«اۋىل اماناتى» جوباسى بويىنشا 2300-دەن استام اۋىل جانە اۋىلدىق وكرۋگ اكىمدەرى حالىقتىڭ ەكونوميكالىق بەلسەندىلىگىن ارتتىرۋ ماقساتىندا ۇيىمداستىرىلعان بىلىكتىلىكتى جەتىلدىرۋ كۋرستارىن ءساتتى ءتامامدادى. وقىتۋ كۋرستارى «امانات» پارتياسىنىڭ ساياسي مەنەدجمەنت اكادەمياسى قىزمەتى مەن قر ۇكىمەتىنىڭ بىرلەسكەن جوباسى اياسىندا ىسكە اسىرىلىپ جاتىر. بۇگىن ءبىلىم بەرۋ باعدارلاماسىنىڭ قورىتىندىسى شىعىپ، ارنايى كۋرسقا قاتىسقان ازاماتتار اۋىل ەكونوميكاسىن دامىتۋ باعىتتارىن يگەرىپ، ماركەتينگتىك تالداۋ جاساۋدى ۇيرەنگەن.

«امانات» پارتياسىنىڭ كەزەكتەن تىس ءححىى سەزىندە مەملەكەت باسشىسى قاسىم-جومارت توقاەۆ باسشىلاردى دايارلاۋ ساپاسىن جاقسارتۋدى، جۇيەلى، تولىققاندى دايىندىق باعدارلامالارىنا كوشۋدى، سونداي-اق جەرگىلىكتى جەرلەردە پارتيا اكتيۆىن وقىتۋ ءۇشىن كوشپەلى ترەنينگتەر وتكىزۋدى تاپسىرعان بولاتىن. سوندىقتان، ساياسي مەنەدجمەنت اكادەمياسى پارتيالىق وقىتۋ جۇيەسىندە جاڭا ءارى ساپالى ءتاسىلدى ىسكە اسىردى. ەلىمىزدەگى الەۋمەتتىك-ەكونوميكالىق جانە ساياسي جاڭارۋدى ەسكەرە وتىرىپ، دەپۋتاتتارعا، اكىمدەر مەن پارتيا بەلسەندىلەرىنە ارنالعان زاماناۋي وقىتۋ باعدارلامالارى ازىرلەندى. بيىل 13 ماۋسىم مەن 20 شىلدە ارالىعىندا “امانات” پارتياسىنىڭ ساياسي مەنەدجمەنت اكادەمياسى «اۋىل اماناتى» جوباسى اياسىندا اۋىل اكىمدەرىنىڭ بىلىكتىلىگىن جەتىلدىرۋ ماقساتىندا ەلىمىزدىڭ بارلىق 17 وڭىرىندە اۋىل جانە اۋىلدىق وكرۋگ اكىمدەرىن كەشەندى وقىتۋدان وتكىزدى»، – دەدى اكادەميا ديرەكتورى مىندەتىن اتقارۋشى ساۋلە باقتىمبەت.

«اۋىل اماناتى» – اۋىل تۇرعىندارىنىڭ تابىسىن ارتتىرىپ، حالىقتىڭ ءومىر ءسۇرۋ ساپاسىن جاقسارتۋعا، اۋىل تۇرعىندارىن اگروبيزنەسكە تارتۋعا، اۋىلشارۋاشىلىعى تاۋارىن وندىرۋشىلەردى قولداۋعا، ازىق-تۇلىك قاۋىپسىزدىگىنە بايلانىستى ماسەلەلەردى ءبىر جاقتى ەتۋگە، اۋىلداردىڭ ەكونوميكالىق جانە ماماندانۋىن انىقتاۋعا ارنالعان «امانات» پارتياسىنىڭ قولعا العان جوباسى. بۇل ءىستى ءساتتى اتقارىپ شىعۋ ءۇشىن پارتيا جانىنان ارنايى جوبالىق كەڭسە ىسكە قوسىلعان.

