نۇر-سۇلتان سوتى قايرات ساتىبالدىۇلىن قاماۋعا الۋعا سانكتسيا بەردى. 

«2022 جىلدىڭ 15 ناۋرىزىندا نۇر-سۇلتان قالاسىنىڭ مامانداندىرىلعان اۋدانارالىق تەرگەۋ سوتى كۇدىكتى ق. ساتىبالدىۇلىنا قاتىستى 2 اي مەرزىمگە قاماۋعا الۋ تۇرىندەگى بۇلتارتپاۋ شاراسىن سانكتسيالادى»، - دەدى سوت.

سوتقا دەيىنگى تەرگەپ-تەكسەرۋدىڭ باسقا دەرەكتەرى قىلمىستىق ءىس جۇرگىزۋ كودەكسىنىڭ 201-بابىنا سايكەس جاريا ەتىلۋگە ​​جاتپايتىنى اتاپ وتىلگەن.

بۇعان دەيىن سىبايلاس جەمقورلىققا قارسى قىزمەتتىڭ «قازاقتەلەكوم» اق-نىڭ اسا ءىرى كولەمدەگى لاۋازىمدىق وكىلەتتىكتەرىن اسىرا پايدالانۋ جانە قارجىسىن جىمقىرۋ فاكتىلەرى بويىنشا قىلمىستىق ءىستى تەرگەپ جاتقانى بەلگىلى بولعان. وسى قىلمىستاردى جاسادى دەگەن كۇدىكپەن قايرات ساتىبالدىۇلى ۇستالىپ، ۋاقىتشا ۇستاۋ يزولياتورىنا قامالدى.

سىبايلاس جەمقورلىققا قارسى قىزمەت توراعاسى ولجاس بەكتەنوۆ قايرات ساتىبالدىۇلىنىڭ الماتى اۋەجايىندا ۇستالعانىن، ونىڭ دۋبايعا ۇشپاق بولعانىن راستادى.

Abai.kz