رەسەي پرەزيدەنتى پۋتين مەن بەلارۋس باسشىسى لۋكاشەنكو «عارىشكەرلەر كۇنىنە» بايلانىستى رەسەيدىڭ امۋر ايماعى، «شىعىس» عارىش ايلاعىندا كەزدەستى. كەزدەسۋ بارىسىندا ۋكراينا مەن ىشكى ساياسات، ەكى ەل اراسىنداعى ساۋدا قاتىناسى مەن نەسيە بەرۋ ماسەلەسى دە تالقىلاندى. 

ەكى ەل باسشىلارىنىڭ «عارىشكەرلەر كۇنىندە» كەزدەسكەنى اقش تاراپىنان رەسەيدىڭ عارىش سالاسىنا سانكتسيالاردى كۇشەيتۋمەن تۇسپا تۇس كەلدى. رەسەي ۋكرايناعا باسىپ كىرگەن كۇنى اقش پەن ەو ەلدەرى رەسەيگە قاتاڭ سانكتسيالار سالۋدى باستادى. كوپ ۇزاماي رەسەي عارىش سالاسىنىڭ باسشىسى دميتري روگوزين قارسى سانكتسيالار ەنگىزەتىنىن مالىمدەدى. الايدا ول سانكتسيالاردىڭ باتىستىڭ عارىش سالاسىنا قانداي دا ءبىر اسەرى ءتيۋى ەكىتالاي.  12 ناۋرىز كۇنى روگوزين ەو مەن اقشتان زاڭسىز سالىنعان سانكتسيالاردى الىپ تاستاۋدى تالاپ ەتتى. وسىلايشا رەسەي عارىش سالاسى اراعا ءبىر اي سالىپ قيىندىقتارعا تاپ بولا باستادى.

ءسويتىپ عارىش سالاسى سانكتسيانىڭ استىندا جاتقان رەسەي «عارىشكەرلەر كۇنى» بەلارۋسپەن كەلىسسوزدى عارىش ايلاعىندا جاسادى. پۋتين لۋكاشەنكومەن پرەسس-كونفەرەنتسيا بارىسىندا ۋكرايناداعى بۋچا قىرعىنىنا العاش رەت تۇسىنىكتەمە بەردى. «اقش-تىڭ يراكتا جاپپاي قىرىپ جويۋ قارۋى بار دەگەنى سياقتى بۇل دا ۇلكەن ءبىر فەيك», - دەدى پۋتين. ال لۋكاشەنكو بولسا بۇل قىرعىنعا قاتىستى قۇجاتتاردى رەسەيدىڭ ارنايى ورگاندارىنا بەرگەنىن ايتادى. «فقق (فسب) وكىلدەرىنە ارناى قۇجاتتار بەرىلدى، وندا قالاعا قالاي كەلىپ، قالاي ارانداتۋ جاسالعانى جايلى بارلىق دالەلدەر بار» دەيدى ول. «ەگەر سىزدەرگە بۋچاعا قانداي كولىكپەن كەلىپ، قانداي ماركاداعى ماشينا بولعانىن، ونىڭ ءنومىرى قانداي ەكەنىن بىلگىلەرىڭىز كەلسە، فقق-دا بارلىق اقپارات بار. ەگەر جوق بولسا، وندا ءبىز سىزدەرگە كومەكتەسە الامىز. رەسەيلىك دوستارىمىزبەن ءبىز بۇل سۇمدىق ارانداتۋدى، باتىستىڭ لاس تىرلىگىن ءبىرىنشى ساعاتتا-اق اڭعارعان ەدىك»، دەيدى لۋكاشەنكو. ونىڭ سوزىنشە بۋچاداعى ارانداتۋدى اعىلشىن ارنايى جاساقتارى جاساعان.

پۋتين ۋكرايناداعى سوعىستى بىلايشا اقتاماق بولدى: «ءبىز ءبىر جاعىنان ادامدارعا كومەكتەسىپ، ولاردى قۇتقارىپ جاتىرمىز، ال ەكىنشى جاعىنان ءبىز رەسەيدىڭ قاۋىپسىزدىگىن قامتاماسىز ەتۋدەمىز. بۇل وتە دۇرىس شەشىم بولدى، بىزدە باسقا امال دا، تاڭداۋ دا جوق ەدى. ۋكراينانى انتيرەسەيلىك ايماققا اينالدىردى، نەوناتسيزم ورداسى ەتتى. ول نەوناتسيزم وكىلدەرىن دايىنداۋ ارقىلى رەسەيگە سوققى بەرۋدى ويلادى، تەك قانا ۋاقىتى مەن كۇنىن ويلاستىردى»، - دەدى. پۋتين ۋكرايناداعى بارلىق ماقساتتار ىسكە اسادى دەپ ۋادە بەرىپ وتىر. ول كيەۆتىڭ دونباسستاعى گەنوتسيدىنە شىداۋ مۇمكىن ەمەس دەپ مالىمدەدى.

ساراپشىلار لۋكاشەنكو مەن ءپۋتيننىڭ كەزدەسۋىندە ماڭىزدى ماسەلەلەر تالقىلانعانىن ايتادى. جابىق ەسىك فورماتىندا پۋتين بەلارۋستىڭ سوعىسقا بەلسەندى قاتىسۋىن سۇرادى دەيدى. قازىر بەلارۋس ۋكرايناعا شابۋىل جاساۋ ءۇشىن ءوزىنىڭ اۋماعىن بەرىپ وتىر.

Abai.kz