قازاقستاننىڭ رەسەيمەن شەكتەسەتىن قوستاناي وبلىسىندا اۋماقتىق قورعانىس كۇشتەرىنىڭ وقۋ-جاتتىعۋلارى باستالدى. «قوستاناي وبلىسىندا «بەكەت-2022» ۆەدومستۆوارالىق وقۋ-جاتتىعۋى باستالدى. ۆەدومستۆوارالىق ۇيلەستىرۋدى قامتاماسىز ەتۋ، ءارتۇرلى ۆەدومستۆولاردىڭ كۇشتەرى اراسىنداعى ءوزارا ءىس-قيمىل ەلەمەنتتەرىن پىسىقتاۋ، ۋاكىلەتتى ورگاندار مەن اۋماقتىق قورعانىس بولىمشەلەرىنىڭ جۇمىلدىرۋ دايىندىعىنىڭ جاي-كۇيىن تەكسەرۋ – وسى جانە باسقا دا مىندەتتەر كەشەندى وقۋ-جاتتىعۋعا قاتىسۋشىلارعا جۇكتەلەدى»، - دەپ حابارلايدى ءباسپاسوز قىزمەتى. بۇل تۋرالى سەيسەنبىدە قر قورعانىس مينيسترلىگىنىڭ قىزمەتى حابارلادى.

وقۋ-جاتتىعۋلارعا قوستاناي وبلىسى بويىنشا اۋماقتىق قورعانىس بريگاداسىندا ەسەپتە تۇرعان اسكەري قىزمەتكە مىندەتتى تۇلعالار شاقىرىلادى. ولار جاۋىنگەرلىك دايىندىقتىڭ نەگىزگى پاندەرى بويىنشا ساباقتار جۇرگىزەدى.

«كەشەندى وقۋ-جاتتىعۋ ەكى كەزەڭدە وتەدى، ونىڭ بەلسەندى كەزەڭى 21 قىركۇيەكتە باستالادى. بەس كۇن ىشىندە مەملەكەتتىك ورگاندار مەن قۇقىق قورعاۋ ورگاندارىنىڭ وكىلدەرى بەكىتىلگەن بەكەت-2022 وقۋ-جاتتىعۋ جوسپارىنا سايكەس داعدارىستىق جاعدايلاردان شىعۋدىڭ جانە سىرتقى قاۋىپتەرگە قارسى تۇرۋدىڭ ءتۇرلى ستسەناريلەرىن ازىرلەيدى. وقۋ-جاتتىعۋ اياسىندا وبلىس ورتالىعىنىڭ كەيبىر كوشەلەرىندە كولىك قوزعالىسى شەكتەلىپ، بۇل تۋرالى جەرگىلىكتى تۇرعىندار قوسىمشا حاباردار ەتىلەدى»، - دەپ تولىقتىردى قورعانىس مينيسترلىگى. قوستاناي وبلىسى رەسەيدىڭ ورىنبور، چەليابى جانە قورعان وبلىستارىمەن شەكتەسەدى.

