«قاتەرلى ىسىككە شالدىققان رەسەي پرەزيدەنتى ۆلاديمير پۋتين بيىل ساۋىردە ەم قابىلداعان. ناۋرىز ايىندا وعان قاستاندىق جاسالدى. بۇل مالىمەتتەر اقش بارلاۋ قىزمەتكەرلەرىنىڭ قۇپيا بايانداماسىندا جازىلعان»، - دەيدى Newsweek اعىلشىن جۋرنالى.

باسىلىم دەرەكتەردى اقش بارلاۋ قوعامداستىعىنىڭ ءتورتىنشى قۇپيا بايانداماسىمەن تانىس اقش ۇلتتىق بارلاۋ ديرەكتورىنىڭ (ODNI) وكىلى، وتستاۆكاداعى اسكەري - اۋە كۇشتەرىنىڭ اعا وفيتسەرى جانە پەنتاگون بارلاۋ ءبولىمىنىڭ (DIA) قىزمەتكەرىنەن العان.

اقپارات بەرۋشىلەردىڭ ايتۋىنشا، ءپۋتيننىڭ كۇنى بىتۋگە جاقىن، ونى ءبارىنىڭ ءىشى سەزىپ وتىر. ءپۋتيننىڭ شەتەلدىك مەملەكەت باسشىلارىمەن كەزدەسۋلەرى ازايعان. ونىڭ بۇلاي وقشاۋلانۋى اقپارات الۋعا كەدەرگى كەلتىرىپ وتىر. ۋكراينامەن سوعىس باستالعالى بەرى، مالىمەت الۋ ءتىپتى قيىنداپ كەتكەن.

رەسەيدىڭ ۋكراينامەن سوعىس جۇرگىزىپ جاتقانىنا 3 ايدان استى. ازىرگە كەسكىلەسكەن مايداننىڭ توقتايتىن ءتۇرى كورىنبەيدى. پۋتين ءبىر كەلىسىمگە كەلۋدەن باس تارتىپ وتىر. ول ءالى دە بولسا رەسەي اسكەرىنىڭ كۇشتىلىگىنە سەنىپ وتىرعانعا ۇقسايدى. بۇگىنگى كۇنى ۋكراينادان 12,8 ميلليون ادام ءۇي-جايىن تاستاپ، بوسىپ كەتتى.

لۋگانسك اسكەري اكىمشىلىگىنىڭ باسشىسى سەرگەي گايدايدىڭ ايتۋىنشا، رەسەي لۋگانسك وبلىسىنداعى ەۋروپالىق دەڭگەيدەگى 400 كم-دەن استام جولدىڭ، 70-كە جۋىق زاماناۋي مەكتەپ پەن 50 بالاباقشانىڭ، 33 اۋرۋحانا مەن 237 اۋىلدىق امبۋلاتوريانىڭ تاس-تالقانىن شىعاردى. بۇل تەك ءبىر وبلىستاعى جاعداي.

بۇرىنعى رەسەيلىك بانكير، ميللياردەر سەرگەي پۋگاچەۆ رەسەيدىڭ ۋكرايناداعى ويرانىن ءۇشىنشى دۇنيەجۇزىلىك سوعىسقا تەڭەيتىنىن ايتىپتى.

«سوعىستىڭ ۇزاققا سوزىلاتىنىن بىلگەن ەدىم. سەبەبى بۇل سوعىس اتاتىن وق تاۋسىلعاندا ءبىر-اق توقتايدى. بۇل دەگەنىمىز بەلگىلى ءبىر ماعىنادا ءۇشىنشى دۇنيەجۇزىلىك سوعىسقا تەڭ، ال دۇنيەجۇزىلىك سوعىس ءۇش ايدا توقتاي قويمايدى. اسىرەسە، ەكى ەلدىڭ پرەزيدەنتتەرىن قوسا العاندا، كادرلىق وزگەرىستەر بولعان جوق... بۇل سوعىس الەمنىڭ قۇرىلىسىن ءۇش-اق ايدا وزگەرتىپ جىبەردى. بۇل وتە جىلدام بولدى»، - دەيدى ول.

رەسەيلىك جۋرناليست الەكساندر نەۆزوروۆ ەۋروپانىڭ ءالى ءپۋتيندى تاني الماي جۇرگەنىن ايتادى.

«ۋكراينانىڭ ءبىر بولشەگىن بەرىپ، ءپۋتيننىڭ ارانىن تولتىرامىز دەيتىندەر قاتەلەسەدى. ماكرون سياقتىلار، ءپۋتيننىڭ قاندى ازۋىنا حەرسون مەن دونەتسكىنى ءىلىپ بەرسەك، اگرەسسور سوعان ريزا بولىپ، شالقيىپ جاتادى دەپ ويلاپ ءجۇر. بۇل ماكرونداردىڭ پسيحياتريادان حابارى جوق ەكەن. ولار قانىشەرلەردىڭ ويىندا نە بار ەكەنىن بىلمەيدى. سىزدەرگە بەلگىلى، ازامزات بالاسى يادرولىق قارۋعا تارتىلىپ تۇراتىن قانىشەرلەر تۋرالى سانسىز فيلمدەرمەن تاربيەلەندى. ەندەشە قۇتتىقتايمىن. قانىشەر شىن ومىردە سوعان جەتتى.

24 اقپاندا وتكەن شاقتىڭ قاندى الەمىنەن كەلگەن كەلىمسەكتەر جەر شارىن قاپتادى. ولار بۇل الەمدى جان-تانىمەن جەك كورەدى. ولار بۇل الەمدى قورعاعىسى كەلمەيدى. ۋكرايناداعى ولىكتەردىڭ سانى ولاردى قورقىتپايدى، كەرىسىنشە شابىتتاندىرادى. ولارعا 100 مىڭداپ ولگەن ادامدار مەن قيراتىلعان قالالار ءالى دە ازدىق ەتەدى»، - دەپ سيپاتتادى نەۆزوروۆ رەسەيدىڭ ىلاڭىن.

ايجان تەمىرحان

Abai.kz