الەمدە گەوساياسي تۇرعىدا تەكتونيكالىق سىلكىنىس بولىپ جاتىر...
21-عاسىرعا جەتكەن رەسەيلىك يمپەريالىق سانا رەسەي حالقىن جاپپاي سوعىسقا يتەرمەلەدى.

بۇۇ تاۋەلسىزدىگى مەن تەرريتورياسى مويىندالعان ۋكراينا مەملەكەتى مەن ونىڭ كوپۇلتتى حالقى ءوز تاۋەلسىزدىگى ءۇشىن جانتالاسا ورىس باسقىنشىلارىنا قارسى شايقاسۋدا...

العاشقىدا بوسقىنداپ كەتكەن 8 ملن حالىقتىڭ ىشىنەن ەر-ازاماتتارى وتانىن قورعاۋ ءۇشىن ەلىنە قايتىپ جاتىر، باستارىن وتان ءۇشىن ولىمگە تىگىپ جاتىر...
ولاردىڭ اراسىندا ەسكى تانىس، اعا دوس، ۋكراينا عىلىم اكادەمياسىنىڭ اكادەميگى رۇستەم جانعوجيننىڭ ۇلى نۇرجان دا ۋكراينا حالىق ارمياسى قاتارىندا سوعىسىپ جاتىر دەپ ەستىپ، ونىڭ اماندىعىن تاڭىردەن تىلەپ وتىرمىز...

وسى جاعدايدا قازاقستانعا سوعىستان قاشقان رەسەيلىكتەر اعىلىپ كەلىپ جاتىر...

ولاردىڭ سانى تۋرالى كوپتەگەن دەرەكتەر ايتىلۋدا.
رەسەيلىكتەر كەلىپ، سانكتسياداعى رەسەيلىك تۋىستارىنا قازاقستاندىق يمپورت تاۋارلارىن جونەلتىپ، كومەكتەسىپ، ءارى، بيزنەستەرىن جۇرگىزىپ جاتىر...
قازاقستان مەملەكەت "قوسالقى سانكتسياعا" ۇشىراۋ قاۋپىنە تاپ بولۋدا...
وسى جاعدايدا حالىق نە ماسەلەنى كوتەرۋى ءتيىس؟

ارينە - مەملەكەت ماسەلەسىن كوتەرۋى ءتيىس.

ول ءۇشىن ساياسي بىلىكتىلىكتى، ءبىلىمدى، كاسىپكەرلىكتى، عىلىمي جەتىستىكتى، جالپى ايتقاندا - ميدى، ياعني، اقىل-ويدى ىسكە قوسۋى كەرەك ەدى...
فەيسبۋك - حالىق پىكىرىنىڭ ايناسى، كوشىرمەسى...

بۇگىن اشىپ قالسام، ءبىر "ۇستاز" قاسىنا سالدەسى بار زىڭگىتتەي كىل ەركەكتى جيىپ اپ، ءبىر نارسەنى قىزۋ تالقىلاپ جاتىر ەكەن...

ويلاپ قالدىم: ەلدى قالاي قورعايمىز، تاۋەلسىزدىكتى قالاي ساقتايمىز، ەكونوميكامىزدى قالاي قاۋىپسىز ەتەمىز جانە ت.ت. ەلدىك ماسەلەلەردى تالقىلاپ جاتقان شىعار دەپ...

دىبىستى قوستىم...
سويتسەم، ابدەن تويىنعان كىل ەركەك "قازاقتىڭ ارۋاعى قاتىنعا قالاي بالا تۋعىزادى" دەگەن ماسەلەنى تالقىلاپ، وسى ءبىر سۇراقتىڭ تۇبىنە جەتە الماي، باستارى قاتىپ، كەيدە ۇستازدارى "ولگەن ادام بالا تۋعىزا ما؟" دەگەن سۇراق قويىپ، وعان وزگەلەرى قارق-قارق كۇلىپ، مارە-سارە بولىپ جاتىر ەكەن... ەلتكەندەرى سونشالىق، مالداس قۇرعان كۇيى بىرەۋلەرى كوتەنىمەن سىرعىپ ۇستازىنا قاراي ۇمسىنادى...

الەمدىك پروبلەما، سوعىس-موعىس، "اتوم ستانتسياسىن جارۋ" دەگەن رادياتسيالىق قاۋىپ، جاستاردىڭ بولاشاعىنا تونگەن قاتەر جانە ت.ت. ءپىشتۋ ەكەن...

ال، قازاقستاندا وسى ماسەلەدەن (قاتىن ماسەلەسى) باسقا ماسەلە جوق ەكەن...
وسىنى ۇستاز شەشىپ بەرسە، ءار بالانى "اللا تۋعىزعان" ەكەنىن انىقتاپ، دالەلدەپ بەرسە - قازاقستانعا ەش پالە جولامايدى ەكەن...

ەلىمىز "الدابەرگەندەردىڭ" ارقاسىندا گۇل-گۇل جايناپ سالا بەرەدى ەكەن...
وقۋ دا، توقۋ دا، وتاندى قورعاۋ دا قاجەت بولسا عانا الارلىق، ال، قاجەت ەمەس بولسا - ۇمىتا سالارلىق نارسە عانا بولسا كەرەك....

بۇگىندە ولارعا قازاقتى وزدەرى سيىناتىن "بالاتۋعىزعىش سەكسۋالنىي ارۋاقتارىنان" قۇتقارۋ اسا ماڭىزدى ەكەن...
ۆوت ماسەلەنىڭ كوكەسى!

ءابدىراشيت باكىرۇلى

Abai.kz