اۋماقتىق قورعانىس كۇشتەرى الەمدىك قاقتىعىستاردا ءوز تيىمدىلىكتەرىن كورسەتۋدە. اسىرەسە ۋكراينانىڭ رەسەي اگرەسسياسىندا بۇل اسكەري توپتىڭ اسا پايدالى ەكەنى انىق بايقالدى. اۋماقتىق قورعانىس كۇشتەرىنىڭ نەگىزگى مىندەتتەرىنە ادەتتە كىرەدى: اسكەري (جاۋىنگەرلىك) ءىس-قيمىلداردى جۇرگىزۋگە ارنالعان اسكەرلەر (كۇشتەر) توبى نەمەسە بىرىككەن كۇشتەر توبى اۋماق شەگىندە ورنالاستىرىلعانعا دەيىن بەلگىلى ءبىر اۋماقتا اۋماقتى قورعاۋ جانە حالىقتى قورعاۋ بويىنشا دەر كەزىندە دەن قويۋ جانە قاجەتتى شارالاردى قابىلداۋ، ەلگە قارسى قارۋلى اگرەسسيانى تويتارۋ; مەملەكەتتىك شەكارانى كۇزەتۋ مەن قورعاۋدى كۇشەيتۋگە قاتىسۋ; حالىقتى، اۋماقتاردى، تابيعي ورتا مەن مۇلىكتى توتەنشە جاعدايلاردان قورعاۋعا، اسكەري (جاۋىنگەرلىك) ءىس-قيمىلداردىڭ زارداپتارىن جويۋعا قاتىسۋ; ەل ازاماتتارىن ۇلتتىق قارسىلىققا دايىنداۋعا قاتىسۋ; مەملەكەتتىك ورگانداردىڭ، جەرگىلىكتى ءوزىن-ءوزى باسقارۋ ورگاندارىنىڭ جانە اسكەري باسقارۋ ورگاندارىنىڭ قاۋىپسىز جۇمىس ىستەۋى ءۇشىن جاعدايلاردى قامتاماسىز ەتۋگە قاتىسۋ; ماڭىزدى وبەكتىلەر مەن كوممۋنيكاتسيالاردى، ماڭىزدى ينفراقۇرىلىم وبەكتىلەرىن جانە وبلىستىق، اۋداندىق، اۋىلدىق، پوسەلكەلىك، قالالىق ماڭىزى بار وبەكتىلەردى، قالالارداعى، اۋىلدىق، كەنتتىك وكرۋگتەردەگى اۋداندىق كەڭەستەردى قورعاۋعا قاتىسۋ; اسكەرلەردى (كۇشتەردى) ستراتەگيالىق (جەدەل) ورنالاستىرۋ نەمەسە ولاردى قايتا توپتاستىرۋ ءۇشىن جاعدايلاردى قامتاماسىز ەتۋ; توتەنشە جاعدايلار نەمەسە اسكەري (جاۋىنگەرلىك) ءىس-قيمىلدار ايماقتارى/وڭىرلەرى ماڭىندا جانە شەگىندە كولىك قۇرالدارى مەن جاياۋ جۇرگىنشىلەردىڭ قوزعالىسىنا ۋاقىتشا تىيىم سالۋ نەمەسە شەكتەۋ جونىندەگى ءىس-شارالاردى ىسكە اسىرۋعا قاتىسۋ; ەلدى مەكەندەردە قوعامدىق قاۋىپسىزدىك پەن ءتارتىپتى قامتاماسىز ەتۋ شارالارىنا قاتىسۋ; ەلدىڭ بۇكىل اۋماعىندا نەمەسە ونىڭ جەكەلەگەن اۋداندارىندا اسكەري جاعدايدىڭ قۇقىقتىق رەجيمى ەنگىزىلگەن جاعدايدا شارالاردى ەنگىزۋگە جانە جۇزەگە اسىرۋعا قاتىسۋ; ديۆەرسيالىق-بارلاۋ كۇشتەرىمەن، اگرەسسوردىڭ (جاۋدىڭ) باسقا دا قارۋلى قۇرالىمدارىمەن جانە ەلدىڭ زاڭدارىندا كوزدەلمەگەن اسكەريلەندىرىلگەن نەمەسە قارۋلى قۇرامالارمەن كۇرەسكە قاتىسۋ; مەملەكەتتىڭ قورعانىس قابىلەتىنىڭ دەڭگەيىن ارتتىرۋعا جانە اگرەسسوردىڭ (جاۋدىڭ) اقپاراتتىق وپەراتسيالارىنا قارسى تۇرۋعا باعىتتالعان اقپاراتتىق ءىس-شارالارعا قاتىسۋ.

نەگىزگى مىندەتتەرى وسىنداي. بۇدان بولەك، اۋماقتىق قورعانىس كۇشتەرى سوعىس جاعدايىندا ءبىرىنشى بولىپ ۇرىسقا ءتۇسۋ جانە ەلدى قورعاۋ ميسسيالارىن اتقارا الادى. بۇل تۇرعىدان ۋكراينا ەلى الدەقايدا ۇلكەن جەتىستىكتەرگە جەتە ءبىلدى جانە اۋماقتىق قورعانىس كۇشتەرىنىڭ قاجەت ەكەنىن كورسەتتى. رەسەي اسكەرىنىڭ كيەۆ، چەرنيگوۆ جانە سۋم وبلىستارىنا كىرگەن توپتارىن توقتاتىپ، جەڭىلىسكە ۇشىراتتى. ال قازىرگى ساتتە حاركوۆ جانە حەرسون وبلىستارىن ازات ەتۋ وپەراتسيالارىنا قاتىسۋدا. مىنە، بۇل تاجىريبەلەردى الەم ەلدەرى يگەرۋدە، الۋدا. قازاقستان دا سول ەلدەردىڭ ىشىندە دەپ ايتساق بولادى.

ۋكرايناداعى اۋماقتىق قورعانىس كۇشتەرى جەڭىل جانە اتىس قارۋلارىمەن قارۋلانىپ، ءتيىمدى قوزعالىس مانەۆرىن كورسەتتى. قازاقستان دا بۇل تاجىريبەلەردى كورىپ، قاجەتتىلىگىن تۇسىنۋدە. اۋماقتىق قورعانىس كۇشتەرى اتتى اسكەر رەتىندە جابدىقتالۋى دا مۇمكىن. بۇل قازاقستاننىڭ گەوگرافيالىق ەرەكشەلىگىنە دە بايلانىستى ءتيىمدى شەشىم بولماق.

Abai.kz