«بۇل حاتتى مەن قىلمىستىق ءىس جابىلعاننان كەيىن ەمەس، كەرىسىنشە ءدال قازىر تەرگەۋ امالدارى باستالعان ۋاقىتتا سىزدەردىڭ گازەتتەرىڭىز ارقىلى جالپاق جۇرتقا جاريالاۋدى ءجون كورىپ وتىرمىن...»، - دەپ جازادى جەڭ ۇشىمەن جالعاسقان قۇقىق قورعاۋ ورىندارىنىڭ زاڭسىز ارەكەتتەرىنە ءىشى ۋداي اشىعان جابىرلەنۋشى ورازكۇل سۇلەيمەن. جەمقورلىق پەن قىلمىس جايلاعان مىنا قوعامنان ادىلدىك ساۋلەسىن ىزدەپ سوتپەن دە، وتپەن دە ارپالىسقا تۇسكەن «قازاقستان» وقىرمانىنىڭ باستان كەشكەن قىلمىستىق دەتەكتيۆكە بەرگىسىز وقيعالارى ەلدەگى شەن تاعىپ شىرەنگەن قۇزىرلىلاردىڭ قاراپايىم حالىقتى شاققان شىبىن قۇرلى كورمەيتىندىگىن، زاڭعا باعىنباي جۇگەن-قۇرىقسىز بەت-بەتىمەن كەتكەندىگىن اڭعارتادى. ال ەندى سوناۋ قاراعاندى وبلىسى ساتپاەۆ قالاسىنان ات شالدىرىپ جەتكەن ءۇشبۋ حاتتاعى ايتىلعان اڭگىمەگە قىسقاشا توقتالايىق.

ىشكى ىستەر مينيسترلىگىنىڭ قۇرامىنا كىرەتىن مامانداندىرىلعان كۇزەت باسقارماسىندا كۇزەتشى («قازاقمىس» كورپوراتسياسىنىڭ جەزقازعان مەن ساتپاەۆ قالالارىنداعى مۇلىكتەرىن كۇزەتەدى) بولىپ قىزمەت ەتەتىن ورازكۇل سۇلەيمەن 2008 جىلدىڭ 15-ءشى شىلدەسىندە كەزەكتى اۋىسىمنان شىققان سوڭ، ادەتتەگىدەي قالادان 40 شاقىرىم جەردەگى ۇلىتاۋ اۋدانىنا قاراستى جەزدى اۋىلىندا تۇراتىن قارت اناسىنا كومەكتەسۋگە بارعان. اۋىلدىڭ تىرلىگى بەلگىلى عوي، مال-جان، قورا-قوپسى، جەم-ءشوپ دەگەندەي تاۋسىلىپ بەرمەيتىن شارۋالار.

«بۇل حاتتى مەن قىلمىستىق ءىس جابىلعاننان كەيىن ەمەس، كەرىسىنشە ءدال قازىر تەرگەۋ امالدارى باستالعان ۋاقىتتا سىزدەردىڭ گازەتتەرىڭىز ارقىلى جالپاق جۇرتقا جاريالاۋدى ءجون كورىپ وتىرمىن...»، - دەپ جازادى جەڭ ۇشىمەن جالعاسقان قۇقىق قورعاۋ ورىندارىنىڭ زاڭسىز ارەكەتتەرىنە ءىشى ۋداي اشىعان جابىرلەنۋشى ورازكۇل سۇلەيمەن. جەمقورلىق پەن قىلمىس جايلاعان مىنا قوعامنان ادىلدىك ساۋلەسىن ىزدەپ سوتپەن دە، وتپەن دە ارپالىسقا تۇسكەن «قازاقستان» وقىرمانىنىڭ باستان كەشكەن قىلمىستىق دەتەكتيۆكە بەرگىسىز وقيعالارى ەلدەگى شەن تاعىپ شىرەنگەن قۇزىرلىلاردىڭ قاراپايىم حالىقتى شاققان شىبىن قۇرلى كورمەيتىندىگىن، زاڭعا باعىنباي جۇگەن-قۇرىقسىز بەت-بەتىمەن كەتكەندىگىن اڭعارتادى. ال ەندى سوناۋ قاراعاندى وبلىسى ساتپاەۆ قالاسىنان ات شالدىرىپ جەتكەن ءۇشبۋ حاتتاعى ايتىلعان اڭگىمەگە قىسقاشا توقتالايىق.

