1 مامىر كۇنى كوكشەتاۋدا بەس ادامدى پوليتسيا قىزمەتكەرلەرى ۇيلەرىنەن الىپ كەتىپ، اكىمشىلىك سوتقا تارتتى.

ءدال وسى كۇنى قازاقستاننىڭ ءىرى قالالارىندا وپپوزيتسيا ميتينگىسى جوسپارلانعان ەدى: بىراق الماتىدا پوليتسيا شارا باستالماي جاتىپ ون شاقتى بەلسەندىنى ۇستاپ اكەتتى، كەيبىر قالالاردا قاۋىپسىزدىك شارالارى كۇشەيتىلدى.

كوكشەتاۋلىق بەلسەندى گاۋحار شاكەنوۆانىڭ ازاتتىققا ايتۋىنشا، بەلسەندىلەردىڭ بارلىعىن پوليتسيا ۇيلەرىنەن تاڭەرتەڭگى ساعات 9.30-دا ۇستاپ الىپ كەتكەن.

گاۋحار شاكەنوۆانىڭ ايتۋىنشا، پوليتسيا ولاردى "14 cاۋىردە كوكشەتاۋ قالاسىنىڭ سىرتىنا شىعىپ، بىرنەشە اۆتوكولىكپەن ۋكراينا جالاۋىن ۇستاپ، اۆتوشەرۋ جاساعانى ءۇشىن" جاۋاپقا تارتقان. سوت ونى “ميتينگىگە” بالاپ، قاتىسۋشىلارىن “رۇقسات ەتىلمەگەن ميتينگىگە قاتىسۋشىلار” رەتىندە ايىپتاپ، ەسكەرتۋ جاساعان. سوت پروتسەسى تاڭەرتەڭگى ساعات 10-نان كەشكى 17-گە دەيىن سوزىلعان.

ازاماتتىق بەلسەندى مۇنىڭ ءبارى وزدەرىن 1 مامىردا ميتينگىگە شىقپاۋ ءۇشىن جاسالعان ارەكەت دەپ سانايدى جانە سوت شەشىمىمەن كەلىسپەيتىنىن ايتادى. اقپاراتقا قاراعاندا، پوليتسيا بەلسەندىلەردى وسى شەرۋ ءۇشىن 26 ساۋىردە جاۋاپقا تارتپاق بولعان، بىراق ول جولى ەشقانداي شەشىم شىقپاعان.

Abai.kz