28-ءساۋىر كۇنى اقش تاريحي شەشىم قابىلدادى. ادامزات تاريحىندا ەكىنشى مارتە لەند-ليز زاڭى ماقۇلداندى. وسىلايشا كونگرەسستەگى قىزۋ تالقىدان كەيىن اقش بيلىگى ۋكرايناعا قاتىستى لەند-ءليزدى قولدادى. ەندى زاڭعا قول قويۋ ءۇشىن اقش پرەزيدەنتى بايدەنگە جىبەرىلەدى. بايدەن 60 كۇننىڭ ىشىندە قول قويۋى ءتيىس. الايدا ساراپشىلار اقش باسشىسى جىلدام قول قوياتىنىنا سەنىمدى، ويتكەنى زاڭدى ۇسىنۋشى پرەزيدەنتتىڭ ءوزى. 

لەند-ليز زاڭى ۋكراينانى قورعاۋ جولىنداعى ەڭ ماڭىزدى قابىلدانعان شەشىم. ول ساياسي جانە تاريحي ماڭىزعا يە. تاريحي تۇرعىدان ەكىنشى جاھان سوعىسىندا قابىلدانعان شەشىم، اراعا سەكسەن جىل سالىپ قايتا قابىلدانىپ وتىر. ەكىنشى جاھان سوعىسىندا اقش ەۋروپاداعى وداقتاستارى مەن كسرو-نى بارىنشا قولداپ، ارنايى زاڭ قابىلداپ، جەتكىلىكتى قارۋ-جاراقتى تابىستاسا، ەندىگى تاڭدا ۋكرايناعا قاتىستى ءدال سونداي شەشىم قابىلداندى.

اقش بيلىگى لەند-ليز زاڭىن قابىلداۋ ارقىلى ۋكرايناعا قارۋ جەتكىزۋ پروتسەسىن جىلدامداتادى. ەندى ۇزاق ۋاقىتقا سوزىلاتىن كەلىسىم پروتسەسى قاجەت ەمەس، سونىمەن قاتار قارۋ-جاراقپەن بىرگە ازىق-تۇلىك، ءدارى-دارمەك پەن وق-ءدارى جانە وزگە دە قاجەتتىلىكتەرمەن قامتاماسىز ەتۋ مۇمكىندىگىنە يە بولدى. لەند-ليز بويىنشا اقش بيلىگى قارۋدى ەندىگى تاڭدا ەۋروپا مەملەكەتتەرىنەن ساتىپ الىپ، ۋكرايناعا تابىستاۋ مۇمكىندىگىن قولدانباق. بۇل تاسىمالداۋدى جىلدامداتۋ ءۇشىن قابىلدانىپ وتىرعان شەشىم.

دجو بايدەن اقش كونگرەسسىنەن ۋكرايناعا كومەك كورسەتۋ ءۇشىن قوسىمشا 33 ملرد دوللار ءبولۋدى سۇرادى. "سۇرانىمدى جىلدام قاراستىرىپ، تەز ماقۇلداۋ اسا ماڭىزدى. ءبىز رەسەيگە شابۋىلدامايمىز. ءبىز ۋكراينا ءوزىن قورعاۋى ءۇشىن وعان بارىنشا كومەكتەسىپ جاتىرمىز. پۋتين بۇل قانقۇيلى شابۋىلىن توقتاتۋعا شەشىم قابىلداي الادى", - دەدى بايدەن. قارجىنىڭ 20 ملرد دوللارى قورعانىس سالاسىنا جۇمسالماق.

اقش بيلىگى 33 ملرد دوللاردى جىلدام ءبولۋ كەرەكتىگىن ايتۋدا. سوڭعى بولگەن 3.5 ملرد دوللاردىڭ 250 ملن دوللارى عانا قالعان. سوندىقتان قوسىمشا قارۋ-جاراق جەتكىزۋ ءۇشىن، كونگرەسس شەشىمدى جىلدام قاراستىرۋى مۇمكىن دەيدى ماماندار.

رەسەي مەمدۋماسىنىڭ توراعاسى ۆولودين "لەند-ليز ارقىلى اقش ۋكراينانى قارىزعا باتىرادى" دەپ مالىمدەمە جاساپ، كسرو لەند-ليز بويىنشا ءوز قارىزىن 2006 جىلى (كسرو ورنىنا رەسەي) تولەپ بىتكەنىن جازىپتى. الايدا لەند-ءليزدىڭ شىعىنىنان رەسەيدىڭ شابۋىلى ۋكراينانى ەسەلەگەن شىعىنعا باتىردى. مىسالى ەكونوميكالىق تۇرعىدان قازىردىڭ وزىندە 500 ملرد دوللار شىعىنعا ۇشىرادى.

Abai.kz