ىشكى ىستەر مينيسترلىگىنىڭ قۇرامىنا كىرەتىن مامانداندىرىلعان كۇزەت باسقارماسىندا كۇزەتشى («قازاقمىس» كورپوراتسياسىنىڭ جەزقازعان مەن ساتپاەۆ قالالارىنداعى مۇلىكتەرىن كۇزەتەدى) بولىپ قىزمەت ەتەتىن ورازكۇل سۇلەيمەن 2008 جىلدىڭ 15-ءشى شىلدەسىندە كەزەكتى اۋىسىمنان شىققان سوڭ، ادەتتەگىدەي قالادان 40 شاقىرىم جەردەگى ۇلىتاۋ اۋدانىنا قاراستى جەزدى اۋىلىندا تۇراتىن قارت اناسىنا كومەكتەسۋگە بارعان. اۋىلدىڭ تىرلىگى بەلگىلى عوي، مال-جان، قورا-قوپسى، جەم-ءشوپ دەگەندەي تاۋسىلىپ بەرمەيتىن شارۋالار.

اۋىل سىرتىنداعى قىرعا قوزى-لاقتاردى جايىلىمعا ايداپ سالىپ، ۇيگە قايتىپ كەلە جاتقان ورازكۇلدىڭ الدىنان مينسك موتوتسيكلىنە مىڭگەسكەن سول اۋىلدا تۇراتىن دۇزباەۆتار وتباسىنىڭ اعايىندى ەكى بالاسى جولىعادى. ەرىگىپ جۇرگەن ەكەۋ كەيىپكەرىمىزدىڭ قۇتجول دەگەن ءيتىن ىزالاندىرىپ، قايتا-قايتا مازاسىن الادى. قانى قايناپ كەتكەن يت موتوتسيكلدىڭ سوڭىنان ارسىلداپ جۇگىرىپ، ارتىندا وتىرعان كىشى دۇزباەۆتىڭ اياق-كيىمىن تىستەپ شەشىپ تاستايدى. ولار دەرەۋ توقتاي قالىپ ءيتتىڭ ارتىنان ايقايلاپ قۋا جونەلگەن، ول ازداي «مىنا يتىڭە نەگە يە بولمايسىڭ...» دەپ اۋزىنا كەلگەنىن ايتىپ بالاعاتقا باسقان. جەردە جاتقان بوتەلكەنىڭ سىنىعىن قولىنا الىپ قارسى ۇمتىلعان. يەسىنە قاۋىپ تونگەنىن كورگەن قۇتجول دۇزباەۆتىڭ ۇلكەنىن شالبارىنىڭ بالاعىنان تىستەپ قۇلاتقان. الايدا، جەردە قۇلاپ جاتىپ نەشە ءتۇرلى بوقتىق سوزدەردى قارداي بوراتقان ول، ورازكۇلگە وڭدىرمايتىندىعىن ايتىپ قوقان-لوققى جاسايدى. ايتقانداي-اق، كەشكە قاراي قىرداعى قوزى-لاقتارىن ۇيگە ايداپ كەلۋگە شىققان ورازكۇلدى اۋىلدان 300 مەتردەي جەردە «ميتسۋبيسي» ماشينەسىنە مىنگەن اعايىندى دۇزباەۆتار مەن ولاردىڭ اناسى اينامكۇل مۇقىشەۆا قارسى الادى دا، سول ارادا سوققىعا جىعادى. ادۋىندا اينامكۇل ونىڭ كەۋدەسىنەن باسىپ وتىرىپ الىپ، القىمىنان الا تۇسسە، ۇلكەن ۇلى باس-اياقتان ساۋ-تامتىق قالدىرماي تەپكىلەي جونەلەدى. يەسىنىڭ ومىرىنە قاۋىپ تونگەنىن سەزىپ تاعى دا كومەككە كەلگەن قۇتجول بولماعاندا، اراشالاۋعا تىرىسقان ورازكۇلدىڭ اپاسى ءسابيرا مەن جيەنى ءمولدىردىڭ شاماسى بويىنا «جىن بيلەگەن» مۇقىشەۆانى توقتاتۋعا كەلمەي جاتقان. ءابۇيىر بولعاندا يتتەن سەسكەنگەن ولار دەرەۋ ماشينەلەرىنە وتىرىپ تايىپ تۇرعان. ناتيجەسىندە، قاتتى قىلعىندىرۋدىڭ سالدارىنان ورازكۇلدىڭ كەڭىردەك شەمىرشەكتەرى سىنىپ، داۋىسى شىقپاي قالادى. ونە-بويى كوكالا قويداي بوپ جارالانادى.

