بەيسەنبى, 28 ناۋرىز 2024
بيلىك 1648 3 پىكىر 12 قازان, 2022 ساعات 16:28

ءماجىلىس دەپۋتاتتارى ءتۋريزمنىڭ دامۋىنا نارازى: مينيسترلەر ەسەپ بەرۋگە شاقىرىلادى

نەلىكتەن وتاندىق ءتۋريزمنىڭ دامۋى كولىك سالاسىنىڭ ناشار جۇمىسىنان زارداپ شەگەدى؟ ءماجىلىستىڭ بۇگىنگى جالپى وتىرىسىندا دەپۋتات ەلنۇر بەيسەنباەۆ پرەمەر-مينيستر ءاليحان سمايىلوۆقا وسىنداي ساۋالمەن جۇگىندى.

«ەلىمىزدەگى تۋريستىك سالانىڭ جۇيەلى دامىپ، ونىڭ ەكونوميكالىق وڭ اسەرىن كۇتكەلى ءبىراز جىلدىڭ ءجۇزى بولدى. ءاردايىم قازاقستانداعى ءتۋريزمنىڭ تۇراقتى دامۋىنا كەدەرگى كەلتىرەتىن ماسەلەلەر مەن قيىندىقتار تۋىنداپ وتىراتىنى بار.  مىسالى، تۋريست بولسا – مارشرۋت جوق، مارشرۋت بار دا – ينفراقۇرىلىم جوق، ينفراقۇرىلىم بولسا – ۇسىناتىن ءونىم جوق. بىرەۋى بولسا، بىرەۋى جوق، شاماسى بۇل سالادا جۇيەلى جۇمىس جوق. وعان قوسا، ساپالى ءارى تاريحي تۋريستىك نىساندار مەن كيەلى ورىنداردىڭ سانى ارتىپ، ولاردىڭ جان-جاقتى جارنامالانۋىن بايقاپ وتىرمىز. بۇل سالا ءۇشىن اتالعان جاعدايدى «ءساتتى تۋريستىك ۋاقىت» دەپ ايتۋعا كەلەدى. بىراق ادام قالاعانىمەن ترانسپورتتىق جۇيەسى رەتتەلمەگەنىنىڭ سالدارىنان، ەلىمىزدىڭ بارلىق تابيعي سۇلۋلىعىنا جەتۋ مۇمكىن ەمەس بولىپ شىقتى»، – دەدى دەپۋتات.

بۇل رەتتە ول اۋە جولدارىمەن ساياحاتتاۋ ساپارلارى بويىنشا ەڭ كوپ شاعىم تۇسەتىنىن ايتتى.

ۇشۋ جيىلىگىنىڭ تومەندىگى، رەتتەۋگە كەلمەيتىن تۇسىنىكسىز اۋە بيلەتتەرىنىڭ باعا ماسەلەسى، قىزمەت كورسەتۋ ساپاسى مەن رەيستەردى نەگىزسىز كەشىكتىرۋ سياقتى ماسەلەلەردى ءتىزىپ كەتە بەرۋگە بولادى. وعان قوسا اۋە كومپانيالارىمەن تۋرپاكەتتەر بويىنشا كەلىسسوزدەر جۇرگىزۋ مۇمكىن ەمەستىگىن تۋراگەنتتىكتەر ءجيى كوتەرەدى، – دەدى دەپۋتات.

سونىمەن قاتار ە.بەيسەنباەۆ تەمىر جول ماسەلەسىن كوتەرىپ: تەمىر جولدىڭ جىرى تاعى بار. قازاقستان تەمىر جولىنىڭ تۋريزمدىك باعىتتاردى دامىتۋعا قاۋقارى دا، نيەتى دە جوق سياقتى كورىنەدى. بۇل كومپانيا ەلدەگى مونوپوليست بولا تۇرا، ءوزىنىڭ باستى باعىتىن جۇك تاسىمالداۋعا ارناعان. ال حالىق قولداناتىن ۆاگونداردىڭ ساپاسى ناشار، ينتەرمودالدى تاسىمالداۋ تاجىريبەسى جوق، تۋريستىك كلاستاعى پويىزدار تۋرالى ايتپاي-اق قويالىق، – دەدى.

سونداي-اق دەپۋتات ەۋروپانى ايتپاعاندا، ورتالىق ازيا جانە وزگە جەكەلەگەن مەملەكەتتەرمەن بايلانىستىراتىن حالىقارالىق تۋريستىك جۇيەنى قالىپتاستىرا الماعانىنا توقتالىپ، سونىڭ ناتيجەسىندە  جىبەك جولى بويىنداعى تەمىرجول مارشرۋتتارىنىڭ ورنىن كورشىلەس وزبەكستان ءوز ستيلىندەگى جايلى ۆاگوندارىمەن تۋريستىك كلاستەر رەتىندە ىسكە اسىرىپ وتىرعانىن ايتتى.

اۆتوكولىكپەن جۇرەتىن جولداردىڭ جاعدايى سىن كوتەرمەيتىنى تۋرالى دەپۋتاتتىق ساۋالدىڭ سانىندا ەسەپ جوق. ءتىپتى مەملەكەت باسشىنىڭ ءوزى بۇل ماسەلەنى شەشەتىن ۋاقىت جەتتى دەپ ۇكىمەتتى سۇيرەلەپ جۇرگەنىن بىلەمىز. ءبىر عانا مىسال، ەلىمىز بويىنشا كەمىندە 4 مىڭ شاقىرىمنان اساتىن 166 باعىت بويىنشا اۆتوموبيل جولدارىن جوندەۋ مەن رەكونسترۋكتسيالاۋ قاجەتتىلىگى انىقتالۋدا، – دەدى ە.بەيسەنباەۆ.

ءماجىلىس توراعاسى ەرلان قوشانوۆ بۇل ماسەلەنى تولىق قولدايتىنىن جەتكىزىپ، كەلەسى وتىرىسقا ۇكىمەت مۇشەلەرىن شاقىردى.

«ەلنۇر سابىرجانۇلى وتە وزەكتى ماسەلەنى كوتەرىپ وتىر. شىنىندا كوپ جىلدان بەرگى سەلقوس، جۇيەسىز جۇمىستىڭ ناتيجەسىندە كوپتەگەن پوزيتسيامىزدى جوعالتىپ جاتىرمىز. كورشى مەملەكەتتەر الىپ كەتىپ جاتىر. سوندىقتان مەن تولىق قولدايمىن، ارىپتەستەر دە قولدايدى دەپ ويلايمىن. كەلەسى وتىرىسقا ۇكىمەت مۇشەلەرىن شاقىرىپ، وسى ماسەلەنى ەگجەي-تەگجەيلى قارايىق. بۇل جۇمىستى قالاي جۇيەگە قويامىز، قانداي جوسپارلارى بار، قانداي ناتيجە شىعارادى، سونىڭ ءبارىن بىزگە كەلىپ ايتسىن»، - دەدى توراعا.

دەپۋتاتتار مەملەكەتتىك ورگانداردىڭ جاۋابىن كەلەسى جالپى وتىرىستا كۇتەدى.

 

Abai.kz

3 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1562
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2253
عيبىرات

قايسار رۋحتى عازيز جان

مۇحتار قۇل-مۇحاممەد 3516