رەسەيدىڭ كراسنويارسك قالاسىندا سوت سۋرروگات انا بولعان قازاقستان ازاماتى تامارا يانديەۆانى ءۇش جىلعا ەركىنەن ايىردى. ول ادام ساۋداسىنا قاتىستى ايىپتى دەپ تانىلدى. يانديەۆا مەن ادۆوكاتى سوتتىڭ بۇل شەشىمىنە قارسى شاعىمداناتىنىن جەتكىزدى.

بۇل رەسەيدە سۋرروگات انا بولعانى ءۇشىن سوتتالعان العاشقى جاعداي. رەسەيدە سۋرروگات بولۋعا ەشقانداي تىيىم جوق.

اقپاراتقا قاراعاندا، يانديەۆا 2019 جىلى اگەنتتىكتەردىڭ بىرىمەن سۋرروگات انا بولۋ ءۇشىن كەلىسىمگە كەلىپ، شەتەلدىك جۇبايلاردىڭ بىرىنە بالا تۋىپ بەرگەن. نارەستە جارىق دۇنيەگە كەلگەننەن كەيىن، اتا-اناسىنا بەرۋى كەرەك بولعان، بىراق كوروناۆيرۋس پاندەمياسى باستالىپ، بالا سۋرروگات انانىڭ قولىندا قالىپ قويعان.

2021 جىلى اگەنتتىككە قارسى "ادام ساتۋ" بابى بويىنشا قىلمىستىق ءىس قوزعالعان. رەسەيدە سۋرروگات انا وتباسى كودەكسى جانە "ازاماتتاردىڭ دەنساۋلىعىن قورعاۋ نەگىزدەرى تۋرالى" زاڭمەن باقىلانادى. وعان سايكەس، بالالى بولا الماعان جۇپتار سۋرروگات انامەن كەلىسىمگە كەلىپ، اتا-انا بولا الادى.

2020 جىلى رەسەيدىڭ تەرگەۋ كوميتەتى ماسكەۋلىك رەپرودۋكتولوگ-دارىگەرلەردىڭ ءبىرازىن ادام ساۋداسىمەن ايىپتاعان. ولار كوروناۆيرۋسقا بايلانىستى سۋرروگاتتىق جولمەن دۇنيەگە كەلگەن 11 بالانى شەتەلدەگى اتا-اناسىنا ءوز ۋاقىتىندا جىبەرە الماي قالعان. نارەستەلەر بالالار ۇيىنە بەرىلگەن. بالالاردىڭ قۇجاتتارىن ازىرلەپ، اتا-انالارىمەن جۇمىس ىستەگەن اۋدارماشى كيريلل انيسيموۆ 2021 جىلى التى جىلعا باس بوستاندىعىنان ايىرىلعان. قالعان ايىپتالۋشىلاردىڭ ءىسى قارالىپ جاتىر.

Abai.kz