الماتى قالاسى بالالار شىعارماشىلىعىنا كەڭىنەن نازار اۋدارىپ، كوڭىل ءبولىپ كەلەدى. بۇگىنگى بالا ەرتەڭگى ەل تىزگىنىن ۇستار جان بولماق. ءار بالانىڭ دارىنى مەن قابىلەتىن اشا ءبىلۋ ماڭىزدى. ءار بالانىڭ بويىنداعى قابىلەتتى دەر كەزىندە بايقاپ، ونى شىڭداي بىلسە، تولاعاي تابىستار مەن جەتىستىكتەردىڭ اۋىلى الىس بولماق ەمەس. قالا باسشىلىعى بۇل ماقساتتاردى ءجىتى ءتۇسىنىپ، ۇدايى ءتۇرلى بايقاۋلار مەن سايىستاردى ۇيىمداستىرىپ كەلەدى. كۇنى كەشە عانا ءدال سونداي ءدۇبىرلى دودا ءوتتى. 

21-22 شىلدەدە الماتىداعى «الاتاۋ» ءداستۇرلى ونەر تەاترىندا «باقىت دەگەن - سەنىڭ بالا كۇندەرىڭ» اتتى جىل سايىنعى بالالار ۆوكالدىق فەستيۆال-بايقاۋىنىڭ التىنشى كەزەڭى ءوتتى.

بيىل بايقاۋعا قاتىسۋعا قازاقستاننىڭ ءار وڭىرىنەن 425 ءوتىنىش تۇسكەن. ۆوكالدىق جاعىنان مىقتى دەپ تانىلعان 20 بالا فەستيۆالعا ىرىكتەلىپ الىندى، ال بايقاۋعا 6 مەن 15 جاس ارالىعىنداعى 10 بالا قاتىستى.

فەستيۆال بيىل التىنشى رەت وتكىزىلىپ وتىر. وتكەن 5 ماۋسىمدا بارلىعى 7000 ءوتىنىش تۇسكەن. فەستيۆالدىڭ 50-دەن استام قاتىسۋشىسى رەسەيدەگى «گولوس. دەتي» «بالالار ەۆروۆيدەنيەسى»، «قازاقستان داۋىسى»، «بالا داۋىسى» جانە «Central Asia’s got talent» سەكىلدى وتاندىق جانە شەتەلدىك بايقاۋلاردىڭ لاۋرەاتى اتانعان.

بايقاۋ ەكى كەزەڭنەن تۇرادى. ءبىرىنشى كۇنى بايقاۋعا قاتىسۋشىلار وتاندىق جانە شەتەلدىك سينگلداردى ورىندادى. ەكىنشى كۇنى ونەرپاز بالالار الىشەر كارىموۆ، انەل ارەنوۆا، سالتانات قۇدايبەرگەن جانە باسقا دا ەسترادا جۇلدىزدارىمەن بىرىگىپ دۋەت ايتتى.

بايقاۋدىڭ سۋپەرگران-پري جۇلدەسى ورال قالاسىنان كەلگەن 8 جاستاعى ايبيكە ساتپاەۆاعا بۇيىردى، ال گران-ءپريدى تالدىرقورعاننان كەلگەن 11 جاستاعى يمانگەلدى اياۋلىم جەڭىپ الدى. فەستيۆالدىڭ ءادىل قازىلار القاسىنىڭ مۇشەلەرى: قازاقستاننىڭ ەڭبەك سىڭىرگەن ءارتيسى ايجان نۇرماعانبەتوۆا، ءانشى بەك ورالبەكوۆ، پروديۋسەر اينۇر راحيموۆا جانە كومپوزيتور يۋليا لەبەدەۆا.

ءىس-شارا دەمەۋشىلەردىڭ قولداۋىمەن ۇيىمداستىرىلدى. فەستيۆالدى تاماشالاۋ تەگىن بولدى.

Abai.kz