داريا دۋگينانىڭ اجالى جايلى كۇمان مەن سۇراق كوپ. مىسالى "دۋگينانى راسىمەن جارىپ جىبەردى مە" دەگەن سۇراق ينتەرنەت جەلىسىندە قىزۋ تالقىلانىپ جاتىر. سەبەبى دۋگينانى جەرلەۋ راسىمىندە ونىڭ بەينەسى كورسەتىلگەن كادرلار الەۋمەتتىك جەلىگە جاريالاندى. وندا كۇيىك ىزدەرى مۇلدە جوق، ال جارىلىستان كەيىن رەسەيلىك ارنالار دۋگينانىڭ ساۋ تامتىعى قالماعان، تولىق جانىپ كەتكەن دەگەن اقپاراتتى تاراتقان بولاتىن.

جەرلەۋ راسىمىندە دۋگيننىڭ سۋرەتى دە جاريالاندى. ونىڭ جۇزىنەن قايعى، كوزىنەن مۇڭ كورىنبەدى دەيدى جەلى قولدانۋشىلارى. "قىزىنىڭ قازاسىنا قايعىرعان دۋگيندى كورمەدىك، ەسەسىنە ەكپىندەي سويلەپ، اگرەسسيانى توككەن دۋگيندى كوردىك" دەدى ولار. دۋگين داريانىڭ قازاسى جايلى بىلاي دەگەن بولاتىن: "بالا كەزىندە ول ايتقان العاشقى ءسوز رەسەي دەگەن ءسوز بولدى. مەملەكەتىم، حالقىم، يمپەريام دەدى. ول ءبىزدىڭ جەڭىسىمىز ءۇشىن ءولدى، رەسەيدىڭ جەڭىسى ءۇشىن ءولدى، ەلىمىزدىڭ، مەملەكەتىمىزدىڭ ورتودوكسالدىعى ءۇشىن ءولدى."

دۋگيننىڭ بۇل ءسوزى كوپشىلىكتى تاڭداندىردى. ال وسى ارالىقتا دۋگينانى ءولتىرۋى مۇمكىن دەگەن كۇدىككە ءىلىنىپ، ىزدەۋ جاريالانعان ناتاليا ۆوۆك جايلى جاڭا اقپاراتتار شىعۋدا. بۇعان دەيىن ۆوۆك كولىگىنە قازاقستاندىق ءنومىردى تاعىپ جۇرگەنى جايلى ايتىلعان ەدى. ەندى تاعى تىڭ اقپاراتتار شىقتى.

ناتاليا ۆوۆك قىلمىستى ىسكە اسىرماس بۇرىن، ماسكەۋ ماڭىندا كولىك قوياتىن گاراجدى جالعا الىپ، ءوزىن يۋليا دەپ اتاعان. ول گاراجدى جالعا بەرۋششىگە قازاقستاندىق پاسپورتىن كورسەتكەن. بۇل تۋرالى  رەن تۆ ارناسى جاڭالىقتاردجان كورسەتكەن، وندا پاسپورتتى قولدان جاسالعان دەپ ناقتىلاي كەتكەن.

اقپارات كوزدەرى ۆوۆك گاراجدى ءبىر ايعا جالعا العانىن، الايدا تەك ءبىر اپتا قولداناتىنىن ايتقان دەيدى. ۆوۆك گاراجدى ءوزى جالداعان پاتەردەن 4 ششاقىرىم جەردەن العان. گاراج يەسىنىڭ ايتۋى بويىنشا، ۆوۆك تەك كولىگىن قويۋ ءۇشىن پايدالانعان.

داريا دۋگينانى 20 تامىزدا جارىپ جىبەرگەننەن كەيىن، ۆوۆك كولىگىمەن ەستونياعا ءوتىپ كەتكەن. ول ساتتە كولىگىندەگى قازاقستاندىق ءنومىردى ۋكرايندىق نومىرگە اۋىستىرعان. بۇل ارينە رەسەي فقق وكىلدەرىنىڭ اقپاراتى. سەنۋ قيىن، قيسىنعا ساي كەلمەيتىن تۇستارى جەتەرلىك.

زەلەنسكي ناتاليا ۆوۆك جايلى ءوز پىكىرىن ءبىلدىرىپ، بىلاي دەدى: "ول ءبىزدى مۇلدە قىزىقتىرمايدى، ءبىزدىڭ جاۋاپكەرشىلىگىمىزگە جاتپايدى. ول ءبىزدىڭ ەلىمىزدىڭ ازاماتى ەمەس. ول ۋكراينادا بولعان ەمەس".

وسىلايشا دۋگينانىڭ اجالى فقق تاراپىنان ءتۇرلى "دالەلدەرمەن" تولىعا تۇسۋدە. دالەلدەردىڭ اراسىندا "قازاقستاندىق ءنومىر، قازاقستاندىق پاسپورت" سوزدەرى بار ەكەندىگى دە كۇماندى.

Abai.kz