كورنەكتى اقىن ولجاس سۇلەيمەنوۆ «قازاقستان حالىق كونگرەسى» پارتياسىنىڭ قايتا قۇرىلاتىنىن مالىمدەدى. بۇعان دەيىن پارتيانى قايتا قاتارعا قوساتىنىن ايتقان سۇلەيمەن قازىرگى پرەزيدەنتتىڭ رەفورمالارىن قىزۋ قولدايتىنىن دا جەتكىزگەن.

بۇرىنعى بيلىكپەن 1991 جىلدان بەرى قويان-قولتىق جۇمىس ىستەگەن سۇلەيمەنوۆ «قازاقستان حالىق كونگرەسى» پارتياسىن قايتا قۇرۋى ساياسي ويىن ەرەجەلەرىنىڭ وزگەرمەگەنىن كورسەتەدى.

ماسەلەن، قوعام قايراتكەرى دوس كوشىم «سۇلەيمەنوۆتى بيلىك پايدالاندى» دەپ ەسەپتەيدى.

«ساياساتتا بەلگىلى ءبىر تۇلعالاردىڭ اتاق-داڭقىن، بەت-بەدەلىن پايدالانۋ دەگەن بار. سۇلەيمەنوۆتى بيلىك پايدالاندى. بۇرىنعىداي اشىق پايدالانباسا دا بيلىك وزىنە قاجەتتى دۇنيەلەرگە پايدالاندى. كومپارتيا تاراعانىنا ءبىر اي وتەر-وتپەستە 1991 جىلى 5 قازاندا سۇلەيمەنوۆ «قازاقستان حالىق كونگرەسى» پارتياسىن قۇردى. ول – كومپارتيانىڭ ساياسي بيۋرو مۇشەسى بولاتىن. ءبىر ايدا ادامنىڭ ساياسي كوزقاراسى، ۇستانىمى وزگەرىپ شىعا كەلۋى مۇمكىن ەمەس. بۇل – ەكىجۇزىدىلىك. ال ونىڭ پارتياسى قازاقستاننىڭ پارتيالىق، دەموكراتيالىق دامۋىنا قوسقان ۇلەسىن جانە وزگە دە سالاداعى پروبلەمالاردى كوتەرگەنىن كورگەن جوقپىن. سوندىقتان ولجاس كوممۋنيست بولىپ قالدى»، – دەدى دوس كوشىم arasha-عا بەرگەن پىكىرىندە.

«قازاقستان حالىق كونگرەسى» پارتياسى 1991 جىلى 5 قازاندا قۇرىلعان. پارتيانىڭ تەڭ توراعاسى بولىپ ولجاس سۇلەيمەنوۆ پەن مۇحتار شاحانوۆ سايلانعان. كەيىنەن م.شاحانوۆ توراعالىقتان كەتىپ، «ارال – ازيا – قازاقستان» قوزعالىسىنا اۋىستى. سوندىقتان پارتيانىڭ توراعالىق قىزمەتىن ۆ.روگالەۆ، گ.ەرعاليەۆا اتقاردى. پارتيانىڭ قۇرىلتايشىلارى «سەمەي-نەۆادا»، «ارال-ازيا-قازاقستان» قوزعالىستارى، «ايەلدەر وداعى»، «تاۋەلسىز بىرلەسۋ كاسىپوداعى»، «قازاق ءتىلى قوعامى» مەن «رەسپۋبليكا جاس قۇرىلىسشىلارى اسسوتسياتسياسى» جانە ۇلتتىق مادەني ورتالىقتار بولدى.

قحكپ پارتياسىنىڭ سولتۇستىك قازاقستان وبلىسىنان باسقا 18 وبلىستا ءوز ۇيىمدارى بولدى. پارتيا ءوزىنىڭ باس ورگانى «حالىق كونگرەسى»، «نارودنىي كونگرەسس» گازەتتەرىن 20000 تيراجبەن شىعارىپ تۇردى.

دەرەككوزى: arasha.kz

Abai.kz