2022 جىلى 15 ناۋرىزدا ءال-فارابي اتىنداعى قازاق ۇلتتىق ۋنيۆەرسيتەتى الماتى قالاسى اكىمدىگىنىڭ قولداۋىمەن «الماتى قالاسى مۋزەيلەر بىرلەستىگى» كمقك جانە «تاڭبالى» مەملەكەتتىك قورىق-مۋزەيىمەن بىرلەسكەن «ناۋرىز: ءداستۇر جانە جاڭعىرۋ» كورمەسىن جانە عىلىمي-تاجىريبەلىك كونفەرەنتسياسىن وتكىزدى.

تاريحي تامىرى تەرەڭگە بويلاعان ءاز-ناۋرىز دانا حالقىمىزدا قاي كەزدە دە ەڭسەسى بيىك ەلدىكتىڭ، ىرگەسى سوگىلمەس بىرلىكتىڭ، ىرىس پەن ىنتىماقتىڭ، تازالىق پەن تاتۋلىقتىڭ تۇعىرىن نىعايتىپ، رياسىز شاتتىق پەن قۋانىشقا كەنەلتەر مەرەكە بولىپ كەلگەن.

ءتۇبى ءبىر تۇركى جۇرتىنىڭ ءتول مەيرامى – ناۋرىز – كوكتەم مەن جاڭارۋدى ايشىقتايتىن مەرەيى تاسىعان ۇلى ءسات بولۋىمەن قاتار، قازاقتىڭ مادەني مۇراسىن ۇلىقتاپ، ۇلتتىق قۇندىلىقتارىمىزدى ەرەكشە قادىرلەۋدىڭ جارقىن ايعاعىنا دا اينالىپ وتىر.

تاۋەلسىزدىك العان سوڭ ءبىرشاما ۋاقىتقا ۇمىت بولىپ قالعان اتا بابالارىمىزدان ميراس ەتىلگەن سان عاسىرلىق ءداستۇرىمىز حالىقپەن قايتا قاۋىشىپ، بۇگىندە مەرەيلى مەرەكەگە اينالدى.

قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ «تاۋەلسىزدىك بارىنەن قىمبات» ماقالاسىنداعى ناۋرىز مەيرامىن تويلاۋ تۇجىرىمداماسىندا: «ناۋرىز مەيرامىنىڭ نەگىزگى ماقساتى – قازاقستان جەرىندە بەيبىتشىلىك پەن دوستىقتى نىعايتۋ، ۇلتتىق بىرەگەيلىكتى ساقتاۋ، وتباسىلىق قۇندىلىقتاردى دارىپتەۋ، قورشاعان ورتاعا ۇقىپتى قاراۋدى قالىپتاستىرۋ» - دەپ اتاپ وتىلگەن.

«رۋحاني جاڭعىرۋ» باعدارلاماسى اياسىندا ۇيىمداستىرىلعان كورمەدە قازاق حالقىنىڭ ءداستۇرلى تۇرمىس-سالتىن ناسيحاتتايتىن، باي ماتەريالدىق جانە رۋحاني مادەنيەتىن كورسەتەتىن كيىز ءۇي جانە ىشكى جابدىقتارى، الماتى قالاسىنداعى ناۋرىز مەرەكەلەرىنىڭ تويلانۋى جونىندە فوتوسۋرەتتەر قويىلدى. مەرەكەلىك  ءىس-شارا قوناقتارىنا ناۋرىز كوجە تاراتىلىپ، زەرگەرلىك ونەرىنەن شەبەرلىك ساعاتى وتكىزىلدى.

كونفەرەنتسيا جۇمىسىنىڭ بارىسىندا ناۋرىز مەرەكەسىنىڭ جاڭعىرعان قازاق قوعامىنا اسەرى، ۇلتتىق قۇندىلىقتار، ۇلتتىق بىرەگەيلىك ءمانى تالداندى.

شاراعا الماتى قالاسى مادەنيەت باسقارماسى باسشىسىنىڭ ورىنباسارى اليەۆ دانيار ابزاليدەنۇلى، الماتى قالاسى مۋزەيلەر بىرلەستىگى باسشىلىعى، وتاندىق تاريحشى، ەتنولوگ، ارحەولوگ، مۋزەيتانۋشى عالىمدار مەن مەملەكەتتىك جانە قوعامدىق ۇيىمداردىڭ وكىلدەرى، ساراپشىلار، باق وكىلدەرى قاتىستى.

ەلىمىزدەگى جەتەكشى وقۋ ورىندارىنىڭ ءبىرى، قارا شاڭىراق قازاق ۇلتتىق ۋنيۆەرسيتەتى بۇگىندە الماتى قالاسى مادەنيەت باسقارماسىنا قاراستى الماتى قالاسى مۋزەيلەر بىرلەستىگى مۋزەيلەرىمەن تىعىز بايلانىستا جۇمىس جاساپ كەلەدى. بىرلەستىك قىزمەتكەرلەرىنىڭ كوپ بولىگى قازۇۋ تۇلەكتەرى. ساندىق مالىمەتتەر كەلتىرسەك، 26 باكالاۆر، 17 ماگيستر، 1 PhD دوكتورانت قىزمەت ەتۋدە. ۋنيۆەرسيتەت تۇلەكتەرى سۇيىكتى قالامىزدىڭ مادەني ومىرىنە زور ۇلەسىن قوسىپ كەلەدى. بۇل قازۇۋ-دىڭ عانا ەمەس، قازاقستان ءبىلىم بەرۋ جۇيەسىنىڭ زور كورسەتكىشى دەپ بىلەمىز.

Abai.kz