زەلەنسكي بۇل ۇسىنىسىنىڭ رەسەيگە قارسى قارۋ قولدانۋ دەگەندى بىلدىرەتىن-بىلدىرمەيتىنىن تۇسىندىرمەدى. "ناتو نە ىستەۋى كەرەك؟ رەسەيدى يادرولىق قارۋ قولدانۋ مۇمكىندىگىنەن ايىرۋى كەرەك. 24 اقپانعا دەيىن دە ايتقانمىن، حالىقارالىق قاۋىمداستىقتان تاعى سۇرايمىن: قارۋدىڭ مۇنداي ءتۇرىن قولدانعان جاعدايدا نە بولاتىنىن ولارعا ءتۇسىندىرۋ ءۇشىن ەسكەرتۋ سوققىلارىن جاساۋ كەرەك. رەسەيدىڭ يادرولىق سوققى جاساۋىن كۇتىپ وتىرۋدىڭ قاجەتى جوق. "ەندى وسىعان كوشتىڭ بە؟ ولاي بولسا، ءبىزدىڭ جاۋابىمىز مىناداي!" دەپ وتىرماس ءۇشىن. قىسىم كورسەتۋ ءتارتىبىن قايتا قاراۋ قاجەت", - دەپ مالىمدەدى ۋكراينا پرەزيدەنتى.
زەلەنسكي مالىمدەمەسىنە رەسەي اتىنان پرەزيدەنتتىڭ ءباسپاسوز حاتشىسى دميتري پەسكوۆ جاۋاپ بەردى. ول زەلەنسكي مالىمدەمەسىن "دۇنيەجۇزىلىك سوعىس باستاۋعا ۇندەۋ" دەپ سيپاتتاپ، ۋكراين پرەزيدەنتىنىڭ وسى ايتقاندارىنا بۇكىل الەم، اسىرەسە اقش، ۇلىبريتانيا جانە ەۋرووداق نازار اۋدارۋى ءتيىس دەپ مالىمدەدى. رەسەي قاۋىپسىزدىك كەڭەسى باسشىسىنىڭ ورىنباسارى دميتري مەدۆەدەۆ زەلەنسكيدى رەسەيگە يادرولىق سوققى جاساۋعا ۇندەدى دەپ ايىپتادى.
زەلەنسكيدىڭ ءباسپاسوز حاتشىسى سەرگەي نيكيفوروۆ پرەزيدەنت رەسەيگە اسكەري سوققى جاساۋ تۋرالى ايتپادى دەپ ءتۇسىندىردى. نيكيفوروۆتىڭ ايتۋىنشا، زەلەنسكي رەسەيگە قارسى سانكتسيا ەنگىزۋ تۋرالى ۇسىنىسىن تاعى قايتالادى، ۇنداي ۇسىنىستى ول 24 اقپانعا دەيىن دە جاساعان. ۋكراين پرەزيدەنتىنىڭ ءباسپاسوز حاتشىسىنىڭ مالىمدەۋىنشە، يادرولىق سوققىمەن ۋكراينا ەمەس، رەسەي قورقىتىپ وتىر.
رەسەي ۋكرايناعا باسىپ كىرگەلى بەرى پرەزيدەنت ۆلاديمير پۋتين يادرولىق قارۋ قولدانۋى مۇمكىن ەكەنىن بىرنەشە مارتە قايتالاعان.
اقش پرەزيدەنتى دجو بايدەن بۇۇ باس اسسامبلەياسىندا رەسەي پرەزيدەنتى ۆلاديمير ءپۋتيندى "ەۋروپاعا يادرولىق قوقان-لوققى جاساپ وتىر" دەپ ايىپتادى. اقش پرەزيدەنتىنىڭ ۇلتتىق قاۋىپسىزدىك جونىندەگى كەڭەسشىسى دجەيك سالليۆاننىڭ مالىمدەۋىنشە، رەسەي ۋكرايناعا قارسى يادرولىق قارۋ قولدانار بولسا، "اپات سالدارىنان استىندا" ماسكەۋدىڭ ءوزى قالادى.
Abai.kz
