بۇگىن جالپى وتىرىستا ءماجىلىس دەپۋتاتتارىنىڭ وڭىرلەرگە ساپارى بارىسىندا تۇرعىنداردان كەلىپ تۇسكەن وتىنىشتەردى قاراۋ ناتيجەلەرى بويىنشا ۇكىمەتتىڭ اقپاراتىن تىڭدادى.

وسى ورايدا پرەمەر-ءمينيستردىڭ ورىنباسارى ەرالى توعجانوۆ باستاعان بىرقاتار ۇكىمەت مۇشەلەرى ارنايى كەلدى.

وتىرىستا ءماجىلىس توراعاسى ەرلان قوشانوۆ مەملەكەت باسشىسى  دەپۋتاتتاردىڭ  وڭىرلەردەگى وزەكتى الەۋمەتتىك ماسەلەلەردى شەشۋگە اتسالىسۋىن كۇشەيتۋ جونىندە تاپسىرما بەرگەنىن اتاپ ءوتتى.

– دەپۋتاتتار اقپان ايىندا ەلىمىزدىڭ بارلىق وڭىرىنە بارىپ، سايلاۋشىلارمەن مازمۇندى كەزدەسۋلەر وتكىزدى. وندا تۇرعىندار تاراپىنان بىرقاتار پروبلەمالار كوتەرىلىپ، وتىنىشتەر قابىلداندى. سونىڭ ءبارىن جيناقتاپ، ءبىر اي بۇرىن ۇكىمەتكە جولداعان بولاتىنبىز. مىنە، بۇگىن وسى ماسەلەلەردىڭ شەشىلۋى تۋرالى ۇكىمەتتىڭ اقپاراتىن تىڭدايىن دەپ وتىرمىز، - دەدى ەرلان قوشانوۆ.

دەپۋتاتتار ەلىمىزدىڭ بارلىق وڭىرىنە بارىپ، سايلاۋشىلارمەن 1600-گە جۋىق كەزدەسۋ وتكىزدى. ولار ءتۇرلى الەۋمەتتىك نىسانداردا، كاسىپورىندار مەن بازارلاردا، شالعاي ەلدى مەكەندەردە بولىپ، ەڭبەك ۇجىمدارىنىڭ  پروبلەمالارىمەن تانىستى. بارلىعى مىڭنان استام ماسەلە جيناقتالىپ، ۇكىمەتكە جىبەرىلدى. سونىڭ ىشىندە ازىق-تۇلىك پەن ءدارى-دارمەكتىڭ قىمباتتاۋى، اۋىز سۋمەن جانە تۇرعىن ۇيمەن قامتاماسىز ەتۋ، مەكتەپ قۇرىلىسى، جول جوندەۋ، ينتەرنەت ساپاسىن جاقسارتۋ ماسەلەلەرى بار.

ءماجىلىس توراعاسىنىڭ ايتۋىنشا، پروبلەمالاردىڭ ءبارى ناقتى ءارى جۇيەلى تۇردە شەشىلۋگە ءتيىس. ولار دەپۋتاتتاردىڭ ءجىتى باقىلاۋىندا بولادى.

ءاربىر ماسەلەنىڭ ارتىندا ادامداردىڭ تۇرمىسى مەن تاعدىرى تۇر. وسىنى ءار دەپۋتات، مينيستر مەن جەرگىلىكتى بيلىك وكىلدەرى تەرەڭ تۇسىنۋگە ءتيىس. قازىر ەلىمىز ۇلكەن وزگەرىستەردىڭ الدىندا تۇر. پرەزيدەنت ءىرى ساياسي رەفورمالار جاريالادى. ول رەفورمالار قارقىندى جۇزەگە اسا باستادى. ال ءبىز – پارلامەنت، ۇكىمەت، جەرگىلىكتى بيلىك، ءبارىمىز ءبىر كىسىدەي جۇمىلىپ، قوعامدا قوردالانعان ماسەلەلەردى شەشۋدە جەدەل ارەكەت ەتۋىمىز قاجەت. ءبىر سوزبەن ايتقاندا ءبىز مەملەكەت باسشىسىنىڭ قارقىنىنا ىلەسە ءبىلۋىمىز كەرەك، – دەدى ەرلان قوشانوۆ.

سونداي-اق پالاتا سپيكەرى پارلامەنت پەن ۇكىمەتتىڭ ماسەلەلەردى شەشۋ بويىنشا جاڭا فورماتتاعى جۇمىسى الداعى ۋاقىتتا دا جۇيەلى تۇردە جالعاساتىنىن ايتتى.

Abai.kz