قازاقستاندا ءبىرىنشى اتوم ەلەكتر ستانتسياسىن (اەس) سالۋعا ءتورت مەردىگەردەن ءتىزىم جاسالدى. بۇل تۋرالى Tengrinews.kzكە سىلتەمە جاساپ، Abai.kz حابارلايدى. 

ەنەرگەتيكا مينيسترلىگىنىڭ ءباسپاسوز قىزمەتى مالىمەتىنشە، "سامۇرىق-قازىنا" قورى ۆەدومستۆو جانە مۇددەلى ۇيىمدارمەن بۇرىن ۇسىنىلعان ۇسىنىستار نەگىزىندە التى الەمدىك مەردىگەر تەحنولوگياسىن قارادى. ولار - امەريكالىق NuScale Power, امەريكا جانە جاپوندىق GE-Hitachi, كورەيالىق KHNP, قىتايلىق CNNC, رەسەيلىك "روساتوم" جانە فرانتسياداعى EDF.

"NuScale Power جانە GE-Hitachi ۇسىنعان از قۋاتتى رەاكتورلاردى سالۋ جانە پايدالانۋ بويىنشا الەمدىك تاجىريبەنىڭ جوقتىعىن ەسكەرە وتىرىپ، بۇل تەحنولوگيا اتوم ەنەرگەتيكاسىن كەيىنگى دامىتۋدىڭ پەرسپەكتيۆالىق باعىتى رەتىندە قاراستىرىلادى. قازاقستانداعى ءبىرىنشى اتوم ەلەكتر ستانتسياسى ءۇشىن جۇمىس تاجىريبەسى بار، تەكسەرىلگەن قۋاتتى رەاكتورلىق تەحنولوگيالارى بار ءتورت جەتكىزۋشىنىڭ قىسقاشا ءتىزىمى جاسالدى", - دەدى ۆەدومستۆو وكىلى.

Abai.kz