«قازاقستاننان شەتەلگە شىعارىلعان قارجىنى قايتارۋمەن اينالىساتىن كوميسسيا قۇرىلدى. ۇكىمەت حابارىنا قاراعاندا، كوميسسيادا بەس جۇمىس توبى بولادى. ولار قارجىنىڭ شەتەلگە قالاي شىققانىن، ونى ەلگە قايتارۋ  جانە شەكتەۋ شارالارىن قابىلدايدى»،- دەپ حابارلايدى Abai.kz سايتى masa.media سايتىنا سىلتەمە جاساپ.

سىرتقا شىعارىلعان قارجىنىڭ ىشىندە بۇرىنعى پرەزيدەنت نۇرسۇلتان نازارباەۆ وتباسىنىڭ قارجىسى بار-جوعى ازىرشە ناقتىلانبادى. پرەمەر-ءمينيستردىڭ ورىنباسارى ەرۇلان جاماۋباەۆ پەن ۇلتتىق ەكونوميكا ءمينيسترى الىبەك قۋانتىروۆ «ەكس پرەزيدەنت وتباسىنىڭ قارجىسى بار-جوعىن انىقتاۋ كوميسسيانىڭ، قۇقىق قورعاۋ ورگاندارىنىڭ مىندەتى» ەكەنىن ايتقان.

ايتا كەتەيىك، 2022 جىل 8 اقپان كۇنى پرەزيدەنت قاسىم-جومارت توقاەۆ ۇكىمەتكە ەكى ايدىڭ ىشىندە قازاقستاننان شەتەلگە زاڭسىز شىعارىلعان قارجىنى قايتارۋ جونىندە ۇسىنىس ازىرلەۋگە تاپسىرما بەرگەن بولاتىن.

«ۇكىمەتكە ەكى اي مەرزىم ىشىندە شەتەلگە زاڭسىز اكەتىلگەن قارجى مەن وندا ساتىپ الىنعان اكتيۆتەردى ەلگە قايتارۋ جونىندە ۇسىنىستار بەرۋ مىندەتى جۇكتەلەدى»، - دەدى مەملەكەت باسشىسى.

“Tax Justice network” حالىقارالىق ۇيىمىنىڭ مالىمەتىنشە،  سوڭعى 25 جىلدا قازاقستاننان شەتەلگە 140-160 ميلليارد دوللار كولەمىندە قارجى شىعارىلعان.

Abai.kz