قوستاناي وبلىسىنىڭ اكىمى ارحيمەد مۇقانبەتوۆتىڭ جوعارعى جاققا جاعىنا بىلۋدە، وتىرىك اقپاراتپەن كوزگە تۇسۋگە كەلگەندە ونىڭ جانىندا ەشكىم دە ءجىپ ەسە المايدى.

وسى وڭىردە 7 جىل بويى ءمىز باقپاي وتىرعاندىعى دا سول «اسىل قاسيەتىنەن» دە شىعار.

ءجا، ءسوزىمىزدى ناقتىلاي تۇسەيىك. ايتپەسە، وسىنداعى ونىڭ قولىنان جەم جەپ ۇيرەنگەن اتشابارلارى ماعان ۇيرەنشىكتى ادەتتەرىمەن «جاپپاي شابۋىلعا» شىعارى ايدان انىق.

ال كەتتىك.

وسىدان ەكى اي بۇرىن وسى ءوز وبلىسىمىزداعى امانقاراعاي ورمان القابىندا الاپات ءورت شىعىپ، 43 مىڭ گەكتار ەگىستىك جانىپ كەتىپ، 100 شاقتى ادامنىڭ ءۇي-جايى مەن مال-مۇلكى وتقا ورانىپ، كۇلگە اينالدى. وبالى نە، مۇنى ەستىگەن مەملەكەت باسشىسى قاسىم-جومارت توقاەۆ وسىندا ارنايى كەلىپ، زارداپ شەككەندەرگە ەكى اي ىشىندە جانعا جايلى 100 ءۇي سالىنىپ، ولاردىڭ ىشىنە قاجەتتى جيھازبەن تولتىرىلىپ، تەلەديدار مەن كومپيۋتەر قويىلىپ، ينتەرنەتكە قوسىلاتىندىعىن اشىق ايتقان. سودان بۇل قۇرىلىس ەكپىندى تۇردە باستالىپ تا كەتتى. ءتىپتى، ارحيمەدكە ونشا سەنە قويماعان ۇكىمەت باسشىسى ءاليحان سمايىلوۆ بار جۇمىسىن جيناپ قويىپ، پرەزيدەنت تاپسىرماسىن ورىنداۋعا بەلسەنە كىرىسىپ، امانقاراعايعا ارنايى كەلىپ، ءىس بارىسىن باقىلاپ كەتتى.

سونىمەن حوش، ءىس ءبىتتى، قۋ كەتتى. ياعني، بىلاي قاراعاندا ساباقتى ينە ساتىمەن بىتكەن سىڭايلى. ورتەنگەن ۇيلەردىڭ ورنىنا حان سارايىنداي ۇيلەردىڭ بوي كوتەرگەندىگىن سوناۋ رەسپۋبليكالىق تەلەارنادان باستاپ، وبلىستاعى ارحيمەدتىڭ قولبالالارىنا اينالعان جەرگىلىكتى باسپاسوزدەر دە حالىقتان ءسۇيىنشى سۇراپ، بورىكتەرىن اسپانعا اتىپ جاتتى. ال ارحيمەد بولسا، ادەتتەگى قالىپتاسقان يگى داستۇرمەن سول كۇنى جاۋىن جاۋىپ تۇرعاندىعىنا دا قاراماستان قۋانىشتارى قويىندارىنا سىيماعان تۇرعىندارعا ءۇيدىڭ كىلتىن ۇلەستىرىپ جاتتى.

مىنە، قىزىق سودان كەيىن باستالدى. بارلىق پالەنى وسى ازعانتاي عانا جاۋىن باستادى. ارادا از ۋاقىت وتپەستەن الگى ءالى بوياۋى كەپپەگەن ۇيلەردىڭ اۋلاسىن توپان سۋ باسىپ، ادامدار ۇيلەرىنەن شىعا الماي قالىپ، ابدەن سورلادى. سويتسە، «باقسا، باقا ەكەن» دەگەندەي، وسىندا جينالعان جاڭبىردىڭ سۋىن سىرتقا اعىزىپ جىبەرەتىن سەپتيكتەردى سالۋدى قۇرىلىسشىلار تارس ۇمىتىپ كەتىپتى. ەندى قونىس تويىن تويلاۋشىلار جاڭبىردىڭ سۋىن سىرتقا شەلەكتەپ تاسۋعا ءماجبۇر. مۇنى ءبىر دەڭىز.

