قازاقستان پرەزيدەنتى قاسىم-جومارت توقاەۆ 26 مامىردا رەسمي ساپارمەن قىرعىزستانعا بارادى.

بۇل تۋرالى قىرعىزستان پرەزيدەنتى سادىر جاپاروۆ قازاقستان پرەمەر-ءمينيسترى ءاليحان سمايىلوۆتى قابىلداعاندا حابارلادى. جاپاروۆتىڭ مالىمدەۋىنشە، توقاەۆتىڭ بۇل ساپارى ەكى ەل ارىپتەسىنە "تىڭ سەرپىن" بەرەدى.

توقاەۆتىڭ قىرعىزستانعا ساپارلايتىنى ناۋرىز ايىنىڭ اياعىندا جوگوركۋ كەنەش سپيكەرى تالانت مامىتوۆتىڭ الماتىعا ساپارى كەزىندە ءمالىم بولعان. كەيىن اقپاراتتى قىرعىز ۇكىمەتى باسشىسىنىڭ ءبىرىنشى ورىنباسارى ارزىبەك كوجوشەۆ راستادى.

سادىر جاپاروۆ ءاليحان سمايىلوۆپەن كەزدەسۋدە ەكى ەلدىڭ قارىم-قاتىناسى "وتە جوعارى" دەڭگەيدە دامىپ كەلە جاتقانىن ايتتى. قىرعىز باسشىسى بىشكەك وسىنداي كورسەتكىشتىڭ ساقتالۋىنا بار كۇشىن سالاتىنىن مالىمدەدى.

قازاقستان ۇكىمەتىنىڭ باسشىسى قىرعىزستاننىڭ ەڭ باستى ساياسي، ەكونوميكالىق ارىپتەس ەكەنىن اتاپ ءوتتى.

قازاقستان قىرعىزستاننىڭ رەسەي مەن قىتايدان كەيىنگى ەڭ ءىرى ساۋدا ارىپتەسى. رەسپۋبليكالار تمد، ۇقشۇ، ەاەو جانە شىۇ سەكىلدى ۇيىمدارعا مۇشە.

توقاەۆتىڭ قىرعىزستانعا ساپارى قارساڭىندا قىرعىز تاۋارلارىن قازاقستان شەكاراسىنان وتكىزۋدى جەڭىلدەتۋ جونىندە كەلىسىم جاسالدى. بۇنىڭ الدىندا تاۋار تاسيتىن جۇك كولىكتەرى قىرعىز-قازاق شەكاراسىندا كەزەكتى ۇزاق كۇتۋگە ءماجبۇر بولعان.

Abai.kz