قازاقستان حالىق پارتياسى توراعاسىنىڭ ورىنباسارى، ەكونوميست راحىم وشاقباەۆ ۇكىمەت پەن ۇلتتىق بانكتىڭ جۇمىسىن سىنعا الدى. ونىڭ ايتۋىنشا، پرەزيدەنتتىڭ قازاقستان حالقىنا جولداۋىندا ايتىلعان ماسەلەلەر جىلدار بويى كوتەرىلىپ كەلەدى، بىراق ءالى كۇنگە دەيىن شەشىمىن تاپپاعان.

«ۇكىمەت پرەزيدەنتتى جەرگە قاراتىپ وتىر. مەملەكەت باسشىسىنىڭ حالىققا جولداۋىندا كوتەرىلگەن ماسەلەلەر كوپتەگەن جىلدار بويى ايتلىلىپ كەلەدى. ۇكىمەتكە تاپسىرمالار بەرىلگەن، بىراق ولار ورىندالماعان. جاڭا ەكونوميكالىق ساياسات جاعىنان مىندەتتەر كەيىنگى ءۇش جىلدا بىرنەشە رەت بەرىلدى. جاڭا ەكونوميكالىق ساياساتتى جۇرگىزۋ ۇكىمەتتىڭ قولىنان كەلمەدى»،-دەدى ول.

ەكونوميست ۇلتتىق بانكتىڭ جۇمىسىن قايتا رەفورمالاۋ كەرەكتىگىن ايتتى.

«دامىعان ەلدەردىڭ بارىندە بازالىق مولشەرلەمە ينفلياتسيادان تومەن بولىپ كەلەدى. ال بىزدە بازالىق مولشەرلەمەنى مىندەتتى وڭدى قىلىپ، ينفلياتسيادان جوعارى ۇستايدى. پارلامەنت قابىرعاسىندا وسىنىڭ ءبارى قىزۋ تالقىلانبايدى، اياعى وكىنىشتى جاعدايعا الىپ كەلدى. وسىنىڭ ءبارى اقشانىڭ جەتىسپەۋشىلىگىنە، نەسيەلەندىرۋدىڭ ازايۋىنا اپارىپ سوقتى. جۇمىس ورىندارى ازايىپ بارادى. تۋىنداعان داعدارىسقا ۇلتتىق بانكتىڭ مونەتارلى ساياساتى سەبەپ بولىپ وتىر. جىلدار بويى وسى ساياساتتى جۇرگىزگەن ۇلتتىق بانكتىڭ دەپارتامەنت باسشىلارى مەن ولاردىڭ ورىنباسارلارىن تۇگەل الىپ تاستاۋ كەرەك»،-دەدى وشاقباەۆ.

Abai.kz