قىرعىزستاننىڭ باتكەن قالاسىنداعى جەرگىلىكتى تۇرعىندار ەكى كۇننەن بەرى قىرعىز-تاجىك شەكاراسىنداعى ماسەلەگە قاتىستى اكتسيا وتكىزىپ جاتىر.

ازاتتىق راديوسى قىرعىز قىزمەتى ءتىلشىسىنىڭ حابارلاۋىنشا، دراما تەاتر عيماراتى الدىنا جۇزدەن استام ادام جينالعان. ولار بيلىك وكىلدەرىمەن كەزدەسپەك.

ءبىر كۇن بۇرىن، 27 قىركۇيەكتە، جەرگىلىكتى تۇرعىندار وبلىس اكىمدىگىنىڭ الدىنا جينالىپ، شەكاراداعى ماسەلەنى شەشۋگە قاتىستى قابىلدانعان سوڭعى شەشىمدەردى ءتۇسىندىرۋدى تالاپ ەتتى. اكتسياعا شەكارا ماڭىندا ورنالاسقان اق-ساي جانە سامارقاندەك اۋىلدارىنىڭ تۇرعىندارى دا قاتىستى. ولار ۇقمك توراعاسى قامشىبەك تاشيەۆپەن كەزدەسۋدى تالاپ ەتتى.

بۇنىڭ الدىندا قىرعىزستان ۇقمك توراعاسى قامشىبەك تاشيەۆ تاجىك ارنايى قىزمەتىنىڭ باسشىسى ءسايمۇمىن ياگيموۆپەن بىرگە حاتتاماعا قول قويعانىن حابارلادى. ونىڭ ايتۋىنشا، شەكارادا جانجال بولماس ءۇشىن ۇنەمى جانجال تۋىندايتىن شەكارا بەكەتتەرىن ۋاقىتشا جابۋ تۋرالى شەشىم قابىلداندى. قىرعىز جاعى "تامدى", "بۇلاق-باشى", "قاتتا-تۇز" جانە "داچا" بەكەتتەرىن، ال تاجىك جاعى "بەداك", "كەح", "قاراقشىقۇم" جانە "شارشارا" بەكەتتەرىن جابادى.

14-17 قىركۇيەك ارالىعىندا قىرعىزستان مەن تاجىكستان اسكەرلەرى اراسىندا قارۋلى قاقتىعىس بولدى. جانجال سالدارىنان قىرعىزستاننىڭ 62 ازاماتى مەرت بولىپ، 200-گە جۋىق ادام جارالاندى. جۇزدەگەن ءۇي مەن اسكەري نىسان قيرادى. شەكارا بويىنداعى اۋدانداردىڭ 140 مىڭنان استام تۇرعىنى قاۋىپسىز جەرگە كوشۋگە ءماجبۇر بولدى. 18 قىركۇيەكتە قىرعىزستان سىرتقى ىستەر مينيسترلىگى تاجىكستاندى قارۋلى اگرەسسيا جاسادى دەپ ايىپتادى.

تاجىكستان سىرتقى ىستەر مينيسترلىگى شەكاراداعى جانجالدان 41 ادام قازا بولعانىن حابارلادى. وزودي راديوسىنىڭ دەرەككوزدەرى تاجىك-قىرعىز شەكاراسىندا مەرت بولعان 74 تاجىكستاندىقتىڭ اتى-ءجونىن جاريالادى. تاجىك جاعىندا مەرت بولعاندار مەن زارداپ شەككەندەر تۋرالى مالىمەتتى باسقا دا تاۋەلسىز دەرەككوزدەر ارقىلى تەكسەرۋ مۇمكىن بولماي وتىر.

Abai.kz