سەنات توراعاسى ماۋلەن اشىمباەۆ ەلورداعا استانا اتاۋىن قايتارۋعا قاتىستى پىكىر ءبىلدىردى. 

«بۇل ماسەلەدە ادامدار ءوز پىكىرىن ايتۋعا قۇقىلى. ازاماتتىڭ ءوز پىكىرىن ايتۋعا مۇمكىندىگى بولۋى كەرەك، ياعني بۇل تۇرعىدا قۋدالايتىنداي ساياسات جوق. ەڭ باستىسى، حالىقتىڭ پىكىرىن ەسكەرۋىمىز كەرەك. حالىقتىڭ، قالا تۇرعىندارىنىڭ پىكىرى – نەگىزگى فاكتور. وسى ورايدا جاريالانىپ جۇرگەن ۇسىنىستاردى ەستىپ، ءماجىلىستىڭ دەپۋتاتتارى ءتيىستى باستامانى كوتەرىپ جاتىر. بۇل تۇرعىدا حالىق نە ايتسا، سول بولۋى كەرەك. حالىق قولداسا، وسىنداي شەشىمدەرگە بارۋىمىز ءتيىس»، - دەدى م. اشىمباەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.

سەنات توراعاسى بۇل ماسەلەدە ەشقانداي ساياسي ويىندار جوق ەكەنىن، ياعني قازاقستان حالقىنىڭ پىكىرىنە نازار اۋدارۋعا ءمان بەرىلگەنىن ايتتى.

«جاڭا قازاقستاننىڭ اياسىندا «حالىق ۇنىنە قۇلاق اساتىن مەملەكەت» باعدارلاماسىن جۇزەگە اسىرىپ جاتىرمىز. بۇل رەتتە قوعامداعى ويلاردى پىسىقتاپ، ءتيىستى شەشىم قابىلدانادى. استاناعا قاتىستى شەشىم ءالى دە قابىلدانعان جوق. وسى ماسەلە بويىنشا تالقىلاۋ پروتسەسى ءجۇرىپ جاتىر. ءماجىلىس دەپۋتاتتارىنىڭ باستاماسىن جان-جاقتى قاراپ، تالقىلاۋىمىز كەرەك»، - دەدى ول.

بۇدان بۇرىن حابارلانعانداي، پارلامەنت ءماجىلىسىنىڭ توراعاسى ەرلان قوشانوۆ ەلورداعا استانا اتاۋىن قايتارۋ ۇسىنىسىنا قاتىستى پىكىر ءبىلدىردى.

Abai.kz