«جەرگىلىكتى جەردەگى ايماقتىق پوليتسيا قىزمەتكەرىمەن ايتىسىپ ءجۇرىپ سوت مەديتسيتسينالىق ساراپتاما (سۋدمەدەكسپەرتيزا) قاۋلىسىن شىعارتقىزدىم، 16.07. 2008 ج. مەديتسينالىق ساراپشى مامانعا جاراقاتتارىمدى كورسەتىپ، ستاتسيونارعا ەمدەلۋگە قاعاز الدىم. 17.07. 2008 ج. ستاتسيونارلىق ەم الۋعا بارا جاتقاندا تىنىس الۋىم مۇلدەم ناشارلاپ، جەدەل جاردەممەن جانساقتاۋ بولىمىنە ءتۇستىم...»، - دەپ باياندايدى كەيىپكەرىمىز بۇل جايدى.

ورازكۇلدىڭ ايتۋىنشا، جانساقتاۋ بولىمىندە ەم قابىلداپ جاتقان ونى مۇقىشەۆا تانىس دارىگەرلەر ارقىلى «20 كۇننەن ارتىق جاتۋعا بولمايدى» دەپ، وتىرىك داۋىسىن شىعارماي ءجۇر دەگەن جەلەۋمەن كەڭىردەگىنىڭ سىنعانىن رەنتگەنگە دە تۇسىرتكىزبەي 05.08. 2008 ج. تۇرعىلىقتى جەردەگى تىركەۋ بويىنشا امبۋلاتوريالىق ەمدەلۋگە جىبەرەدى. ءبىر قىزىعى سول كۇنى امبۋلاتوريالىق ەم الۋعا ساتپاەۆ قالاسىنىڭ اۋرۋحاناسىنا باراعاندا، ونداعى دارىگەرلەر ەرجانوۆ پەن بوندارچۋك ناۋقاستى دەرەۋ رەنتگەنگە ءتۇسىرىپ، باس سۇيەككە قاتتى سوققى تيۋ سالدارىنان ميدىڭ زاقىمدانعاندىعىن، كەڭىردەكتەگى ساقينا ءتارىزدى شەمىرشەكتەردىڭ سىنعاندىعىن، وڭەشتىڭ وڭ جاق بۇلشىق ەتتەرىنىڭ جانسىزدانىپ قالعاندىعىن سول سەبەپتى داۋىس شىقپاي تۇرعانىن (افونيا) كورسەتىپ دياگنوز قويادى. جانە قايتادان ستاتسيونارعا جاتىپ ەم الۋعا جىبەرەدى، الايدا بۇدان ەش ناتيجە شىقپاعان سوڭ، جولدامامەن قاراعاندى وبلىستىق دياگنوستيكالىق ورتالىعىنا جىبەرەدى. دياگنوستيكالىق ورتالىقتىڭ ماماندارى باتپاەۆ پەن اعاجانوۆا سىرقاتتى جانە ءبىر مارتە رەنتگەنگە تۇسىرەدى. قويىلعان دياگنوز - «پوستتراۆماتيكالىق افونيا». دارىگەرلەر مەملەكەتتىك تاپسىرىس دەگەن جەردىڭ استىن سىزىپ تۇرىپ كورسەتىپ، وبلىستىق لور بولىمىنە ستاتسيونارلىق ەمدەلۋگە جىبەرەدى. الايدا، ونداعى دارىگەرلەر «بوس ورىن جوق» دەپ سىلتاۋراتىپ ورازكۇلدى قابىلداماي قويعان. امالسىزدان