1 قىركۇيەكتەگى جولداۋىندا قازاقستان پرەزيدەنتى قاسىم-جومارت توقاەۆ قاڭتار وقيعاسى قاتىسۋشىلارىنا ءبىر رەتتىك راقىمشىلىق جاسالاتىنىن مالىمدەدى.

"بىزگە ەل بىرلىگى اۋاداي قاجەت. ەرەۋىلگە قاتىسقاندار دا، كۇشتىك قۇرىلىم قىزمەتكەرلەرى دە – ءوز ازاماتتارىمىز. ولار سوت ءادىل وتەدى دەپ قانا ەمەس، قوعام كەشىرىمدى بولادى دەپ ۇمىتتەنىپ وتىر. مەملەكەت قاڭتار وقيعاسىنا قاتىسقان، بىراق اۋىر قىلمىس جاساماعان ازاماتتاردىڭ جازاسىن جەڭىلدەتتى. زاڭ بۇزعانداردىڭ بىرقاتارى كىناسىن ءتۇسىنىپ، وتكەن ىسكە وكىنىپ وتىر. ولارعا كەشىرىممەن قاراعان دۇرىس دەپ ويلايمىن. سوندىقتان، مەن قاڭتار وقيعاسىنا قاتىسۋشىلارعا ءبىر رەتتىك راقىمشىلىق جاريالاۋ تۋرالى شەشىم قابىلدادىم" دەدى توقاەۆ.

توقاەۆتىڭ سوزىنشە، بۇل راقىمشىلىققا تارتىپسىزدىك ۇيىمداستىرۋعا قاتىسقان باستى كۇدىكتىلەر، سونىمەن قاتار مەملەكەتكە وپاسىزسىزدىق جاساۋ جانە بيلىكتى كۇشپەن باسىپ الۋعا ايىپتىلار جاتپايدى.

قاڭتار وقيعاسىنان كەيىن قاۋىپسىزدىك كوميتەتىنىڭ باسشىسى كارىم ءماسىموۆ پەن ونىڭ ورىنباسارلارى قاماۋعا الىنىپ، ولارعا قىزمەتىن اسىرا پايدالانۋ، مەملەكەتكە وپاسىزدىق جاساۋ، بيلىكتى كۇشپەن باسىپ الۋ سەكىلدى ايىپتار تاعىلدى. بىراق رەسمي حابارلارعا قاراعاندا، كوميتەت باسشىسىنىڭ ءبىر ورىنباسارى، قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ جيەن نەمەرەسى سامات ابىشكە ەشقانداي ايىپ تاعىلماعان. تەك ونىڭ "تەرگەۋ وربيتاسىندا" ەكەنى، تەرگەۋدەن وتكەنى عانا ايتىلدى.

بيىل قاڭتاردا قازاقستاندا گاز باعاسىنىڭ قىمباتتاۋىنان باستالعان نارازىلىق بۇكىلرەسپۋبليكالىق سيپات الىپ، ارتى قانتوگىسكە ۇلاستى، ەل پرەزيدەنتى پوليتسياعا ەسكەرتۋسىز وق اتۋعا بۇيرىق بەردى. رەسمي دەرەك بويىنشا، وقيعا كەزىندە 238 ادام قازا تاپتى، ونىڭ ىشىندە 6 ادام كۇش قۇرىلىمدارىنىڭ ازاپتاۋىنان مەرت بولعان.

وسى وقيعاعا دەيىن 2019 جىلى پرەزيدەنتتىكتەن كەتكەن نۇرسۇلتان نازارباەۆ بيلىككە دەگەن ىقپالى زور سانالعان. ساراپشىلار توقاەۆتىڭ تەك قاڭتار وقيعاسىنان كەيىن عانا تولىق پرەزيدەنت اتانعانىن ايتادى.

Abai.kz