ەكىنشىدەن، توقاەۆ ايتقان جيھازدار دەگەندى مۇندا كەلگەندەر مۇلدە كورگەن دە ەمەس. ايتەۋىر ءبىر تەلەديداردى ءىلىپ قويعان. ءۇيدىڭ بار جيھازى وسى شىعار دەپ ويلاعان بولار. ال كومپيۋتەر مەن ينتەرنەت تۋرالى ەشكىم دە ءتىس جارىپ، بىردەڭە دەپ جۇرگەن جوق.

ارحيمەدتىڭ ەكىباستان ەسەبى تۇگەل. پرەزيدەنتتىڭ تاپسىرماسىن دەر كەزىندە ورىندادى. ۇيلەردى سالدى. حالىق ريزا. العىسى شەكسىز. سايلاۋعا ساقاداي-ساي. بۇدان كەيىن كىم جاقسى، ارينە، ارحيمەد جاقسى. تاعى دا 7 جىل وتىرۋعا ابدەن لايىق. مۇنداي ەلگەزەك تە ىسكەر اكىمدى قايدان تاباسىڭ؟.. قولدا باردا التىندى باعالاي بىلەيىك. ال جاڭا سالىنعان ۇيلەر ءومىر سۇرۋگە ونشا قولايسىزداۋ بولىپ، كەيبىرەۋلەرىنىڭ ىشكى قابىرعالارى شىتىناي باستاعانى، ەش جيھازسىز قاڭىراپ تۇرعانى سەكىلدى «ۇساق-تۇيەكتى» جوعارىداعى بۇرىننان قالعان «دوستارى» مەن شىنايى تىلەكتەستەرى مەن ءبىر داستارحاننان ءدام تاتقان جورا-جولداستارى پرەزيدەنتتىڭ قۇلاعىنا جەتكىزىپ، مازاسىن الىپ قايتەدى.

ال ەڭ قىزىعى «بەلگىلى عالىم» ارحيمەدتىڭ ادەتتەگى قالىپتاسقان تارتىپكە سايكەس بۇل ۇيلەردى ارنايى كوميسسيا قۇرىپ، دۇرىستاپ تۇرىپ تەكسەرىپ، زاڭدى تۇردەگى قابىلداۋ اكتىسىن جاساپ قانا قابىلداپ الۋ سەكىلدى ەرەجەنى مۇلدەم ساقتاماۋ سەكىلدى «جاڭا ءادىستى» ويلاپ تاپقان جاڭالىعى بولدى. قىسقاسى، جاي عانا وبلىس اكىمى بولسا دا ارحيمەد دەگەن ۇلكەن اتاقتى ابىرويمەن الىپ جۇرە الاتىندىعىن انىق تانىتتى.

مۇمكىن، توقاەۆتان كەيىنگى تاققا وتىرۋعا دا جاراپ قالار. نەسى بار، ول قىزمەتتى پايدالانا وتىرىپ، تۇرۋعا جارامسىز بولسا دا سول ۇيلەردى ەشبىر اكتىسىز قابىلداي بەرۋ باستاماسىن ودان ءارى جەتىلدىرىپ، ەلىمىزدەگى بۇگىنگى كۇنگى اسا كۇردەلى ماسەلە - باسپانا تاپشىلىعىن ويداعىداي شەشىپ قالار. ول وسى كۇنگە دەيىن ەشبىر پرەزيدەنتتىڭ دە قولىنان كەلگەن دە جوق. دەمەك، «ءۇمىتسىز سايتان».

جايبەرگەن بولاتوۆ

Abai.kz