ەڭبەك جانە حالىقتى الەۋمەتتىك قورعاۋ مينيسترلىگى شەتەلدەن كەلەتىن قانداستارعا ارنالعان "قازاق كارتاسىن" ەنگىزۋدى جوسپارلايدى. بۇل تۋرالى مينيسترلىكتىڭ ءباسپاسوز قىزمەتى حابارلادى.

ۆەدومستۆو "قازاق كارتاسى" قازاقستاندا بيزنەس جوسپارىن جۇزەگە اسىرعىسى كەلەتىن "جوعارى دەڭگەيدەگى مامان" قانداستار مەن بيزنەسپەن اينالىساتىن شەتەلدىك قازاقتارعا بەرمەك.

"قازاق كارتاسىن" العان قانداستار قازاقستاندا بيزنەس اشىپ، ءۇي مەن مۇلىك الىپ، قارجىلىق وپەراتسيالار جۇرگىزە الادى، بىراق ساياسي قۇقىق بەرىلمەيدى. مينيسترلىك "قازاق كارتاسىنا" ءوتىنىش قابىلداعان كەزدە قانداستىڭ كەلەتىن جەرىن ايقىنداپ، بارعان جەرىندە بەلگىلى ءبىر مەرزىم تۇرسا، ازاماتتىق بەرۋ دە قاراستىرىلادى دەيدى. ۆەدومستۆو "قازاق كارتاسىن" الاتىن قانداستاردى ەڭبەك كۇشى تاپشى وڭىرلەرگە بارۋعا ىنتالاندىرماق.

مينيسترلىك بۇل باستاما قانداستاردى وتانىمەن بايلانىستىرۋعا جول اشادى دەيدى.

سونداي-اق مينيسترلىك سولتۇستىك پەن ورتالىققا ىشكى كوشى-قوندى ىنتالاندىرۋ ءۇشىن "ۇتقىرلىق سەرتيفيكاتىن" دا ەنگىزبەك. بۇل سەرتيفيكاتپەن سولتۇستىك يا ورتالىققا قونىس اۋدارعان قازاقستاندىقتارعا ءۇي قۇنىنىڭ 50 پايىزىنا قارجىلىق كومەك الادى. ۆەدومستۆو ازاماتتار بۇل سومانى ءۇي سالۋعا نە ساتىپ الۋعا، سونداي-اق "وتباسى بانكىنە" باستاپقى جارنانى تولەۋگە جۇمساي الادى دەيدى. بۇعان قوسا، ورتالىق جانە سولتۇستىك وڭىرلەردە وندىرىسكە جانە تەحنيكا الۋعا جەڭىلدەتىلگەن كرەديتتەر بەرىلەتىنىن ايتادى.

قازاقستان پرەزيدەنتى قاسىم-جومارت توقاەۆ 1 قىركۇيەكتەگى جولداۋىندا قونىس اۋدارۋ جانە ميگراتسيا ساياساتىنا رەفورما جاساۋ جايلى ايتقان ەدى. ول قونىس اۋدارۋ "كاسىبيلىككە" ءمان بەرۋ كەرەك دەگەن.

بۇعان دەيىن قازاقستان بيلىگى وڭتۇستىكتەگى تۇرعىنداردى رەسەيمەن شەكارالاس سولتۇستىك جانە شىعىس وبلىستارعا كوشىرەتىن باعدارلاما اشقان. بۇل باعدارلاما اياسىندا وڭتۇستىكتەن سولتۇستىككە كوشەم دەگەن تۇرعىندارعا ءۇي، كاسىپ اشۋ، جۇمىس جاعىنان كومەك كورسەتىلگەن ەدى. بىراق وڭتۇستىكتەن سولتۇستىككە كوشىپ بارعاندار اراسىندا باعدارلاما شارتتارى ورىندالمادى دەپ كەرى قايتقاندار دا بولعان.

7 قىركۇيەكتە ەڭبەك جانە حالىقتى الەۋمەتتىك قورعاۋ مينيسترلىگى ينۆەستورلارعا، عالىمدارعا، تاجىريبەلى ماماندارعا ۇزاق ۋاقىتقا ۆيزا بەرۋ كونتسەپتسياسىن ۇسىنعان. بۇل ۆيزانى بەرۋ بەس جىلدىڭ ىشىندە جۇزەگە اسادى. قازاقستاندا ۇزاق ۋاقىت تۇراتىن ۆيزا ەل ەكونوميكاسىنا 300 مىڭ دوللار سالعان شەتەلدىكتەرگە دە بەرىلمەك.

Abai.kz