قوستاناي وبلىسىندا جەدەل شتابتا زارداپ شەككەن ەلدى مەكەندەردىڭ بالالارىنا قولداۋ كورسەتەتىن ماماندار جۇمىس ىستەيدى.

وڭىرگە وقۋ-اعارتۋ ۆيتسە-ءمينيسترى عاني بەيسەمباەۆ پەن بالالاردىڭ قۇقىقتارىن قورعاۋ كوميتەتى توراعاسىنىڭ ورىنباسارى دۋلات جەكەباەۆ اتتاندى.

مەكتەپتەردە ەۆاكۋاتسيالىق ورتالىقتار ۇيىمداستىرىلدى. سونداي-اق بالالار جىلى كيىممەن، ىستىق تاماقپەن قامتاماسىز ەتىلدى.

«جاعداي تۇراقتالعانشا وبلىستا 3 مىڭنان استام وقۋشى قاشىقتان ءبىلىم الادى. بۇل ءۇشىن شتاب قىزمەتكەرلەرى ءبىلىم باسقارماسىنىڭ وكىلدەرىمەن بىرگە بارلىق ءتيىستى جاعدايدى جاسايدى. كومەككە مۇقتاج بالالار مەكتەپتە، ولار قاۋىپسىز جەردە، دەنساۋلىقتارىنا دا ەشقانداي قاۋىپ ءتونىپ تۇرعان جوق»، - دەدى وقۋ-اعارتۋ ۆيتسە-ءمينيسترى عاني بەيسەمباەۆ.

ەۆاكۋاتسيالانعان بالالارعا قولداۋ كورسەتۋ ءۇشىن قر وقۋ-اعارتۋ مينيسترلىگى اتا-انالارعا بالالارىن ءبىلىم الۋىنا جانە تۇرۋىنا جاعداي جاسالعان «بالداۋرەن» رەسپۋبليكالىق وقۋ-ساۋىقتىرۋ ورتالىعىنا جىبەرۋدى ۇسىندى. بۇل تاجىريبە بۇرىن بولعان توتەنشە جاعدايلار كەزىندە قولدانىلعان.

بالالارعا جەدەل كومەك كورسەتۋدى ۇيىمداستىرۋ ءۇشىن وقۋ-اعارتۋ مينيسترلىگى تاۋلىك بويى جۇمىس ىستەيتىن سەنىم تەلەفوندارىن ىسكە قوستى: «Bala qorgau» تەلەگرام-چاتى 87761707383, +7 777 183 6567, +77013786629.

Abai.kz