ول ساتپاەۆ قالاسىنداعى مەديتسينالىق سانيتارلىق بولىمگە قايتادان ەم قابىلداۋعا جاتادى، بىراق مۇندا ونىڭ ساۋىعىپ كەتۋىنە مۇمكىندىك بولماعاندىقتان، جوعارىداعى دارىگەر بوندارچۋك تاعى دا جولداما جازىپ بەرىپ، قاراعاندى وبلىستىق دياگنوستيكالىق ورتالىققا جىبەرەدى. سودان، ايتەۋىر ەكىنشى رەت جولداما قاعازبەن كەلىپ تۇرعان ورازكۇلدى قابىلداماۋعا قورىققان لور ماماندارى سىرقاتتى 2008 جىلدىڭ 22-ءشى قىركۇيەگىنەن 7-ءشى قازانىنا دەيىن ستاتسيونارلىق ەمدەۋگە الادى. ەسەسىنە، لور-دىڭ اق حالاتتى ابزال جاندارى دوسقاليەۆا مەن قۇزباەۆا بۇعان دەيىنگى دارىگەرلەر ەرجانوۆ پەن بوندارچۋك، باتپاەۆ پەن اعاجانوۆالاردىڭ تۇسىرگەن رەنتگەن سۋرەتتەرىن، قويعان دياگنوزدارىن وزگەرتىپ جىبەرگەن. كەڭىردەكتىڭ سىنعانىن دالەلدەيتىن سۋرەتتىڭ كوزىن قۇرتىپ، «پوستراۆماتيكالىق لارينگيت. فۋنكتسيونالدى افونيا» دەپ شىندىقتى بۇرمالاپ دياگنوز جاساعان. نەگە دەيسىز عوي، ايتايىق، ويتكەنى ولار الگى مۇقىشەۆا دەگەن ايەلدىڭ تانىستارى ەكەن.

مۇقىشەۆانىڭ مۇنىسى قالاي؟

«بايتال تۇگىل باس قايعى» دەمەكشى، تاياققا جىعىلعان سۇلەيمەن مىرزا سىرقىراتىپ اكەتىپ بارا جاتقان سىرقاتىن ەمدەۋدەن باسقا ەشتەڭەنى ويلاماي اۋرۋحانادا جاتقاندا، مىنا جاقتا وزدەرى جاساعان قىلمىستارىنىڭ ورنىن جۋىپ-شايۋ ءۇشىن مۇقىشەۆاڭىز ءارتۇرلى زاڭسىزدىقتارعا بارعان سياقتى. حاتتاعى جازىلعان جايعا جۇگىنسەك، پىسىقاي ايەل ءىستى تەرگەۋگە جىبەرمەي اكىمشىلىك زاڭ بۇزۋشىلىققا بالاپ، ەكى جاقتىڭ دا ايىپتارىن 50-دە 50-گە تەڭەستىرۋگە تىرىسقان.

«مۇقىشەۆا ايماقتىق پوليتسيا قىزمەتكەرى مىرزاباەۆتى اۋرۋحاناعا جىبەرىپ، «ماعان تەرگەۋشى كەلسىن» دەپ جازعان ارىزىمدى قابىلداتتىرماي، «ولار ارىزدى سوتقا جازىپتى، سەن دە سولاي ەتەسىڭ، كەرەك بولسا سوت جاپاروۆا تەرگەۋشى جىبەرەدى» دەپ قويار دا قويماي مەنىڭ قولىمنان سوتقا ارىز جازدىرىپ اكەتتى»، - دەيدى ورازكۇل.

