعا قاتىستى شەشىم شىعارىپ، 5 جىلعا سوتتادى. ەندى بۇل ەكى ازامات جازالارىن قاۋىپسىزدىگى ورتاشا رەجيمدەگى تۇزەۋ مەكەمەسىندە وتەيتىن بولادى.

سوتتالعان ەكى ازاماتتىڭ ەكەۋى دە 1999 جىلى تۋعان، 22 جاستاعى جىگىتتەر.

«ازاتتىقتىڭ» اقپاراتىنشا، باقىت وڭتاي مەن وجەت جەڭىسحاننىڭ ىستەرى بويىنشا تەرگەۋ 26 قاڭتاردا اياقتالىپ، قىلمىستىق ءىس 1 اقپاندا سوتقا تۇسكەن. ال سوت ۇكىمى 17 اقپاندا شىققان. ولارعا قىلمىستىق كودەكستىڭ 291 بابى 3 بولىگى بويىنشا («قارۋدى، وق-دارىلەردi, جارىلعىش زاتتار مەن جارىلىس قۇرىلعىلارىن جىمقىرۋ نە قورقىتىپ الۋ») ايىپ تاعىلعان.

كەشە قاڭتارداعى بەيبىت شەرۋگە قاتىسقان وجەت جەڭىسحاننىڭ اكەسى پرەزيدەنت قاسىم-جومارت توقاەۆتان ءوز ۇلىنا اراشا سۇراپ، ۇندەۋ جاريالادى.

«مەنىڭ اتى ءجونىم جەڭىسحان اكرامۇلى. الماتى قالاسى 18-تەرگەۋ اباقتىسىندا جاتقان جەڭىسحان وجەتتىڭ اكەسىمىن.

مەنىڭ ۇلىم تەرروريست ەمەس! ەشقانداي ۇيىمعا، باسقا دا قىلمىسقا قاتىسى جوق! الاڭعا ءوز كوزقاراسىن ءبىلدىرۋ ءۇشىن بەيبىت شەرۋگە شىققان بولاتىن. سول كەزدە بىرەۋلەر قورقىتىپ، قارۋ كەزەپ، قولىنا قارۋ ۇستاتقان. ول قارۋدان ەشقانداي وق اتىلماعان.

قاسىم-جومارت كەمەلۇلى! ءبىز سىزدەن وسى بالاعا اراشا ءتۇسۋىڭىزدى سۇرايمىز! جاقىندا ءوزىڭىز سۇحبات بەرگەنىڭىزدە «جاڭا قازاقستان»، «ادىلەتتى قازاقستان» قۇرۋ جونىندە ايتقان ەدىڭىز. ءبىزدىڭ بالامىزعا ادىلەتسىز ۇكىم شىعارىلىپ وتىر. ءبىزدىڭ بالامىزعا ادىلەتتى شەشىم تاعايىنداپ، سوتتىڭ ادىلەتتى ۇكىم شىعارۋىن قالايمىز»، - دەيدى وجەتتىڭ اكەسى.

Abai.kz