ايبىندى قازاق اسكەرى تۇركياعا ساپارلاپ باردى. تۇركيا قارۋلى كۇشتەرىنىڭ ارنايى ماقساتتاعى ورتالىعىندا وتكەن حالىقارالىق اسكەري وقۋ-جاتتىعۋلارعا قاتىستى.

«شەكاراسىز باۋىرلاستىق - 1» ارنايى وپەراتسيالار كۇشتەرىنىڭ وقۋ-جاتتىعۋلارى بيىل ءبىرىنشى مارتە ۇيىمداستىرىلعان. وعان قازاقستان، تۇركيا، ءازىربايجان، وزبەكستان مەن پاكىستان قارۋلى كۇشتەرىنىڭ جۇزدەن اسا اسكەري قىزمەتشىلەرى قاتىستى.

قر قورعانىس مينيسترلىگى تاراتقان رەسمي اقپاراتقا ارقا سۇيەسەك، قازاقستان قارۋلى كۇشتەرىنىڭ اسكەريلەرى، ارنايى وپەراتسۋيالاردى جوسپارلاۋ، ارنايى بارلاۋ جۇمىستارىن ۇيىمداستىرۋ، قويان-قولتىق ۇرىستار مەن قالا ىشىلىك جاعدايلارداعى ۇرىس قيمىلدارىن جۇزەگە اسىرۋ، اسكەري وبەكتىلەرگە شابۋىل جاساۋ، عيمارات كۇزەتىنىڭ كوزىن جويۋ سەكىلدى بىرقاتار اسكەري جاتتىعۋلاردى باق سىناپ، تاكتيكالىق ەپيزودتاردى ورىندادى.

«شەكاراسىز باۋىرلاستىق - 1» ارنايى وپەراتسيالار كۇشتەرىنىڭ وقۋ-جاتتىعۋلارى اياسىندا اكۋستيكالىق جۇيەسى بار كەشەندى سيمۋلياتورلاردا اسكەري-مەديتسينالىق دايىندىق ساباقتارى ۇيىمداستىرىلدى. سونىمەن قاتار، مايدان شەبىندە العاشقى مەديتسينالىق كومەك كورسەتۋ مەن جارالانعانداردى ەۆاكۋاتسيالاۋ كەزىندەگى ءىس-قيمىلداردى جۇزەگە اسىرعان.

سونداي-اق، ارنايى كۇشتەردىڭ وقۋ-جاتتىعۋلارى كەزىندە «اەروديناميكالىق قۇبىر» ترەناجەرى مەن ۆيرتۋالدى باعدارلامالىق كەشەندەردە پاراشيۋتشىلەردى دايارلاۋ كۋرستارى دا ۇيىمداستىرىلدى.

بۇل  ۇيىمداستىرىلعان اسكەري-تاكتيكالىق مانەۆرلەردىڭ باستى ماقساتى – گيبريدتىك قاۋىپ-قاتەرلەر جاعدايىندا سەرىكتەس ەلدەردىڭ ارنايى ماقساتتاعى بولىمشەلەرىنىڭ ارنايى وپەراتسيالاردى جۇرگىزۋ كەزىندەگى تاجىريبەسىن ءبولىسۋ بولعان.

تاقىرىپقا تۇزدىق رەتىندە ايتا كەتەيىك، سوڭعى جىلدارى قازاقستان مەن تۇركيا رەسپۋبليكالارى مەملەكەتارالىق كەلىسىمدەر نەگىزىندە ءوزارا اسكەري سالادا كۇش بىرىكتىرىپ، بىرلەسكەن جوبالاردى جۇزەگە اسىرىپ كەلەدى.

قازاقستان پرەزيدەنتى قاسىم-جومارت توقاەۆتىڭ بيىلعى تۇركياعا جاساعان ارنايى مەملەكەتتىك ساپارى شەڭبەرىندە 14 بىردەي ماڭىزدى قۇجاتقا قول قويىلعان ەدى. سونىڭ ىشىندە سىرتقى ساياسات، قورعانىس جانە قاۋىپسىزدىك سالالارىندا ىنتىماقتاستىقتى نىعاۋتۋ تۋرالى قۇجاتتارعا قول قويىلعان بولاتىن.

ءوز كەزەگىندە تۇركيا پرەزيدەنتى رەجەپ تايىپ ەردوعان: «قازاق باۋىرلارىمىزدىڭ تۇراقتىلىعى مەن تىنىشتىعىنا اسا مۇددەلى ەكەنىمىزدى جانە ساۋدا-ەكونوميكالىق، مادەنيەت، قاۋىپسىزدىك سالالارىندا بىرگە بولاتىنىمىزدى ايتقىم كەلەدى. ءبىز ەكىجاقتى جانە كوپجاقتى قاتىناستارىمىزدى نىعايتا بەرەمىز دەپ كەلىستىك. ءبىز قازاق باۋىرلارىمىزدىڭ تۇراقتىلىعى مەن قاۋىپسىزدىگى ءۇشىن جاۋاپكەرشىلىك الامىز»، - دەپ مالىمدەگەن.

ودان بولەك، قازاقستان مەن تۇركيا اراسىندا سوققى جاساۋشى درونداردى الۋ بويىنشا كەلىسىم جاسالعان. سونىمەن قاتار، پرەزيدەنت قاسىم-جومارت توقاەۆتىڭ تۇركياعا رەسمي ساپارى بارىسىندا قازاقستاندا سوققى جاساۋشى درونداردى شىعاراتىن زاۋىت سالۋ بويىنشا كەلىسىم جاساستى.

Anka سوققىلاۋشى دروندارى  وا ايماعىندا سالىناتىن العاشقى زاۋىتتا جاسالاتىن بولدى. وا ەلدەرى اراسىندا تۇركيالىق سوققىلاۋشى دروندار تۇركىمەنستان مەن قىرعىزستاندا بار («بايراكتار» دروندارى). قازاقستان وا-داعى تۇركيالىق قۋاتتى سوققىلاۋشى دروندارعا قول جەتكىزگەن ءۇشىنشى مەملەكەت. ال تۇركيا ونەركاسىبىمەن بىرلەسىپ، سوققىلاۋشى دروندار شىعاراتىن زاۋىت اشاتىن ءبىرىنشى مەملەكەت.

Abai.kz