تارازدا مەكتەپ مۇعالىمى رەسەيلىك ساياساتكەر ۆلاديمير جيرينوۆسكيدىڭ ءارى ونىڭ باسقاراتىن رەسەي ليبەرالدى-دەموكراتيالىق پارتياسىنىڭ (لدپر) سۋرەتى سالىنعان «سىيلىقتار» تاراتقان. بۇل تۋرالى جىمبىل وبلىسىنىڭ اكىمدىگى مالىمدەدى.

ايتا كەتەيىك، ۆلاديمير جيرينوۆسكي قازاقستاننىڭ تۇتاستىعىنا زيان كەلتىرەتىن ارانداتۋشى سوزدەرىمەن تانىمال بولعان رەسەيلىك ساياساتكەر.

«2022 جىلدىڭ ناۋرىز ايىندا تاراز قالاسى №13 مەكتەبىنىڭ 6-سىنىپتار جەتەكشىسىنىڭ ءبىرى مەكتەپ اكىمشىلىگىمەن اقىلداسپاي وقۋشىلارعا رەسەيلىك پارتيانىڭ لوگوتيپى بەينەلەنگەن سىيلىقتار تاراتقان»،-دەپ جاۋاپ بەردى اكىمشىلىك.

شەنەۋنىكتەردىڭ ايتۋىنشا، «پەداگوگ مارتەبەسى» تۋرالى زاڭدا مۇعالىمنىڭ ءبىلىم بەرۋ پروتسەسىن ساياسي ۇگىت-ناسيحات ءۇشىن پايدالانۋعا قۇقىعى جوق ەكەنى جازىلعان.

«مۇعالىمگە ءتۇسىندىرۋ جۇمىسى جۇرگىزىلدى. ءوڭىردىڭ باسقا دا مۇعالىمدەرىنە اقپاراتتىق ءتۇسىندىرۋ جۇمىستارى جۇرگىزىلدى. پەداگوگيكالىق ەتيكانى بۇزعانى ءۇشىن مۇعالىمگە سوگىس بەرىلدى. سونداي-اق، تاراز قالاسىنىڭ №13 ورتا مەكتەبىنىڭ ديرەكتورى مەن وقۋ - تاربيە ءبولىمىنىڭ مەڭگەرۋشىسى دە سوگىس الدى»، - دەپ حابارلادى وبلىس اكىمدىگى.

Abai.kz