2022 جىلى ءساۋىر-ماۋسىم ايلارىندا قازاقستانعا رەسەيدەن 570 مىڭ ادام كەلگەن. وسى ۋاقىت ارالىعىندا شەكارادان 4,99 ملن رەسەي ازاماتى وتكەن. بۇل العاشقى ءۇش ايمەن سالىستىرعاندا 28 پايىزعا كوپ. بۇل جونىندە رەسەي فسب دەرەگىنە سۇيەنگەن ربك سايتى جازدى.

سايتتىڭ حابارلاۋىنشا، رەسەي ازاماتتارىنىڭ پوستسوۆەتتىك ەلدەرگە ساپارى جيىلەگەن، اسىرەسە قازاقستان، ارمەنيا، گرۋزياعا باراتىندار كوبەيگەن.

2021 جىلدىڭ ەكىنشى توقسانىمەن سالىستىرعاندا بيىل وسى كەزەڭدە رەسەيدەن قازاقستانعا– 2,9 ەسە (568 مىڭ ادام), ارمەنياعا – 1,5 ەسە (180 مىڭ), گرۋزياعا 5,7 ەسە (163 مىڭ) كوپ ادام كەلگەن.

ۋكراينادا سوعىس باستالعالى بەرى اتالعان ەلدەر رەسەيلىكتەر مەن رەسەيلىك كومپانيالار ءجيى باراتىن باعىتقا اينالعان. سانكتسياعا بايلانىستى حالىقارالىق تولەم جۇيەلەرىن پايدالانۋ مۇمكىندىگىنەن ايىرىلعان رەسەي ازاماتتارى "كارتوچكا اشۋ" ماقساتىندا وزبەكستان نەمەسە ارمەنيا سياقتى ەلدەرگە ءجيى جول جۇرە باستاعان.

اقپاراتقا قاراعاندا، ارمەنيا، گرۋزيا جانە قازاقستانعا بارعان رەسەي ازاماتتارىنىڭ باسىم بولىگى تۋريستىك ەمەس، جەكە شارۋالارىمەن بارعان. وسىنداي ماقساتپەن قازاقستانعا – 494 مىڭ ادام ء(بىر جىل بۇرىن بۇل كورسەتكىش 114 مىڭ بولعان), گرۋزياعا 150 مىڭ ء(بىر جىل بۇرىن – 19 مىڭ) ادام بارعان.

ەۋروپا ەلدەرىنە بارۋ مۇمكىندىگى ازايعان شاقتا 2022 جىلدىڭ ەكىنشى توقسانىندا تۇركياعا ساپارلايتىن رەسەيلىكتەر بىلتىرمەن سالىستىرعاندا ءۇش ەسەگە كوبەيىپ، 1,03 ملن ادامعا جەتكەن.

"دوستىق پەيىلدە ەمەس" دەپ تانىلعان ەلدەرگە ساپار كۇرت ازايعان. فسب مالىمەتىنشە، بىلتىر ەكىنشى توقساندا اقش-قا 36,7 مىڭ ادام كەتسە، بيىل وسى كەزەڭدە 39 ادام عانا بارعان.

ەۋرووداق ەلدەرىنە ساپار دا 36 پايىزعا ازايعان. دەگەنمەن ليتۆا (14,7 پايىزعا كوپ نەمەسە 66 مىڭ ادام), فينليانديا (41,7 پايىزعا كوپ نەمەسە 145 مىڭ ادام), ەستونيا اۋماعىنا (3,6 ەسە نەمەسە 172 مىڭ ادام) جول جۇرگەن رەسەيلىكتەردىڭ ارتقانى بايقالعان. فينليانديا مەن ەستونياعا بارعانداردىڭ 80 پايىزى ساپارىنىڭ ماقساتىن "جەكە شارۋا" دەپ كورسەتكەن.

Abai.kz