پارتيا – مەملەكەتتىڭ ساياسي جۇيەسىنىڭ نەگىزگى تەگەرشىگى، كەرەك دەسەڭىز تۇتقاسى، - دەيدى بەلگىلى جۋرناليست قانات اۋەسباي. ول Nur Otan پارتياسىندا باستالعان مودەرنيزاتسيا بيلىكتىڭ جۇمىسىنا سەرپىلىس بەرەدى دەپ ەسەپتەيدى.

«سوڭعى جىلدارى دۇنيە جۇزىندەگى قيلى سالا دامىدى، اقپاراتتىق كەڭىستىكتىڭ پارمەنى ارتتى، ازاماتتىق قوعام ىلگەرىلەدى. بۇل ۇدەمەلى ءۇردىس قازاقستان قوعامىنا دا زور قارقىنمەن اسەر ەتكەنى راس. اسەرىنەن حالىقتىڭ سۇرانىسى كوپ وزگەردى. حالىق سۇرانىسىنا جاۋاپ بەرە الاتىن بيلىك تە وزگەرۋى قاجەت ەندەشە. وسى تۇستا ساياسي پارتيالاردىڭ ءرولى ارتا تۇسپەك. بۇل جاعدايدى Nur Otan پارتياسىنىڭ بۇگىنگى سەزىنە قاتىسۋشىلار دا جەتە ءتۇسىنىپ وتىرعان سىڭايلى. سەزدىڭ شۇعىل وتكىزىلۋى پارتيانىڭ وزگەرىسكە ءھام جاڭاشا جۇمىس ىستەۋگە دايىن ەكەنىن كورسەتتى. توراعاسى اۋىسقانىنا «قۇتتاي» 1 اي وتسە دە، الداعى دامۋ ستراتەگياسى مەن ەل بولاشاعىنىڭ باعدارى ءازىر»، - دەپ جازدى ق.اۋەسباي ءوزىنىڭ Instagram-پاراقشاسىندا.

ول «پارتيانى تۇگەل تاراتىپ، جاڭاسىن قۇرۋ كەرەك دەگەن پىكىردىڭ قاتە ەكەنىن، قولدا باردى ءتيىمدى پايدالانساق حالىق تا، بيلىك تە ۇتاتىنىن ايتتى.

«سەزدە پارتياعا قاتىستى حالىق كوكەيىن تەسكەن تولعاقتى ماسەلەنىڭ تالايى ايتىلدى. نەسىن جاسىرايىق، پارتيا اتىنا ايتىلعان كوپتەگەن پىكىردى ەستىپ ءجۇرمىز. ءبىر پىكىر «اتاۋىن اۋىستىرايىق» دەدى، ەندى ءبىرى ءتىپتى، «پارتيانى تاراتۋ كەرەك» دەپ تىم اسىرە كەتتى. وسى ورايدا ءبىر نارسەنى مىقتاپ ۇعىپ العان ءجون، پارتيا – مەملەكەتتىڭ ساياسي جۇيەسىنىڭ نەگىزگى تەگەرشىگى، كەرەك دەسەڭىز تۇتقاسى عوي. «تۇتقاسىز» مەملەكەتتىڭ بولاشاعى جارقىن دەپ ايتا الماسسىز تاعى دا. سوندىقتان، پارتيامىز زامان كوشىنە ىلەسەتىندەي، ۋاقىت تەزىنە توزە بىلەتىندەي ساياسي كۇشكە يە بولۋى كەرەك. ءبىر سوزبەن ايتقاندا پارتيا قايتا جاڭارىپ، جاڭا ساياسي باعىتقا بەيىمدەلگەنى ماقۇل»، - دەدى قانات اۋەسباي.

ايتا كەتەيىك، بۇگىن Nur Otan پارتياسىنىڭ كەزەكتەن تىس XXII سەزى ءوتىپ، وندا پارتيا باسشىلارى ونىڭ اتاۋىن Amanat دەپ وزگەرتۋدى ۇسىندى.

Abai.kz