قورعانىس ءمينيسترى رۋسلان جاقسىلىقوۆ 9 مامىرعا ارنالعان اسكەري شەرۋ نەلىكتەن بولمايتىنىن ءتۇسىندىردى.

«بۇگىنگى كۇنى قارۋلى كۇشتەردىڭ الدىندا وتە وزەكتى مىندەتتەر تۇر. جوعارعى باس قولباسشى ولاردى بىزگە بەكىتىپ بەردى. ونىڭ ءبارىن ىسكە اسىرۋ ءۇشىن ءبىرشاما قاراجات كەرەك. ال ەندى بيۋدجەتتەن شەرۋ وتكىزۋ ءۇشىن قاراجات سۇراساق قالاي بولادى؟ بۇعان شىعىن شىعادى. جانار-جاعارمايعا، اسكەريلەردىڭ ءىسساپارىنا، تاماعىنا قانشاما قاراجات كەتەدى. سول سەبەپتى مۇنداي جاعدايدا نە ماڭىزدى؟ ايتىڭىزدارشى، اسكەري وقۋ-جاتتىعۋىن وتكىزگەن ماڭىزدى ما، الدە شەرۋ وتكىزگەن بە؟» - دەپتى مينيستر.

بۇعان دەيىن دە مينيسترلىك اسكەري شەرۋ وتكىزۋدىڭ ورنىنا قاراجاتتى قارۋلى كۇشتەردىڭ دايىندىعىنا، مەملەكەتتىك جانە اسكەري نىسانداردى كۇزەتۋ مەن قورعاۋدى قامتاماسىز ەتۋ جونىندەگى تاپسىرمالاردى ورىنداۋعا باسىمدىق بەرىپ وتىرعانىن مالىمدەگەن بولاتىن.

«2022 جىلى قازاقستاندا بيۋدجەت قاراجاتىن ۇنەمدەۋگە جانە باسقا دا مىندەتتەردى شەشۋ قاجەتتىلىگىنە بايلانىستى اسكەري پاراد وتكىزۋ جوسپارلانىپ وتىرعان جوق»، - دەلىنگەن 15 ساۋىردەگى مينيسترلىكتىڭ حابارلاماسىندا.

الايدا، وسى حابار شىعىسىمەن رەسەيلىك ساياساتكەرلەر قازاقستاننىڭ بۇل قادامىن قاتە دەپ ساناپ، ءتۇرلى بولجامدارىن ايتا باستادى. ولاردىڭ كوپشىلىگى «كوروناۆيرۋستىڭ تارالۋى قازاقستاندا ازايدى، الايدا شەرۋلەر مەن اكتسيالارعا تىيىم سالىپ وتىر، بۇل دۇرىس ەمەس» دەگەن ويدا.

رف مەملەكەتتىك دۋماسىنىڭ دەپۋتاتى نيكولاي نوۆيچكوۆ: «ەشقانداي داۋ جاساۋدىڭ قاجەتى جوق، تەك ماسەلەنىڭ باسىن اشىپ الۋ كەرەك. 9 مامىرداعى جەڭىس پارادىنا قاتىستى ءبىزدىڭ پوزيتسياسىزدى رەسمي تۇردە ديپلوماتيالىق جولمەن ءتۇسىندىرۋ كەرەك. ويتكەنى جەڭىس پارادىن وتكىزۋ - ءبىز ءۇشىن وتە ماڭىزدى جانە بۇل ءداستۇر. ال ەگەر قازاقستان بيلىگى نەلىكتەن بۇنداي شەشىم قابىلداعاندارىن تۇسىندىرسە، ءبىز دە تۇسىنەمىز. ماسەلە جابىلادى. سەبەبى ءبىز قازاقستانمەن دوستىق قارىم-قاتىناستامىز»، - دەگەن ەدى.

Abai.kz