«رەسەي پرەزيدەنتى ۆلاديمير ءپۋتيننىڭ ورنىنا رەسەي قاۋىپسىزدىك كەڭەسىنىڭ حاتشىسى نيكولاي پاترۋشەۆ كەلۋى مۇمكىن. ۋكرايناداعى سوعىس باستالعاننان كەيىن ول كرەملدىڭ «قوزعاۋشى كۇشىنە» اينالدى جانە ونىڭ كوپشىلىك الدىندا سويلەگەنى بولاشاقتا رەسەي  پرەزيدەنتىنىڭ ورنىن باسقىسى كەلەتىنىن كورسەتەدى»، دەپ جازادى The Washington Post.

امەريكالىق باسىلىم پاترۋشەۆتىڭ ءپۋتيننىڭ ۇزاق مەرزىمدى وداقتاسى ەكەنىن، ولار كەڭەس وداعىنىڭ لەنينگرادتاعى مەملەكەتتىك قاۋىپسىزدىك كوميتەتىندە بىرگە قىزمەت ەتكەنىن اتاپ ءوتتى. ال رەسەي باسقىنشىلىق سوعىسىن باستاعان كەزدە قاۋىپسىزدىك كەڭەسىنىڭ حاتشىسى رەسەيدىڭ ميليتاريستىك ساياساتىن جەتكىزۋشىگە اينالدى. «پۋتين سوعىس اشقاندا، پاترۋشەۆتىڭ جۇلدىزدى ءساتى تۋدى»، - دەدى باسىلىمعا سۇحبات بەرگەن رەسەيلىك ساياسي كەڭەس بەرۋ R.Politik اگەنتتىگىنىڭ نەگىزىن قالاۋشى تاتيانا ستانوۆايا.

«ونىڭ يدەيالارى پۋتين قابىلدايتىن شەشىمدەردىڭ نەگىزىندە جاتىر. ول پۋتين تىڭدايتىن ساناۋلى تۇلعالاردىڭ ءبىرى»، - دەدى ول. باسىلىم ءپۋتيننىڭ دەنساۋلىعى جانە ونىڭ قاتەرلى ىسىككە شالدىققانى تۋرالى اقپاراتتى ەسكە ءتۇسىردى.

كرەملدىڭ ءباسپاسوز حاتشىسى دميتري پەسكوۆ The Washington Post گازەتىنە بەرگەن سۇحباتىندا پاترۋشەۆتىڭ ءرولى وزگەردى دەگەن بولجامدى «ويدان شىعارۋ» دەپ مالىمدەدى. پەسكوۆتىڭ ايتۋىنشا، پاترۋشەۆ ارقاشان «ساياساتتا سالماقتى ورنى بار» ادام بولعان.

Abai.kz