قر ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ مەملەكەت باسشىسىنان سوگىس العاننان كەيىن وتستاۆكاعا قاتىستى پىكىر ءبىلدىردى.

«بۇل تۇرعىدا شەشىمدى مەن قابىلدامايمىن. وتستاۆكاعا جىبەرۋ تۋرالى شەشىمدى مەملەكەت باسشىسى قابىلدايدى. سوندىقتان وتستاۆكا ماسەلەسىنە قاتىستى ەشتەڭە دەي المايمىن. ءبىزدىڭ جۇمىسىمىزعا باعانى جوعارى باسشىلىق بەرەدى»، - دەدى سەرىكقالي برەكەشەۆ ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا.

ەسكە سالا كەتسەك، پرەزيدەنت قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆكە سوگىس جاريالادى.

«سالالىق مينيسترلىككە قاتىستى ايتساق، مينيسترگە سوگىس جاريالايمىن. بىرىنشىدەن، سوگىس جوعارىدا ايتقان كەمشىلىكتەر ءۇشىن بەرىلىپ وتىر. سونداي-اق، كيىكتەردىڭ كەلەشەك تاعدىرى تۋرالى تۇسىنىكسىز اۋرە-سارساڭ مەن پىكىرتالاس قالىپتاستىرعانى ءۇشىن سوگىس جاريالانادى. مۇنىڭ ءبارىن قوعامدىق تالقىلاۋدىڭ وسىنشالىق دەڭگەيىنە شىعارۋدىڭ قاجەتى نە؟ بۇل ماسەلەگە ۇلتىمىزدىڭ مەنتاليتەتىن ەسكەرە وتىرىپ، كاسىبي تۇرعىدا كەلۋ كەرەك. شىنىمەن دە، كيىك – قازاق حالقى ءۇشىن كيەلى جانۋار بولىپ ەسەپتەلەدى»، - دەگەن ەدى ۇكىمەت وتىرىسىندا مەملەكەت باسشىسى.

ايتا كەتەيىك، بۇعان دەيىن ەكولوگيا ءمينيسترى سەرىكقالي برەكەشەۆ پرەزيدەنت سىنىنان كەيىن كيىك پوپۋلياتسياسىن رەتتەۋ ماسەلەسى قايتا تالقىلانعانىن اتاپ ءوتتى.

Abai.kz