بەيسەنبى, 6 قازان 2022
دەي سالدىم-اۋ 1658 15 پىكىر 11 تامىز, 2022 ساعات 15:16

«ءار نارسەنى ۋاقىتىندا اياقتاۋ كەرەك، مەن دە سولاي جاسادىم»

جامبىل وبلىسىنىڭ بۇرىنعى اكىمى، مەملەكەت قايراتكەرى بەردىبەك ساپارباەۆ «جەلمايا» youtube باعدارلاماسىندا قاڭتار وقيعاسىنا قاتىستى پىكىرىن ءبىلدىردى.

قوعام قايراتكەرى قاڭتار وقيعاسىنان ساباق الىپ، پرەزيدەنتتىڭ قازىرگى جۇرگىزىپ وتىرعان ساياساتىن قولداۋىمىز ماڭىزدى ەكەنىن ايتتى.

«قاڭتار وقيعاسى كەزىندە باستىسى ەلىمىزدە تەزىرەك تىنىشتىق ورناسا ەكەن، ادام شىعىنى بولماسا ەكەن دەپ تىلەدىم. جامبىل وڭىرىندە جۇمىس ىستەپ جاتقاندىقتان ماعان الدىمەن كەرەگى پرەزيدەنتتىڭ تاپسىرماسى بولدى. ول جامبىل حالقىنىڭ قاۋىپسىزدىگىن قامتاماسىز ەتۋ. وقيعا كەزىندە ءوزىمنىڭ تاجىريبەم مەن كۇشىمدى ىسكە قوستىم، ارىپتەستەرىممەن، اسىرەسە قۇقىق قورعاۋ ورگاندارى، پروكۋراتۋرا، اسكەر بار سولارمەن بىرىگىپ، حالىقتى تىنىشتاندىرۋ، تۇراقتاندىرۋ بولدى. ەكى كۇندە سونىڭ ءبارىن ورناتتىق، وكىنىشكە قاراي ادام شىعىنى بولدى. بارلىق مۇمكىندىكتى پايدالانىپ، ادام شىعىنى بولعان وتباسىلارعا قولدان كەلگەن كومەگىمىزدى جاسادىق. ءبىز ەندى وسى وقيعادان ءتيىستى ناتيجە شىعارىپ، ساباق الۋىمىز كەرەك. قانداي كەمشىلىكتەر جىبەردىك، سونى ەسكەرۋىمىز كەرەك... بارلىعىمىز تاۋەلسىزدىگىمىزدى ساقتاپ قالۋىمىز كەرەك. ول ءۇشىن ءبارىمىز بىرىگۋىمىز قاجەت. مەملەكەت باسشىسىنىڭ قازىر جۇرگىزىپ وتىرعان ساياساتىن قولداۋىمىز كەرەك. بىزگە بولىنۋگە بولمايدى، ول ەش ۋاقىتتا جاقسىلىققا اپارمايدى»، - دەدى ساپارباەۆ.

69 جاستاعى بەردىبەك ساپارباەۆ بيىل ءساۋىردىڭ جەتىسىندە جامبىل وبلىسىنىڭ اكىمى قىزمەتىنەن بوساتىلعان بولاتىن. سودان بەرى زەينەت دەمالىسىندا.

«45 جىلداي مەملەكەتتىك قىزمەتتە جۇمىس ىستەدىم، ونىڭ 30 جىلدان استامى بيلىك سالاسىندا ەكەن. قىزمەتتەن كەتكەن ءۇش ايدا 40 جىلدا ىستەمەگەن جۇمىستاردى اتقاردىم دەسەم بولادى. اسىرەسە بالالارىم، نەمەرە، اعايىن، تۋىسقان، دوستارعا باردىم. ءار ازامات وزىنە ۇنايتىن جۇمىسپەن اينالىسۋى كەرەك. سول كەزدە ادام توق بولادى، ونىڭ بولاشاعى بار ءارى باقىتتى بولادى. قانشا جىل جۇمىس ىستەگەندە شامام كەلگەنشە حالىقتىڭ سەنىمىنەن شىعىپ، جاعدايىن جاقسارتۋعا تىرىستىم. ءار نارسەنىڭ ءوز باستاۋى مەن اياقتالۋى بولادى. ودان كەيىن ءار نارسەنى ۋاقىتىندا اياقتاۋ كەرەك، مەن دە سولاي جاسادىم. ەڭبەك ەتكەن بەس وڭىردە جامان جۇمىس ىستەمەگەن سياقتىمىن»، - دەدى ول.

ول الداعى ۋاقىتتا كوپ جىلدىق مەملەكەتتىك قىزمەتتىك ومىردەن العان تاجىريبەسىن قورىتىپ كىتاپ جازۋمەن جانە جوعارى وقۋ ورىندارىندا ءدارىس بەرۋمەن اينالىسپاق.

«ادام بولعان سوڭ ءومىر قىزمەتپەن توقتاپ قالمايدى، جالعاسا بەرەدى. باستىسى ويلاۋ قابىلەتىمدى توقتاتپاۋىم كەرەك، زەينەتكە شىقتىم ەكەن دەپ ۇيدە وتىرىپ قالۋعا بولمايدى. ادام ۇيدە وتىرىپ قالسا – تەز قارتايادى. بۇعان دەيىن جيناعان ارحيۆتەرىم بار، الداعى ۋاقىتتا كىتاپ جازۋ ويدا بار. قاي وڭىردە جۇمىس ىستەسەم دە، نە ىستەگەنىمدى جازىپ جۇرەتىن ادەتىم بار.  كىممەن كەزدەستىم، قاي جەرگە بارعانىمدى كۇندەلىك رەتىندە جازىپ جۇرەتىنمىن. قازىر سونىڭ بارلىعىن توپتاستىرىپ، قاراپ جازىپ شىعۋىم كەرەك. ويتكەنى ارتىمنان قانداي دا ءبىر ەستەلىك قالۋ كەرەك»، - دەيدى بەردىبەك ساپارباەۆ.

Abai.kz

15 پىكىر