سونىمەن قاتار، جابىرلەنۋشى ازاماتتىڭ جازعان حاتى بويىنشا، ناۋقاستىڭ ناقتى دياگنوزى انىقتالماي جاتىپ مۇقىشەۆا ءوزىنىڭ تامىر-تانىستارى ارقىلى سوت مەديتسينالىق ساراپتاما قىزمەتكەرلەرىمەن كەلىسىپ، 20.07. 2008 ج. «جەڭىل دەنە جاراقاتى» دەگەن قورىتىندى شىعارىپ الادى دا، سوت جاپاروۆا مەن مۇقىشەۆا ءىستى «اكىمشىلىك زاڭ بۇزۋشىلىق» دەپ وتكىزىپ جىبەرمەك بولعان. بىراق، ارام نەيتتى ادامداردىڭ بۇل ويى ىسكە اسپاي قالسا كەرەك، سەبەبى ورازكۇلدى قابىلداعان دارىگەرلەر بوندارچۋك پەن ەرجانوۆ بارلىق دياگنوزدى قويىپ، ناۋقاستى ستاتسيونارلىق ەمگە جاتقىزۋعا جىبەرگەن.

ايتا كەتەتىن ءبىر جايت، ءبىزدىڭ كەيىپكەرىمىزدىڭ سوزىنە قاراعاندا، ونىڭ ءىنىسى جۇمىس بابىمەن سوت مەكەمەسىنە بارىپ جۇرگەندە دەمالىسقا كەتكەلى جاتقان سوت توراعاسى بەيسەنباەۆتىڭ جاپاروۆاعا: «انا ايەلدىڭ، مۇقىشەۆانىڭ ۇستىنەن جازىلعان ارىزدى مەن دەمالىستان كەلگەنشە قايتكەندە قاراپ، قۇرتاتىن بول» دەگەن ءسوزىن قۇلاعى شالىپ قالعان.

«سودان كەيىن جاپاروۆا ىنىمە قىسىم جاساپ، «اعاڭدى اۋرۋحاندان شىعارىپ سوتقا الىپ كەلمەسەڭ، ەكەۋىڭدى دە قۇقىق قورعاۋ سالاسىندا مۇلدەم جۇمىس ىستەتپەيمىز»، دەپ قويماعان سوڭ امبۋلاتوريالىق ەمگە سۇرانىپ شىعىپ، جيەنىم ءمولدىر مەن اپامدى ەرتىپ قىركۇيەكتىڭ 2-ءشى جۇلدىزىندا  سوتقا باردىم. سوت جاپاروۆا مۇقىشەۆا ەكەۋىمىزدى بولمەسىنە جەكە كىرگىزىپ الىپ، تاتۋلاستىق دەپ جازاسىڭ ايتپەسە ءوزىڭدى دە، ءىنىڭدى دە ءىىم سالاسىندا جۇمىس ىستەمەيتىندەي قىلامىز دەپ ايقايعا باستى. مۇنىمەن كەلىسپەيتىندىگىمدى ايتىپ، قارسىلاسقانىمدا دەنساۋلىعىم ناشارلاپ ەسىمنەن تانىپ قالدىم»، - دەپ جازادى سۇلەيمەن مىرزا.

