رەسەي مەن ۋكراينا اراسىنداعى سوعىس بارلىق سالادا ءجۇرىپ جاتىر. اسكەري، ەكونوميكالىق، ساياسي، اقپاراتتىق دەڭگەيدە قاقتىعىس تولاستار ەمەس.

ۋكراينا اقپاراتتىق سوعىستا ءبىر قادام الدا ەكەنى دە ايتىلۋدا. ۋكراينا رەسەيدىڭ اسكەري قىلمىستارىن اشكەرە ەتىپ، قيراعان عيماراتتار مەن قازا تاپقان بەيبىت تۇرعىندارعا قاتىستى اقپاراتتار لەگىن بەرۋدە. قولعا تۇسكەن تۇتقىنداردان سۇحبات الىپ، ولاردىڭ حالىقارالىق جۋرناليستەر الدىندا بريفينگ بەرۋىن ۇيىمداستىرۋدا. ارنايى سايت جاساپ، قازا تاپقان رەسەيلىك ساربازداردىڭ قۇجاتتارىن جاريالاۋدا. بۇل رەسەي اۋديتورياسىنا دا اسەر ەتۋدە. سوندىقتان، رەسەي الەۋمەتتىك جەلىلەرگە شەكتەۋ قويىپ، بىرقاتارىن بۇعاتتاپ تاستادى.

ال رەسەيدىڭ اقپاراتتىق سوعىسى ءوزىنىڭ ىشكى اۋديتورياسىنا باعىتتالعان. سوندىقتان، رەسەي وزگە اقپارات كوزدەرىن بارىنشا بۇعاتتاپ تاستاۋدى قولعا العان، سەبەبى «مەملەكەتتىك ساياساتقا كۇمان كەلتىرەتىن اقپاراتتىڭ بارلىعى دا زاڭعا قايشى»، - دەيدى كرەمل.

ۋكراينانىڭ اقپاراتتىق سوعىسى رەسەي ازاماتتارىنا دا اسەر ەتۋدە. رەسەيدىڭ ءىرى قالالارىندا سوعىسقا قارسى ميتينگتەر مەن اكتسيالار وتۋدە، جەكەلەگەن ازاماتتار پيكەتتەر جاساۋدا.

كۇنى كەشە عانا رەسەيدىڭ «ءبىرىنشى ارناسىندا» قىزمەت ىستەيتىن مارينا وۆسياننيكوۆا تەلەارنانىڭ تىكەلەي ەفيرىنە «سوعىستى توقتاتىڭدار. بۇل جەردە سەندەرگە تەك وتىرىك ايتۋدا» دەگەن جازۋى بار پلاكات الىپ شىقتى. ارتىنشا تەلەارنا باسقا سيۋجەت كورسەتىپ جىبەرۋگە ءماجبۇر بولعان. مارينانىڭ ءوزىن پوليتسيا بولىمشەسىنە اپارىپ، جاۋاپ العان. ونىڭ ۇستىنەن اكىمشىلىك ءىس اشىلعان.

مارينانىڭ ۆيدەوسى الەۋمەتتىك جەلىلەردە ترەندكە اينالدى. Twitter جەلىسىندە ءبىر كۇن ىشىندە ەڭ كوپ تارالعان ۆيدەو رەتىندە ءبىرىنشى ورىنعا شىققان.

باتىستىق باسىلىمدار مارينانىڭ ارەكەتىن «كرەملدىڭ اقپاراتتىق سوعىستا كۇيرەۋى» دەپ اتادى.

Abai.kz