سوڭعى جاعدايلارمەن جاقسى تانىسپىز. گەوساياسي ماسەلە اينالىپ كەلگەندە ءسىز بەن بىزدەي قاراپايىم حالىققا زيانىن تيگىزەدى. سونىڭ كەسىرىنەن مىڭداعان رەسەيلىكتەر اۋىرتپالىق كورىپ، ەلىمىزگە كەلىپ جاتىر. قوعامدا ءتۇرلى كوزقاراس بولاتىنى ايتپاسا دا بەلگىلى. بىراق ۋاقىتشا پانالاپ كەلىپ جاتقان جۇرتتى كەرى تەۋىپ، شەتتەتۋگە بولمايدى. قوناقجايلىق كورسەتىپ، قاۋىپسىز جۇرۋلەرىن قامتاماسىز ەتە تۇرعان ماڭىزدى. وسىعان دەيىن ەلىمىز جۇزدەگەن ۇلتتىڭ باسىن بىرىكتىرىپ، بەيبىت ءومىر ءسۇرۋىن قاداعالاپ تۇرعانىن بىلەمىز. تاريحقا قاراساق، حالقىمىز قيىندىققا دۋشار بولعاننىڭ بارىنە كومەك قولىن سوزدى، مەيىرباندىق كورسەتتى، ءوسىپ-ونگىزدى. بۇل ىستە تاجىريبە جەتكىلىكتى. سوندىقتان بۇل جاعدايدا سابىرعا سالىپ، تۇراقتىلىقتى قامتاماسىز ەتكەن ءجون. قامقور بولا بىلگەننىڭ كەسىرى جوق.

پرەزيدەنت قاسىم-جومارت توقاەۆ قازىر ءار وڭىرگە بارىپ، ايماقتارداعى جاعدايمەن ءوزى تانىسىپ، ءبارىن باقىلاپ ءجۇر. ءار ساپارىندا بەيبىتشىلىك پەن تۇراقتىلىقتى ساقتاۋ كەرەگىن ەسكەرتەدى. وزگە ەلدەر اراز بولىپ جاتقاندا ءبىز ءبارىن اقىلمەن ىستەگەنىمىز ابزال، ارانداتۋعا ەرمەۋ قاجەت. قاراعاندى توپىراعىنا بارعانىن ەستىدىك. وندا دا وسى ماسەلەنى ەرەكشە ەسكەرتتى. وتكەن عاسىردا قازاقستانعا جەر اۋدارىلىپ كەلگەن ءتۇرلى حالىق وكىلدەرى مەن رەپرەسسيا قۇرباندارىنا پانا بولعان قاراعاندى ولكەسىندە ول نارسەنىڭ ايتىلۋى بەكەر ەمەس. قازىر دە سول وڭىردە ونداعان ەتنوس بىرلىكتە ءومىر ءسۇرىپ، ءوز بەتتەرىنشە دامىپ جاتىر. الەم اراز بولىپ جاتقاندا وسىنداي تۇراقتى جاعدايدى قالىپتاستىرۋ – ۇلكەن ەرلىك. وسى زاماندا ءبارى بار بولعانىمەن، بىرلىك، ىنتىماق، قۇرمەت پەن جاناشىرلىق سەكىلدى اسىل سەزىم، قۇندىلىقتار جەتپەي ءجۇر. مۇنى ەستە ۇستاعانىمىز دۇرىس. اركىممەن اراز بولىپ، گەوساياسي احۋالدى ۋشىقتىرعاننان ەشكىم پايدا تاپپايدى. سوندىقتان بەيبىتشىلىكتى ەستەن شىعارمايىق.

ەسمۇحان وباەۆ، قازاقستاننىڭ حالىق ءارتىسى

Abai.kz