الەمدە احۋال كۇردەلى كەزەڭدە ىشكى بىرلىكتى ارتتىرىپ، ەلدىك مۇددەنى جوعارى قويىپ، مەملەكەتتىلىكتى كۇشەيتۋ قاجەتتىگى انىق.

بۇگىن «امانات» پارتياسىنىڭ سەزدى ءوتتى. پارتيا كانديدات رەتىندە قاسىم-جومارت كەمەلۇلى توقاەۆتىڭ كانديداتۋراسىن ۇسىندى. ودان بولەك «اق جول» پارتياسى مەن «قازاقستان حالىق پارتياسى»، ءارتۇرلى قوعامدىق ۇيىمدار دا كواليتسيالىق تۇردە قاسىم-جومارت كەمەلۇلى توقاەۆتىڭ كانديداتۋراسىن قولدادى.

جالپى قازاقستان قوعامىندا پرەزيدەنت ساياساتىنىڭ توڭىرەگىنە توپتاسۋ، الەمدىك احۋال ۋشىققان كەزدە مەملەكەت مۇددەسى ءۇشىن بىرلىكتى اتتىرۋ پروتسەسى بايقالادى. كواليتسيا قۇرۋ دا الەمدىك تاجىريبەدە بار ءارى ءبىر مۇددە مەن ورتاق ماقساتقا جۇمىلدىراتىن قادام. وسى ارقىلى ازاماتتىق قوعام بەلسەندىلىگى مەن ساياسي ينستيتۋتتاردىڭ بىرىگۋى، پرەزيدەنت باعىتىن قولداۋى كورىنۋدە.

ەلىمىزدە كۇردەلى رەفورمالار ىسكە اسۋدا. جاڭا وبلىستاردىڭ قۇرىلۋى، پرەزيدەنتتى ءبىر مەرزىمگە 7 جىلعا سايلاۋ، كونستيتۋتسيالىق رەفورما، ساياسي پارتيالاردىڭ قۇرىلۋىن جەڭىلدەتەتىن زاڭ نورمالارى، موجاريتارلىق سايلاۋ جۇيەسىنىڭ كەلۋى سىندى وزگەرىستەر جۇرۋدە.

الەۋمەتتىك ادىلەتتىلىك، 2025 جىلعا دەيىن 1000 مەكتەپ سالۋ، جەرگىلىكتى جولداردىڭ 95% جوندەۋدەن وتكىزۋ، عىلىم مەن بىلىمگە سالىنعان قاراجاتتى ارتتىرۋ، وسى ماقساتتا جىل سايىن عالىمداردىڭ شەتەلدە تاجىريبەدەن ءوتۋى ءۇشىن بولىنەتىن گرانت سانىن ارتتىرۋ، زاماناۋي اۋرۋحانالار سالۋ قولعا الىنۋدا.

وسى پروتسەستەردىڭ بارلىعى مەملەكەتتىگىمىزدى كۇشەيتىپ، ەڭ باستىسى حالقىمىزدىڭ الەۋمەتتىك جاعدايىن ارتتىرۋعا ءوز سەپتىگىن تيگىزەدى دەپ سەنەمىز. گەوساياسي كۇردەلى كەزەڭدە ەلىمىزدىڭ تىنىشتىعى مەن بىرلىگى، ىنتىماعى كەرەك. وسى ماقساتتا الداعى سايلاۋ حالقىمىزدى ورتاق مۇددە جولىندا بىرىكتىرەتىن پروتسەسس بولۋى قاجەت.

باۋىرجان سەرىكباەۆ

Abai.kz