«جاڭا ادىستەمە ءاربىر ەلدى مەكەننىڭ گەوگرافيالىق ەرەكشەلىگى، جەر، سۋ، ەڭبەك، قارجىلىق، وزگە دە رەسۋرستار بويىنشا ساندىق كورسەتكىشەرىن جيناۋعا باعىتتالادى. وسىلايشا، ءاربىر اۋىلدىڭ ەكونوميكالىق ماماندانۋ باعىتىن انىقتاۋعا، اتاپ ايتقاندا قاي وڭىردە قانداي اۋىل شارۋاشىلىعى ءونىمىن وسىرۋگە نەمەسە ءوندىرىستىڭ تۇرلەرىن اشۋعا بولاتىنىن كورسەتەدى. اۋىلدىق جەرلەردى ارالاۋ جالپى 7,7 ميلليون تۇرعىندى قامتيتىن 2400 اۋىلدىق وكرۋگتە جۇرگىزىلەدى، - دەدى “امانات” پارتياسىنىڭ حاتشىسى ەلدار جۇماعازيەۆ

جوبانىڭ باستى شارتى ول – حالىققا 2,5% مولشەرلەمەدە نەسيە بەرۋ ارقىلى اۋىلداعى كاسىپكەرلىكتى جانە قىزمەت كورسەتەتىن سەرۆيستىك-دايىنداۋ كووپەراتيۆىن قۇرۋ بولىپ سانالادى.

پرەزيدەنت قاسىم-جومارت توقاەۆ بيىلعى 11 قاڭتارداعى ءماجىلىس وتىرىسىندا 2025 جىلعا دەيىن حالىق تابىسىن ارتتىرۋ كەرەك دەپ ۇكىمەتكە تاپسىرما بەرگەن بولاتىن. مەملەكەت باسشىسىنىڭ تاپسىرماسىن ورىنداۋ جانە 2025 جىلعا دەيىن حالىق تابىسىن ارتتىرۋ ماسەلەلەسىن شەشۋدى قولعا العان امانات پارتياسى «اۋىل اماناتى» جوباسىن ۇيىمداستىردى.

جوبا اياسىندا ىسكە اسىرىلىلىپ، ءساتتى اياقتالعان اۋىل اكىمدەرى مەن وڭىرلىك پارتيا وكىلدەرىنىڭ ەكونوميكالىق بىلىكتىلىگىن جەتىلدىرۋ كۋرسى تۋرالى ۇيىمداستىرۋشىلار بىلاي دەيدى: اۋىل، اۋىلدىق وكرۋگ اكىمدەرى مەن پارتيانىڭ اۋماقتىق فيليالدارىنىڭ اتقارۋشى حاتشىلارىن قوسقاندا بارلىعى 2346 ادام وقىتىلدى. ولاردىڭ 89%-ى ەر ادامدار بولسا، 8%-ى، ياعني 192 ادام – ايەل-اكىمدەر. كۋرس «تابىستى كوبەيتۋ ماقساتىندا حالىقتىڭ ەكونوميكالىق بەلسەندىلىگىن ارتتىرۋ سالاسىندا باسشىنىڭ بىلىكتىلىگىن جەتىلدىرۋ» تاقىرىبىندا كوشپەلى 3 كۇندىك سەمينار فورماتىندا ۇيىمداستىرىلدى. سپيكەر رەتىندە ءتيىستى سەرتيفيكاتى بار 30 ترەنەر، اۋىل شارۋاشىلىعى، ونەركاسىپ جانە تۋريزم سالاسىنداعى ساراپشىلار شاقىرىلدى. ولار جالپى سانى 80 سەمينار وتكىزدى.

«ۇلى دالا» اۋىل بيزنەسىن دامىتۋ قاۋىمداستىعى» قب پرەزيدەنتى اقمارال بەكمۇرزاەۆا ەلىمىزدە ازىق-تۇلىك تاۋارلارى ءوندىرىسىنىڭ 70%-ى جەكە قوسالقى شارۋاشىلىقتاردىڭ جيىنتىق ۇلەسىنە تيەسىلى ەكەنىن ايتادى.

