ەڭ الدىمەن پرەزيدەنتتىڭ قوعامدا كۇردەلى ماسەلە بولىپ كەلگەن ايەلدەردىڭ زەينەت جاسىن 61 جاس شەگىندە قالدىرعانى دۇرىس بولدى. سەبەبى ەر مەن ايەلدىڭ زەينەت جاسىنا كەلگەندە ءار ەل ءوزىنىڭ ەكونوميكاسىنا سايكەس شەشىم قابىلدايدى.

ياعني، ءبارى قارجىعا تىرەلەدى، ال قارجى ەكونوميكالىق ءال-احۋالعا بايلانىستى ەكەنىن بىلەمىز. ەگەر ەلگە جاعام دەپ زەينەت جاسىن «55 نە 60 جاستان اسىرمايمىن» دەپ اسىعىس شارا قولدانسا، بۇگىن بولماسا ەرتەڭ ۇلكەن ءبىر قوعامداعى دۇمپۋگە اكەلەر ەدى. وسىنىڭ الدىن الا ءبىلدى. ايەلدەردىڭ ەرلەرگە قاراعاندا زەينەتكە ەرتەرەك شىققانىن ءوز باسىم قولدايمىن. ءتالىم-تاربيەگە قازىر سولار جاۋاپتى بولىپ قالدى، بالانى باپتايدى، سول سەبەپتى وتباسىنىڭ جانىندا كوبىرەك بولعانى ءجون.

سوندىقتان ايەلدەر ەكونوميكانىڭ رەالدى سەكتورىنان مەيلىنشە الىس بولعانى ابزال. ال ەرلەردىڭ كوبى بۇرىنعىداي تاس جارىپ، جەر قازىپ، اۋىر جۇمىس ىستەپ جۇرگەن جوق. سوندىقتان ەرلەردىڭ زەينەت جاسىن مۇمكىندىگىنشە سوزۋعا بولادى. سايىپ كەلگەندە، ماسەلەنىڭ ءتۇيىنى ەكونوميكالىق جاعدايعا بايلانىستى ەكەنى انىق. الداعى ۋاقىتتا سالانى دۇرىس باسقارىپ، قارجىنى ءجوندى يگەرە الساق، زەينەت جاسىن تومەندەتىپ نەمەسە ادامنىڭ ءوز ەركىنە قالدىرۋعا بولادى.

بۇدان بولەك، مەملەكەت جەمقورلاردان تۇسكەن قارجىنىڭ ءبارىن مەكتەپ سالۋعا جۇمسايتىنى ايتىلدى. الەۋمەتتىك ماسەلەلەردە بالالاردىڭ ءبىلىم الۋىنا ارنالعان نىسانداردىڭ كوپ بولعانى ماڭىزدى. سوندىقتان بۇل قادامدى وتە دۇرىس بولدى دەپ ويلايمىن.

رامازان ساتتارۇلى

Abai.kz