قازاقستان پارلامەنتىنىڭ دەپۋتاتتارى رەسەيلىك دەپۋتات كونستانتين ءزاتۋليننىڭ قازاقستان تۋرالى جاساعان مالىمدەمەسىنە جاۋاپ بەردى.

بۇعان دەيىن، قازاقستاننىڭ سەگىز ءىرى بانكى، سونىڭ ىشىندە Jusan Bank, "الفا بانك", "نۇربانك" جانە "بانك تسەنتركرەديت" بانكتەرى رەسەيلىك «مير» كارتالارىنا قىزمەت كورسەتپەيتىنىن مالىمدەگەن بولاتىن.

بانكتەردىڭ حابارلاۋىنشا، «مير» كارتالارى حالىقارالىق بانك جۇيەسىنە كىرمەيدى، بۇل تەك رەسەيگە تيەسىلى، سوندىقتان ولار كارتالاردى قابىلداي المايدى.

Visa جانە Masterسard رەسەيدىڭ ۋكرايناعا شابۋىلىنان كەيىن، سانكتسيالاردىڭ جاھاندىق رەجيمىنە قوسىلىپ، شەتەلدەگى رەسەيلىكتەرگە قىزمەت كورسەتۋدەن باس تارتقان. سودان كەيىن رەسەي بيلىگى "مير" كارتالارىن حالىقارالىق تولەم جۇيەسىنە بالاما رەتىندە شىعارا باستادى.

وسىعان بايلانىستى رف مەملەكەتتىك دۋماسىنىڭ تمد ىستەرى جونىندەگى كوميتەتى توراعاسىنىڭ ءبىرىنشى ورىنباسارى كونستانتين زاتۋلين «قازاقستاننىڭ باتىسقا بۇيرەگى بۇرا باستاعانىن العا تارتىپ، رەسەيدىڭ مۇنى جاۋاپسىز قالدىرمايتىنىن» ايتىپتى.

«رەسەي فەدەراتسياسىمەن قۇرىلىقتا شەكتەسەتىن الەمدەگى ەڭ ۇزىن شەكاراسى بار ەل ءبىزدىڭ تاريحي جانە گەوگرافيالىق جاقىندىعىمىزعا قاراماستان، باتىستىق سانكتسيالاردى نازارعا الىپ، باسىن قاۋىپكە تىگىپ وتىر. ارينە، رەسەي مۇنى جاۋاپسىز قالدىرمايدى»،-دەپتى زاتۋلين.

ونىڭ ارانداتۋشى سوزدەرىنە قازاقستاندىق دەپۋتاتتار جاۋاپ بەردى.

ماجىلىسمەن مۇحتار قۇل-مۇحاممەد مۇنىڭ «ءزاتۋليننىڭ اتى وشە باستاعاندا قولداناتىن ادەتتەگى ءتاسىلى» ەكەنىن اتادى.

"دەپۋتات زاتۋلين ءوزىنىڭ رەيتىنگى تومەندەي باستاسا، ارانداتۋشى ويلارىن دا وسىلاي سىرتقا شىعارا باستايدى. بۇرىننان سولاي. قازاقستاندىق بانكتەر "مير" بانك كارتاسىنا قاتىستى وتە دۇرىس قادام  جاسادى. بىرىنشىدەن، ەكىنشى دەڭگەيلى بانكتەردىڭ بارلىعى – جەكەمەنشىك بانكتەر، سوندىقتان ولار قانداي بانك كارتالارىمەن جۇمىس ىستەۋدى تيىمدىلىگىنە قاراي وزدەرى شەشەدى.

ەكىنشىدەن، "مير" كارتاسىنىڭ اينالاسىندا شۋ-جانجال كوپ بولعان. اقشا تىنىشتىقتى جاقسى كورەدى دەگەن ءسوز بار. سوندىقتان دەپۋتات «نارازىلىعىن» ءوزى قۇرعان بانك جۇيەسىنە ءبىلدىرسىن»،- دەدى مۇحتار قۇل-مۇحاممەد.

ول ءزاتۋليننىڭ جازدا «ۋكرايناداعى جاعداي قازاقستاننىڭ باسىنا دا تاپ كەلۋى مۇمكىن» دەگەن ءسوزىن ەسكە الىپ، «ۋكراينانىڭ جاعدايىنا كۋامىز. ونى قازىر جاريالانعان موبيليزاتسيادان-اق كورۋگە بولادى. سوندىقتان ول ءوزىنىڭ ويلارى مەن سوزدەرىن جونگە كەلتىرسىن»،-دەدى ماجىلىسمەن.

مۇحتار قۇل-مۇحاممەد «رەسەيلىك دەپۋتاتتىڭ قازاقستانعا اقىل ۇيرەتكەننەن گورى، سانكتسيادان شىعۋدىڭ جولىن ويلاستىرعانى دۇرىس» ەكەنىن ايتتى.

ءماجىلىس دەپۋتاتى ايگۇل قاپان رف مەملەكەتتىك دۋماسىنىڭ تمد ىستەرى جونىندەگى كوميتەتى توراعاسىنىڭ ءبىرىنشى ورىنباسارى كونستانتين ءزاتۋليننىڭ قازاقستانعا قوقان-لوقى كورسەتىپ وتىرعانىن ايتتى.

"وكىنىشكە وراي، وسىنداي دەپۋتاتتاردىڭ كەسىرىنەن كورشى ەل رەسەيدىڭ بەينەسى اگرەسسيامەن، مەنمەندىكپەن جانە ناداندىقپەن بايلانىستىرىلادى. ءزاتۋليننىڭ جاڭا مالىمدەمەسىن ارانداتۋشىلىققا شاقىراتىن،  ۇستىرت ءارى نەگىزسىز دەپ قاراستىرۋ كەرەك", - دەپ جازدى دەپۋتات Facebook پاراقشاسىندا.

Abai.kz