«وسى دايەكتەر ەلدىڭ ەكونوميكالىق كليماتىن قالىپتاستىراتىن اۋىلدار مەن اۋىلدىق وكرۋگتەردى دامىتۋ قانشالىقتى ماڭىزدى ەكەنىنىڭ دالەلى بولا الادى. ءبىز كۋرسقا قاتىسۋشىلاردى ساۋاتتى بيزنەس-جوسپارىن ازىرلەۋگە، جوبانى قارجىلاندىرۋ كوزىن ىزدەۋگە ۇيرەتۋگە تىرىستىق. كووپەراتيۆ قۇرۋ مەن ءونىم وتكىزۋ تىزبەگىن قالىپتاستىرۋ جونىندە ترەنينگتەر ۇيىمداستىرىلدى. تەحنولوگيالىق كارتالار ۇسىنىسى قاتاڭ ساقتالعان جاعدايدا عانا ءونىمدى وندىرىسكە قول جەتكىزۋگە بولادى. تۇرعىنداردىڭ تابىسىن ارتتىرۋدى تالاپ ەتىپ قانا قويماي، ونى قالاي ىسكە اسىرۋعا بولاتىنىن كورسەتۋ ماڭىزدى»، – دەيدى اقمارال بەكمۇرزاەۆا.

«اۋىل اماناتى» جوباسى اياسىندا ۇيىمداستىرىلعان كۋرسقا قاتىسۋشى اقمولا وبلىسى شورتاندى اۋدانى بەكتاۋ اۋىلدىق وكرۋگىنىڭ اكىمى اسقار ماحفۋز باعدارلامادان وزىنە قاجەتتى ءبىلىم العانىن ايتادى.

«دارىسكەرلەر ماركەتينگتىڭ زاماناۋي قۇرالدارىنىڭ نەگىزدەرىن، بولاشاعى بار بيزنەس-جوبالاردى انىقتاۋ ادىستەرىن ناقتى مىسالدارمەن ءتۇسىندىردى. تەوريادان بولەك، جەم-ءشوپ دايىنداۋ، ەت جانە ءسۇت باعىتىنداعى مال شارۋاشىلىعىن دامىتۋ، ىرىمشىك جاساۋ جانە تاعى باسقا وزەكتى باعىتتار مىسالىندا بيزنەس-جوسپارلار جاسادىق. جۇمىس داپتەرىندە جوبالاردىڭ ناقتى ەسەبى جاسالدى. سوندىقتان، العان ءبىلىمىمىز تۇرعىندار تابىسىن ارتتىرۋعا، تۇراقتى جۇمىس ورىندارىن قۇرۋعا كومەكتەسەدى دەپ سەنەمىن»، – دەدى اسقار ماحفۋز.

ەلدار جۇماعازيەۆ «اۋىل اماناتى» جوباسىنىڭ نەگىزگى مىندەتتەرىنىڭ ءبىرى – وراۋ، تەمپەراتۋرالىق ساقتاۋ سياقتى قاجەتتى پۋنكتتەردى ەنگىزە وتىرىپ، «ەگىستىكتەن سورەگە دەيىن» قاعيداتى بويىنشا وتكىزۋ تىزبەكتەرىنىڭ جاپپاي جەلىسىن قالىپتاستىرۋ قاجەت ەكەنىن اتادى.

«وسى جۇمىستاردىڭ بارلىعىن جۇيەلى ۇيىمداستىرۋ ءۇشىن ەلىمىزدەگى بارلىق سالالىق باعدارلامانى بىرىكتىرە وتىرىپ، كاسىپكەرلىكتى دامىتۋدى قولداۋدىڭ بىرىڭعاي ۇلتتىق باعدارلاماسىن قابىلداۋ كەرەك. بۇل الگوريتمدە كاسىبىن اشقان ازاماتتارعا سالىقتىق جەڭىلدىكتەر بەرۋ، بيزنەستى عىلىممەن بايلانىستىرۋ، كاسىپكەرلىكتى قارجىلاندىرۋدى قايتا قاراۋ سەكىلدى ماڭىزدى ماسەلەلەر كورسەتىلەدى»، - دەدى ەلدار جۇماعازيەۆ.

الداعى ۋاقىتتا «اۋىل اماناتى» جوباسى بويىنشا امانات پارتياسى وكىلدەرى 179 اۋدانداعى 394 اۋىلعا بارۋدى كوزدەپ وتىر. وسىلايشا، 250 مىڭنان استام قازاقستاندىق جوبامەن تانىساتىن بولادى. «اۋىل اماناتىنىڭ» العاشقى توبى جۇمىسىن 28 شىلدەدە ماڭعىستاۋ وبلىسىنان باستاماق. ءارى قالاي جۇمىس توبى اقمولا، شىعىس قازاقستان، اتىراۋ وبلىستارىنا بارادى. قالعان وڭىرلەردە جۇمىس كەستەگە سايكەس جالعاسادى.

Abai.kz