ونىڭ ايتۋىنشا، وسى ءساتتى پايدالانعان جاپاروۆا، ورازكۇلدىڭ اپاسىن بولمەسىنە شاقىرىپ الىپ جاڭاعى بار بىلەتىن ۇركىتۋ-قورقىتۋلارىن ايتقان، زارەسى قالماي شوشىعان قارت انا جابىرلەنۋشىنىڭ اتىنان «مۇقىشەۆامەن تاتۋلاستىم» دەپ جازىپ بەرگەن. مۇنى ەستىگەن ورازكۇل سوتتىڭ ارەكەتىنە نارازىلىق ءبىلدىرىپ، قاسارىسىپ تۇرىپ العان سوڭ، جاپاروۆا، «بۇل ءىستى قىركۇيەكتىڭ 4-ءى كۇنى قارايمىز، سول كۇنى كەلىڭدەر» دەپ شاقىرتۋ قاعاز بەرگەن. الايدا، كەيىپكەرىمىز كورسەتىلگەن كۇنى سوت وتىرىسى بولماعاندىعىن، ولاردى الداپ سوققاندىعىن جازادى. دالىرەك ايتساق، سوت پروتسەسى شاقىرتۋ قاعازدا بەلگىلەنگەندەي 4-ءى كۇنى بولماعان، سەبەبى قىركۇيەكتىڭ 2-ءسى كۇنگى سوتتا ەكى جاقتىڭ ادامدارى تاتۋلاسقاندىقتان، ءىس جابىلعان. گاپ قايدا جاتىر!

تەرگەۋ امالدارى تەرلەتەيىن دەپ تۇر

بۇنىمەن ءىس بىتپەيدى. اۋرۋحانادان جازىلىپ شىعىپ، جۇمىس ورنىنا قايتىپ ورالعان ورازكۇلدى قارسىلاستارى ازىرلەگەن تاعى ءبىر «سىي» كۇتىپ تۇرادى. «قىرسىققاندا قىمىران ءىرىدي» دەمەكشى، جۇمىستاعى وترياد باستىعى جاقىپبەكوۆا دەگەن، مۇقىشەۆانىڭ جاقىن تۋىسى ەكەن. ول كىسى نەشە اي اۋرۋحانادا جاتىپ ەمدەلىپ كەلگەن كەيىپكەرىمىزدىڭ سىرقاتىن راستايتىن قاعازىن قابىلداماي، جۇمىسقا سەبەپسىز قاتىسپادى دەگەن سىلتاۋمەن ورنىنان بوساتۋعا ارەكەت جاسايدى. ابىروي بولعاندا پوليتسيا پولكوۆنيگى پ. كارپيۋك، ىشكى ىستەر ورىندارىندا ءوزى سياقتى قىزمەتىنە ادال، ادىلدىككە قيانات جاسامايتىن جانداردىڭ بار ەكەندىگىن دالەلدەپ، جاقىپبەكوۆانى «ورنىنا قويادى». ورازكۇل مەن مۇقىشەۆانىڭ اراسىنداعى جەكە ماسەلەگە ارالاسۋعا قاتاڭ تىيىم سالادى.

ال، سوت جاپاروۆا 2-ءشى قىركۇيەكتە شىعارىلعان سوتتىڭ قاۋلىسىن سۇلەيمەن مىرزاعا ون ءۇش كۇن وتكەن سوڭ عانا كورسەتكەن. بۇل شەشىممەن كەلىسپەگەن جابىرلەنۋشىنىڭ 16-شى قىركۇيەكتە جازعان اپپەلياتسيالىق ارىزىن سوت قابىلداماي، باقىلاۋ (نادزورنىي) ارىزىن جازۋعا ماجبۇرلەگەن. ونىڭ ۇستىنە دەمالىستان كەلگەن سوت توراعاسى بەيسەنباەۆ ەتەك-جەڭىن ءتۇرىنىپ تاستاپ، ىسكە ەندى ءوزى كىرىسەدى. جەلتوقسان ايىنىڭ 22-ءسى كۇنى حاتشى قىز ارقىلى ورازكۇل مەن اپاسىن الداپ شاقىرتىپ الىپ، باقىلاۋ ارىزىن قايتىپ الۋعا ۇگىتتەيدى. «ءبارىن ءوزىم قاتىرامىن» دەپ ۋادەسىن ءۇيىپ توككەن ول، ارىزدى قايتارۋ ءۇشىن نە جازۋ كەرەكتىگىنە دەيىن كورسەتىپ بەرگەن. وندا: «مەنىڭ ۇلىتاۋ اۋدانى №2 اۋداندىق سوتىنىڭ مۇقىشەۆا تۋرالى قاۋلىسىن بۇزۋ جايىنداعى ارىزىمدى قايتارۋىڭىزدى سۇرايمىن»، - دەپ جازىلعان. بىراق، سوت توراعاسى بەيسەنباەۆتىڭ ويلاعانى جۇزەگە اسپاي، باقىلاۋ ارىز قايتارىلمايدى. ءسويتىپ، جاپاروۆانىڭ ورەسكەل زاڭ بۇزۋشىلىقتارى اشكەرەلەنىپ، وبلىستىق سوت اۋداندىق ارىپتەسىنىڭ ادىلەتسىز شىعارعان قاۋلىسىن بۇزعان سوڭ، بەيسەنباەۆ ءىستى تەرگەۋگە جىبەرۋدىڭ ورنىنا، ءوز قامقورىنداعى مۇقىشەۆاعا جالعان قۇجاتتار مەن دالەلدەر جيناپ الۋعا مۇمكىندىك تۋعىزۋ ماقساتىندا ۋاقىتتى سوزۋ ءۇشىن قايتادان سوت مەديتسينالىق ساراپتامادان وتۋگە ءفورمالدى تۇردە سىرتتاي قاۋلى شىعارعان. سودان كەيىن بارىپ قانا ءىس تەرگەۋگە جونەلتىلگەن.

