جۇما, 30 قىركۇيەك 2022
46 - ءسوز 1303 7 پىكىر 15 تامىز, 2022 ساعات 13:54

تاۋبەڭە كەل دەيتىندەي، بۇكىل حالىق كۇناھار ما؟

يمامدار مەن مولدالار ءبىر دە ءبىر جەمقور باسشىعا تاۋبەڭە كەل دەپ ايتپايدى. تەك حالىققا ايتادى. سوندا جۇزدەگەن ميللياردتاردى توناپ جوق قىلعان حالىق بولىپ تۇر ما؟ تاۋبەڭە كەل دەيتىندەي بۇكىل حالىق كۇناھار ما؟ بۇكىل حالىق جەمقور ما؟

ءجاي قاراپايىم ادامدار ءبىر ءجىپ ۇرلاسا، كورىندە جىلانعا تالانادى.
ال، ميللياردتاپ توناعاندار ەل تىزگىنىن ۇستاعان اسىل ازاماتتار بولىپ اتالادى. مىنە، قۇداي ۇرعان مولدالار وسىنداي بولىپ تۇر. مەن بۇرىن جۇما نامازىنا ۇنەمى باراتىن ەدىم. قۇدايعا دۇعا جاساپ، جاماعاتپەن نامازدا بولۋشى ەدىم. ءوزىمدى مۇسىلماننىڭ بالاسى سانايمىن. قۇدايدىڭ بارىنا سەنەمىن. قۇدايدان ەلىمە جاقسىلىقتى تىلەيمىن. بىراق مىناۋ سۇرقيالاردىڭ وسىنداي ۋاعىزىنان كەيىن اياعىم تارتپاي كەتتى. جۇمادا وسى سوزدەردى ەستىگەندە مەشىتتە وتىرۋعا شىدامىم دا، ءتوزىمىم دە جەتپەيدى.

ەگەر مولدالار ەلىن اڭىراتقان جەمقورلاردى ۋاعىزبەن باۋىزداسا، كوردەن الىپ، كورگە سالسا، قۇداي مەن حالىق الدىندا ادىلدىگىن ايتىپ جۇرسە، بۇلاردى حالىق ادام دەپ سانايتىن ەدى، وندا سەنۋگە بولار ەدى. بۇلار تۋرا قازىرگى بيلىكتىڭ ەلگە جاساعان سۇمدىعىن كورىنبەيتىن يدەولوگيا ارقىلى جاساۋمەن كەلەدى. بۇلارعا نە ءۇشىن سەنۋىم كەرەك؟... قۇداي اتىن جامىلىپ، جەمقورلاردى اسىلدار دەپ، حالقىن توزاقپەن قورقىتقانى ءۇشىن قۇرمەتتەۋىم كەرەك پە؟
حالىق قۇدايدىڭ ەكىنشى اتى دەگەندى تۇسىنبەگەن ءاربىر مولدا ناعىز ناداننىڭ نادانى دەپ سانايمىن.

مولدالاردى باۋىزداۋدا اباي مەن شاكىرىمنەن اسقان قاساپشىلار بولماعان. بۇلار وسى ەكى دانانى وقىسىن، وزدەرىن سوندا تانيدى.

بەكبولات قارجان

Abai.kz

 

7 پىكىر