رەسەي باسىپ العان ۋكراينانىڭ بەرديانسك پورتىنان 7 مىڭ توننا زاڭسىز استىق تيەگەن «جىبەك جولى» كەمەسى تۇركيانىڭ قاراسۋ پورتىنا جەتكەندە ۇستالدى. بۇل تۋرالى ۋكراينانىڭ تۇركياداعى ەلشىسى ۆاسيلي بوندار حابارلاعان.

ء"بىز تۇركيا رەسپۋبليكاسىنىڭ بيلىك ورگاندارىمەن جاقسى قارىم-قاتىناستامىز. قابىلدانعان شەشىمدەر ۋكراينا ەگەمەندىگىن بۇزۋ ارەكەتتەرىنىڭ الدىن الادى دەپ سەنەمىن", - دەدى ەلشى.

بۇعان دەيىن «جىبەك جولى» جۇك كەمەسىنىڭ قازاقستاندىق KTZ Express Shipping كومپانياسىنا تيەسىلى ەكەنى ايتىلعان بولاتىن. دەگەنمەن، كەمەنى سانكت-پەتەربۋرگتەگى Green Line جشق جالعا العان، ءارى كەمەدە رەسەي تۋى ءىلىنىپ تۇر.

«قازاقستان تەمىر جولىنىڭ» ءتۇسىندىرۋى بويىنشا، «جىبەك جولى» جالعا بەرىلگەن، Green Line جشق كەمەنى جالعا العان يەسىنە كەلىسىم-شارتتىڭ ۋاقىتى بىتكەنشە ەشقانداي سانكتسياعا تۇسپەيتىنىنە كەپىلدىك بەرگەن.

قتج سونداي-اق Mangelbert OU كومپانياسىنىڭ باسشىلىعىنا سىلتەمە جاساي وتىرىپ، بەرديانسكىدەن استىقتى تاسىمالداۋ "ۋكراينا تاراپىنىڭ وتىنىشىمەن كەلىسىلگەن گۋمانيتارلىق ءدالىز بويىنشا جۇزەگە اسىرىلادى" دەپ مالىمدەدى.

Mangelbert OU ەستوندىق كومپانيا مەن تۇركيا مەملەكەتى اراسىندا استىق ساتۋ بويىنشا مامىلە بولعان.

«قازاقستان تەمىر جولى» جاعدايدى ەگجەي-تەگجەيلى انىقتاۋ ءۇشىن كەمەنى جالعا الۋشى تاراپقا حات جولداعان.

«قتج ءوزىنىڭ حالىقارالىق قۇقىق نورمالارعا ادالدىعىن راستايدى",-دەپ جازىلعان كومپانيانىڭ حابارلاماسىندا.

Abai.kz