«ەندى تەرگەۋشى قۇلجانوۆ «مەديتسينالىق ساراپتامانى استانادا وتەسىڭ» دەگەن سوڭ 04.06. 2009 ج. سوندا باردىق. وندا ءبىزدى قابىلداماعاننان كەيىن قاراعاندىعا قايتا كەلدىك. مەن 50 بەتتىك رەنتگەن سۋرەتتەرى بار امبۋلاتوريالىق كارتامدى قاراعاندىلىق سوتمەدساراپتاما دارىگەرى راحمانقۇلوۆقا قالدىرىپ، شىعىپ كەتتىم. كەتىپ بارا جاتىپ تەرگەۋشى مەن دارىگەردىڭ اراسىنداعى اڭگىمەدە قۇلجانوۆتىڭ، «انداعى قاعازدا العان جاراقاتتار تۋرالى كوپ ايتىلعان، وتىنەمىن ءسىز كوپ جازباي-اق قويىڭىز، جاقىن ارادا مۇقىشەۆانىڭ ءوزى دە كىرىپ شىعادى...» دەگەن ءسوزىن ەستىپ قالدىم. بۇدان كەيىن تەرگەۋدىڭ ءادىل جۇرەتىندىگىنە قايدان سەنىم بولادى»، - دەپ قىنجىلادى كەيىپكەرىمىز.

ءتۇيىن ءسوز

قازىرگى كۇنى وسى ءىس بويىنشا تەرگەۋ شارالارى ءوتىپ جاتىر. بىراق، جابىرلەنۋشى ورازكۇل سۇلەيمەن تەرگەۋشى مامانداردىڭ ءىستى وبەكتيۆتى تۇردە جۇرگىزەتىنىنە كۇمانمەن قارايدى. سوندىقتان ول باس پروكۋرور قايرات ءمامي مىرزادان اتالمىش ءىستى باسقا اۋداننىڭ نەمەسە وبلىستىڭ تەرگەۋشىلەرىنە جۇكتەۋدى ءبىزدىڭ باسىلىم ارقىلى سۇراپ وتىر. بۇنىڭ دا ءوز ءجونى بار، ەستەرىڭىزدە بولسا، وتكەن جىلى قۇقىق قورعاۋ ورىندارىنىڭ قۇرىعىنا ءىلىنىپ، جازىقسىز جاپا شەككەن جەزقازعاندىق ازاماتتاردىڭ ىسىندە ادىلدىكتىڭ سالتانات قۇرۋىنا سول كەزدەگى جوعارعى سوتتىڭ توراعاسى قايرات ءمامي «قازاقستان» گازەتىنە ءتيىستى ماتەريال شىققاندا ءبىلىپ، كومەكتەسكەن-ءتىن.

«قازاقستان» اپتالىعى، №29 (269), 16-شىلدە، 2009