رەسەي اسكەرى ۋكرايناعا باسىپ كىردى. ءبىر كۇن ىشىندە الەم ەلدەرى دە، ۋكراينا دا، ءتىپتى رەسەي دە ۇلكەن وزگەرىسكە ۇشىرادى.

رەسەي باسشىسى ءپۋتيننىڭ ۇندەۋىنەن كەيىن، رەسەي اسكەرى ۋكراينا اۋماعىنا شابۋىل جاسادى. ۋكراينا ۋاقىتى بويىنشا تاڭعى ساعات 05:00-دە ماسكەۋ زىمىراندارمەن ۋكراينانىڭ اسكەري قويمالارىن، اۋەجايلار مەن اسكەري بەكەتتەردى اتقىلادى.

كيەۆ قورعانىسقا كوشتى. رەسەي اسكەرى ءتورت باعىتتان سوققى جاسادى. شىعىسىندا باسقىنشىلار قولىنداعى لۋگانسك پەن دونەتسك سودىرلارى مەن رەسەي اسكەرى ۋكراينا اسكەري بەكەتتەرىن بىرلەسە ارتيللەريالىق سوققى استىنا الدى. وڭتۇستىك باعىتتا باسقىنشى قولىنداعى قىرىمنان رەسەي اسكەرى شابۋىلعا شىقتى، ال قارا تەڭىزدەگى رەسەي فلوتى ۋكراينا پورتتارىنا سوققى بەردى. سولتۇستىك باعىتتا بەلارۋس اۋماعىنان رەسەي ۇشاقتارى مەن تىكۇشاقتارى ۋكراينا اۋماعىنا كىرسە، باتىستا سەپاراتيستىك پريدنەستروۆە زىمىرانمەن كيەۆ ماڭىن اتقىلادى. ءبىر ساتتە ۋكراينانىڭ كوپتەگەن قالالارى وق پەن وتتىڭ استىندا قالدى. ۋكراينا اسكەرى ەسىن تەز جيىپ، قارسى سوققى جاساۋعا جانە قورعانىستى ءتيىمدى ەتۋ تاسىلدەرىنە كوشتى.

العاشقى كۇنى رەسەي اسكەرى حاركوۆ ماڭىندا ۇلكەن شىعىنعا ۇشىراپ، شەگىنۋگە ءماجبۇر بولدى. كيەۆ وبلىسى ءۇشىن شايقاس بولىپ جاتىر. گوستومەل مەن سۋمى قالاسى ءۇشىن قيان-كەسكى شايقاستار جالعاسۋدا. رەسەي اسكەرى كيەۆكە زىمىران سوققىلارىن جاسادى. پەنتاگوننىڭ مالىمەتى بويىنشا ءبىر كۇننىڭ ىشىندە ۋكراينا جەرىنە 160 زىمىران اتىلعان.

زەلەنسكي جاپپاي موبيليزاتسيا جاريالادى. جاڭا ەرەجە بويىنشا قولىنا قارۋ ۇستاي الاتىن 18-60 جاس ارالىعىنداعى ەرلەردىڭ بارلىعى دەرلىك سوعىسقا قاتىسۋى مۇمكىن. ولاردىڭ ەلدەن شىعۋىنا تىيىم سالىنعان.

سوعىس شىعىنىنا قاتىستى العاشقى مالىمەتتەر پايدا بولدى. ۋكراينا 137 ساربازىنان ايىرىلدى. 316 سارباز اۋىر جارالانعان. رەسەي اسكەرىنىڭ دە شىعىنى وراسان. ۋكراينا قورعانىس مينيسترلىگىنىڭ مالىمەتىنشە رەسەي ءبىر كۇننىڭ ىشىندە 30 تانك، 130 بروندالعان كولىك، 6 تىكۇشاق پەن 5 ۇشاعىنان ايىرىلعان. ادامي شىعىنى 450-800 اراسىندا.

رەسەي اگرەسسياسىنا قارسى الەم بىرلەسە ءۇن قاتۋدا. ءتىپتى رەسەيدىڭ وزىندە دە سوعىسقا قارسى شەرۋلەر ءوتىپ جاتىر. رەسەيدىڭ 24 قالاسىندا وتكەن شەرۋلەردە 1800 ادام ۇستالعان.

ەۋروپا ەلدەرى مەن اقش ۋكرايناعا اسكەري كومەك كورسەتۋ، قارجىلاي دەمەۋشىلىك جاساۋ جانە رەسەيدى ەكونوميكالىق تۇرعىدان قىسپاققا الۋ جاعىن ىسكە اسىرۋدا. ۋكرايناعا كومەك رەتىندە پولشا 1 ملرد دوللار، ال فرانتسيا 1,2 ملرد ەۋرو قارجى بەرمەك. سونىمەن قاتار اسكەري كومەك رەتىندە قارۋ-جاراق تا جەتكىزىلەتىن بولادى.

اقش، ۇلىبريتانيا، ەو ەلدەرى رەسەيگە اۋىر سانكتسيالار سالدى. اقش رەسەي بانكتەرىنىڭ 70 پايىزىنا سانكتسيا سالىپ، رەسەيدى جوعارى تەحنولوگيا يەمدەنۋ قۇقىعىنان ايىردى. سونىمەن بىرگە كەمە جاساۋ تەحنولوگيالارىن بەرمەيتىن بولدى. عارىش كەڭىستىگىن بىرلەسە يگەرۋ جوباسىنان ايىردى. ۇلىبريتانيا دا اقش سانكتسيالارىن قولداپ، وزىندىك سانكتسيالار ەنگىزدى. سانكتسيا وڭتۇستىك كورەيا مەن جاپونيا دا سالۋ مۇمكىندىگىن قاراستىرىپ جاتىر. بايدەننىڭ سوزىنشە «رەسەيگە قارسى الەمنىڭ ۇشتەن ءبىر بولىگى بىرلەسكەن سانكتسيا ەنگىزۋدى قاراستىرۋدا». بوريس دجونسون رەسەي ەكونوميكاسىن قۇلدىراتپاي تىنبايتىنىن ايتتى.

ال رەسەي بۇگىن ۋكرايناعا شابۋىلىن ۇدەتتى. ءداپ قازىرگى ساتتە كيەۆتى زىمىرانمەن اتقىلاپ جاتىر.

Abai.kz